ក្រចេះ ៖ បុរសម្នាក់ចាប់បង្ខំរំលោភសេពសន្ថវៈ លើកូនចិញ្ចឹមអាយុ១០ឆ្នាំរាប់ដង ក្នុងមួយខែៗតាំងពីឆ្នាំ២០១៥ រហូតមកត្រូវបានសមត្ថកិច្ចចាប់ដាក់ខ្នោះ តាមពាក្យបណ្តឹងរបស់ប្រពន្ធ ។
ហេតុការណ៍ចាប់ខ្លួនជនល្មើសបានធ្វើឡើងនៅចំណុចជើងភ្នំអាយៀភូមិលចឃុំកន្ទួតស្រុកចិត្របុរីខេត្តក្រចេះកាលពីថ្ងៃទី២៥ខែមីនាឆ្នាំ២០១៧។
មន្ត្រីសមត្ថកិច្ចបានឲ្យដឹងថា ជនសង្ស័យឈ្មោះលឿតឌីអាយុ៣៩ឆ្នាំ ប្រពន្ធឈ្មោះគឹមគង្គាអាយុ៣៦ឆ្នាំ ។ ឯកុមារីជាកូនចិញ្ចឹមឈ្មោះ.ឌ.ល.កអាយុ១២ឆ្នាំ រស់នៅជាមួយឪពុកម្តាយចិញ្ចឹមក្នុងភូមិអាយៀភូមិលចឃុំកន្ទួតស្រុកចិត្របុរី ។
មន្ត្រីបានបន្តថា មុនមានហេតុការណ៍នៅអំឡុងឆ្នាំ២០១៥ជនសង្ស័យបានសុំកុមារីរងគ្រោះអាយុទើបតែ១០ឆ្នាំពីអ្នកភូមិម្នាក់យកមកចិញ្ចឹមចាត់ទុកជាកូនបង្កើតដោយដាក់ឈ្មោះត្រកូលរបស់ខ្លួន(ជនសង្ស័យ)ឲ្យកុមារីនោះទៀតផង។
មន្ត្រីដដែលបានបន្តថា ក្រោយយកមកចិញ្ចឹមជនសង្ស័យតែងបានយកកុមារីរងគ្រោះទៅដេកចាំចម្ការនៅឆ្ងាយពីភូមិ ។ ដោយមានឱកាសជនសង្ស័យជាឪពុកចិញ្ចឹមបានចាប់រំលោកសេពសន្ថវៈជារៀងរាល់ខែ ដោយក្នុងមួយខែៗពី៩ទៅ១០ដង ។ ក្នុងនោះ ជនសង្ស័យតែងបានគំរាមសម្លាប់ បើកុមារីនោះហ៊ានប្រាប់ទៅម្តាយ(ប្រពន្ធ)ឬប្រាប់អ្នកភូមិ ។ លុះដល់ថ្ងៃទី២១ ខែមីនា ឆ្នាំ២០១៧ ជនសង្ស័យឈ្មោះ លឿត ឌី ជាឪពុកចិញ្ចឹម បានចាប់រំលោភកុមារីរងគ្រោះបានម្តង ។ មកដល់ថ្ងៃទី២៣ខែមីនាបានចាប់រំលោភម្តងទៀត។
ប្រភពបានបន្តថានៅថ្ងៃទី២៤ ខែមីនា ឆ្នាំ២០១៧ កុមារីរងគ្រោះបានមកភូមិក៏បានយករឿងរ៉ាវ ដែលឪពុកចិញ្ចឹមប្រព្រឹត្តមកលើខ្លួនទាំងប៉ុន្មានប្រាប់ម្តាយចិញ្ចឹម(គឹមគង្គា)ឲ្យដឹង ។ នៅថ្ងៃខែឆ្នាំដដែល ឈ្មោះ គឹម គង្គា បាននាំកូនស្រីនោះទៅដាក់ពាក្យបណ្តឹងនៅប៉ុស្តិ៍នគរបាល ។ បន្ទាប់ពីទទួលបណ្តឹងសមត្ថកិច្ចបានចុះឃាត់ខ្លួនជនសង្ស័យឈ្មោះ លឿត ឌី យកមកសាកសួរនៅប៉ុស្តិ៍រដ្ឋបាលកន្ទួត ។ នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានរំលោភនាង តាំងពីឆ្នាំ២០១៥ រហូតមកមែន ។
ក្រោយពីសារភាពរបស់ជនសង្ស័យសមត្ថកិច្ចបានកសាងសំណុំរឿងដើម្បីបញ្ជូនទៅតុលាការខេត្តនៅថ្ងៃទី២៦ខែមីនានេះដើម្បីផ្តន្ទាទោសតាមច្បាប់៕
