ខេត្តមណ្ឌលគិរី ៖ រថយន្តឡង់គ្រុយស័រមួយគ្រឿង បានបង្កើតគ្រោះថ្នាក់ក្រឡាប់ដោយខ្លួនឯង បង្កឱ្យមនុស្សពីរនាក់រងរបួសធ្ងន់ស្រាល ហើយឈើដែលមានផ្ទុកក្នុងរថយន្តធ្លាក់រាយប៉ាយលើផ្លូវជាតិ ប្រៀបបាននិងហាលសម្ងួតទិន្នផលអ្វីមួយអញ្ចឹង។
ហេតុការណ៍ខាងលើបានកើតឡើងនៅថ្ងៃទី០៩ ខែមិថុនា ឆ្នាំ២០១៧ វេលាម៉ោង០៦ និង១២នាទីព្រឹក ត្រង់ចំណុចទឹកច្រប់ ស្ថិតនៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី។
សមត្ថកិច្ចបានឲ្យដឹងថា អ្នកបើកបរឈ្មោះ ថៃ ធារ៉ា ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិពូជ្រៃ ឃុំពូជ្រៃ ស្រុកពេជ្រជា ខេត្តមណ្ឌលគិរី (រងរបួសស្រាល)។ ចំណែកអ្នករួមដំណើរឈ្មោះ នី ភេទប្រុស អាយុ៣២ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិពូជ្រៃ ឃុំពូជ្រៃ ស្រុកពេជ្រជា ខេត្តមណ្ឌលគិរី (រងរបួសធ្ងន់ បាក់ជើងខាងស្ដាំ និងរបួសក្បាល) ។
បច្ចុប្បន្នជនរងគ្រោះកំពុងសំរាកព្យាបាលនៅមន្ទីរពេទ្យបង្អែកខេត្ត។ ចំណែករថយន្តដោយមានផ្ទុកឈើផងនោះ ត្រូវបានយកទៅរក្សាទុកនៅខណ្ឌរដ្ឋបាលព្រៃឈើ ប៉ុន្តែនៅមិនទាន់ដឹងពីបរិមាណឈើល្មើសច្បាប់នៅឡើយ។
គួរបង្ហាញផងដែរថា ការដឹកជញ្ជូនឈើប្រណីតនេះត្រូវគេឃើញថា កើតមានជាហូរហែក្នុងក្រុងសែនមនោរម្យ ប៉ុន្តែមិនដែលឃើញមានជំនាញចុះទប់ស្កាត់ ឬបង្ក្រាបឡើយ។ ក្នុងនោះចរាចរណ៍ឈើក៏ត្រូវបានគេបញ្ជាក់ថាឆ្លងកាត់ក្រុងសែនមនោរម្យឆ្ពោះទៅផ្លូវដាក់ដាំ ស្រុកអូររាំង និងច្រកទ្វារទ្វេភាគីណាមលៀរ ស្រុកពេជ្រា ជាប្រចាំផងដែរ៕
