ខេត្តមណ្ឌលគិរី ៖ អាកាសធាតុត្រជាក់ខ្លាំងកំពុងគ្របដណ្តប់ក្នុងខេត្តមណ្ឌលគិរី ខណៈដែលសីតុណ្ហភាពបានធ្លាក់ចុះត្រឹម១៦ អង្សាសេ នៅពេលយប់ នឹងឡើងខ្ពស់បំផុតត្រឹមតែ២៧-២៨អង្សាសេនៅពេលថ្ងៃត្រង់ ។ ប៉ុន្តែប្រសិនបើមើលតាមឧបករ ណ៍ស្ទង់សីតុណ្ហភាពជាទូទៅគឺឡើងខ្ពស់ត្រឹមតែ២៣-២៤អង្សាសេប៉ុណ្ណោះ កម្រនឹងឡើងដល់២៨អង្សាសេណាស់ ។ ហើយចំពោះអាកាសធាតុដែលបានធ្លាក់ចុះត្រជាក់នេះ គឺថែមទាំងមានលាយលំជាមួយជំនោបក់បោករវិចៗ ធ្វើឲ្យកាន់តែ មានភាពត្រជាក់មួយកំរិតថែមទៀត ។
គេសង្កេតឃើញថា ប្រជាពលរដ្ឋទូទៅមិនថាចាស់ មិនថាក្មេង បាននាំគ្នាទៅទិញសម្លៀកបំពាក់ក្រាស់ៗ ដើម្បីស្លៀកពាក់បន្ថយភាពត្រជាក់បានមួយកំរិត ។ ចំណែកភ្ញៀវទេសចរទាំងជាតិ និងអន្តរជាតិ ដែលនិយមមកលេងកម្សាន្តនៅតាមរមណីយដ្ឋានធម្មជាតិដូចជាទឹកជ្រោះប៊ូស្រានោះ គឺពួកគាត់ស្ទើរតែមិនហ៊ានចុះងូតទឹកជ្រោះ ឬទឹកធ្លាក់នានានោះទេ ដោយសារទឹកមានភាពត្រជាក់ដូចទឹកកក។ ចំពោះបម្រែបម្រួលនៃអាកាសធាតុ ក៏ជាបញ្ហាមួយបានធ្វើឲ្យប៉ះពាល់ដល់ សុខប្រជាពលរដ្ឋផងដែរ ជាពិសេសក្មេងតូចៗ នឹងបងប្អូនចំណាក់ស្រុក ធ្វើឲ្យពួកគាត់មានអាការៈផ្ដាសាយ ។
លោក ខែម ភារម្យ ប្រធានមន្ទីរធនធានទឹកនិងឧតុនិយមបានឲ្យដឹងថា មូលហេតុដែលធ្វើឲ្យខេត្តមណ្ឌលគិរី ចុះ ត្រជាក់ខ្លាំងជាងបណ្ដាខេត្តមួយចំនួននោះ ដោយសារតែខេត្តនេះមានកម្ពស់ខ្ពស់ជាងនីវ៉ូទឹកសមុទ្រ ៧០០ទៅ៩០០ម៉ែត្រ លក្ខណៈបែបនេះគឺវាបង្កឲ្យមានសណើមច្រើន នឹងត្រជាក់បែបនេះ ។ លោកបានបន្តថា ចំពោះបណ្ដាក្រុង-ស្រុក ដែលត្រ ជាក់ខ្លាំងជាងគេក្នុងខេត្តមណ្ឌលគិរីនោះ គឺក្រុងសែនមនោរម្យ នឹងស្រុកអូររាំង ។
ជាមួយគ្នានេះ ក៏មានការសំណូមពរ ពីអជ្ញាធរផងដែរ ប្រសិនបើភ្ញៀវទេសចរជាតិ ឬអន្តរជាតិមានចំណាប់អារម្មណ៍មកកម្សាន្តនៅខេត្តមណ្ឌលគិរី សូមកុំភ្លេចត្រៀមនូវសម្លៀកបំពាក់ក្រាស់ៗមកផង ដើម្បីកាត់បន្ថយភាពត្រជាក់ ដែលនាំឲ្យប៉ះពាល់ដល់សុខភាព ។
គួរបញ្ជាក់ថា ក្រសួងធនធានទឹកនិងឧតុនិយម ក៏បានប្រកាសអាសន្នឲ្យពលរដ្ឋប្រុងប្រយ័ត្ន ចំពោះជំងឺផ្ដាសាយ និងជំងឺផ្លូវដង្ហើម បណ្ដាលមកពីអាកាសធាតុចុះត្រជាក់ខ្លាំង ដែលមានរយៈពេលចាប់ពីចុងខែវិច្ឆិកា រហូតដល់ពាក់កណ្តា លខែធ្នូ និងអូសបន្លាយដល់ចុងខែធ្នូ ឆ្នាំ២០១៤នេះ ៕
ហ៊ិន សុគន់
