រតនគីរី៖ កម្លាំងការិយាល័យនរគបាលប្រឆាំងបទ ល្មើសសេដ្ឋកិច្ច នៃស្នងការនរគបាលខេត្តរតនគិរី បានចុះបង្ក្រាបរថយន្ដខ្នាត22កៅអីដឹកអ្នកដំណើរ របស់វៀតណាមចេញចូលក្រុងបានលុងតាមច្រកទ្វាអន្តរជាតិអូរយ៉ាដាវ បង្កប់ឈើប្រណិតប្រភេទឈើធ្នុងលាក់នៅពីគ្រោមកៅអីភ្ញៀវអង្គុយត្រូវបានកម្លាំងជំនាញធ្វើការឆែកឆេរនិងរកឃើញ ហើយចាប់បង្ក្រាបទាំងតៃកុងរថយន្ត និងបញ្ជូនមកខ័ណ្ឌរដ្ធបាលព្រៃឈើខេត្តភ្លាមៗ ។
ដោយឡែក ក្នុងថ្ងៃដដែលនេះផងដែរ រថយន្ដសាំយ៉ុងដឹកធ្យូងលួចបង្កប់ឈើប្រណីតមួយគ្រឿងទៀត ក៏ត្រូវកម្លាំងសមត្ថកិច្ចការិយាល័យប្រឆាំងបទល្មើសចុះបង្ក្រាបបានតែក្នុងចំណុចផ្សេងគ្នា។គឺនៅ លើផ្លូវជាតិលេខ៧៨ និងនៅក្នុងក្រុងបានលុង នាថ្ងៃទី២៧ ខែមេសា ឆ្នាំ២០១៧នេះ ។
លោកវរសេនីយ៍ឯក នូវ ដារ៉ា នាយការិយាល័យប្រឆាំងបទល្មើសសេដ្ឋកិច្ច បានអោយដឹងថា បន្ទាប់ពីទទួលបានពត៌មានពីកម្លាំងសំងាត់ថា៖ មានរថយន្ដពីរគ្រឿងបានលួចបង្កប់ឈើប្រណិតនៅក្នុងរថយន្ដ ។
ភ្លាមៗនោះ លោកបានដឹកនាំកម្លាំងចុះទៅស្រាវជ្រាវ រុករករហូតប្រទះឃើញរថយន្ដទេសចរណ៏ដឹកអ្នក ដំណើរ១គ្រឿង ម៉ាកហ៉ីយ៉ាន់ដាយ ពណ៌ខៀវ ពាក់ស្លាកលេខ77B 007.65 នៅចំណុចភូមិបាណុល ឃុំទីងចាក់ នៅវេលាម៉ោង៨,៣០នាទីព្រឹក ហើយរហូតដល់ម៉ោង១០,២០នាទីថ្ងៃដដែល កម្លាំងរបស់លោកបានឃាត់រថយន្ដមួយគ្រឿងទៀតម៉ាកសាំយ៉ុង ពណ៌ស ពាក់ស្លាកលេខព្រៃវែង 2A 0175 នៅលើដងផ្លូវជាតិលេខ78ស្ថិតក្នុងភូមិ7មករាសង្កាត់ឡាបានសៀកក្រុងបានលុង ខេត្តរតនគិរី រីឯ ម្ចាស់រថយន្តរត់គេចបាត់ស្រមោល ។
លោកនាយការិយាល័យបន្តថា ៖ ប្រតិបត្តិការចុះបង្ក្រាបរហូតដល់ឃាត់បានរថយន្តទាំងពីរគ្រឿងខាងលើនេះ ដោយមានការចង្អុលបង្ហាញពីលោកព្រះរាជអាជ្ញា អមសាលាដំបូងខេត្តរតនគិរី និងមានការដឹកនាំរបស់លោកផ្ទាល់ ។
លោកបន្តទៀតថា៖ ជនជាតិវៀតណាមចំនួនពីររូប ដែលរងការឃាត់ខ្លួនត្រូវបានគេស្គាល់ឈ្មោះ ០១ : ចុងវ៉ាន់ គៀត ភេទ ប្រុស អាយុ36ឆ្នាំ ជនជាតិវៀតណាម(ជាតៃកុងរថយន្ត) ០២: ឈ្មោះង្វៀន ទុង យុយ ភេទ ប្រុស អាយុ44ឆ្នាំ ជនជាតិវៀតណាម(ព្រូឡាន) និងស្ត្រីរួមដំណើរ០១នាក់ ទៀតមិនស្គាល់ឈ្មោះ ។
បច្ចុប្បន្ន វត្ថុតាងរួមទាំងជនជាតិវៀតណាមទាំងបីរូបកម្លាំងជំនាញបានបំពេញបែបបទបញ្ជូនមកខ័ណ្ឌរដ្ធបាលព្រៃឈើដើម្បីចាត់ការបន្តតាមនិតិវិធីច្បាប់ព្រៃឈើ។
តាមការវាស់វែងពីជំនាញខ័ណ្ឌរដ្ធបាលព្រៃឈើខេត្តឈើដែលរិបអូសបាន ពីរថយន្តក្រុងវៀតណាមថ្លឹងលទ្ធផល,,, ចំនួន11ដុំស្មើរនិង337គិឡូក្រាមប្រភេទឈើធ្នុងរថយន្តសាំយ៉ុង ចំនួន38ដុំស្មើរនិង291,6គិឡូក្រាមប្រភេទឈើធ្នុង ។
គួររំលឹកផងដែរថា៖ ប្រជាពលរដ្ធទូទាំងខេត្តរតនគិរី អបអរសាទរចំពោះស្នាដៃរបស់លោកព្រះរាជអាជ្ញាថ្មីទើបកាន់ដំណែងបានជាងមួយខែប៉ុណ្ណោះដែលបានខិតខំយកចិត្តទុកដាក់អនុវត្តន៍ច្បាប់បានយ៉ាងម៉ឺងម៉ាត់ទប់ស្កាត់និងបង្ក្រាបរាល់បទល្មើសព្រៃឈើជាចំណុចរសើប ដែលកើតមាននៅខេត្តរតគិរី បានជោគជ័យជាបន្តបន្ទាប់ដូចភ្លៀងរលឹម នេះជាឆន្ទៈ និងគោលការណ៍របស់រាជរដ្ឋាភិបាលដែលបានដាក់ចេញ ៕
ដោយ៖ ចាបសំអាន
