កំពង់ឆ្នាំង ៖ ប្រជាពលរដ្ឋប្រមាណ២០នាក់តំណាងអោយ៤៣គ្រួសារនៅក្នុងក្រុងកំពង់ឆ្នាំង ដែលបានបានទិញដីពីលោកអៀរ គុយម៉ង់ បានចោទប្រកាន់ថា ក្រុមរបស់លោក លី ផេង រំលោភយកដី៤៣ប្លង់ តាំងពីថ្ងៃទី២២ ខែសីហា ឆ្នាំ២០១៦ នៅក្នុងតំបន់អភិវឌ្ឍន៍ថ្មីជាប់ខាងកើតក្រុមហ៊ុនលាង សេងក្នុុងភូមិទី៧ សង្កាត់ខ្សាម ក្រុងកំពង់ឆ្នាំង ។
កាលពីព្រឹកថ្ងៃទី១២ ខែកុម្ភះ ឆ្នាំ២០១៧ បានមកជួបជុំគ្នាលើកបដាលើដីទំនាស់ សុំសំណូមពរដល់សម្តេចតេជោ ហ៊ុន សែន នាយករដ្ឋមន្ត្រីហ៊ុន សែន មេត្តាជួយដោះស្រាយយកដីពីក្រុមហ៊ុន លី ផេង មកអោយពួកគាត់វិញដើម្បីសាង់សង់លំនៅដ្ឋានរស់នៅស្របច្បាប់ដោយអនុគ្រោះផង។
តំណាងប្រជាពលរដ្ឋរងគ្រោះខាងលើបាននិយាយអោយដឹងថា៖ យោងតាមផែនការអភិវឌ្ឍន៍ច្រាំងទន្លេរបស់អាជ្ញាធរខេត្តកំពង់ឆ្នាំង នៅក្នុងខែមេសា ឆ្នាំ២០១៦ ពួកគាត់បាននាំគ្នាទិញដី១ប្លង់ៗម្នាក់ដែលមានទំហ៊ំ៥ម៉ែត្រ គុណ២០ម៉ែត្រនៅចំណុចចុងកោះក្នុងភូមិទី៧ សង្កាត់ខ្សាម ក្រុងកំពង់ឆ្នាំងពីក្រុមហ៊ុន លោក អៀរ គុយម៉ុង មានតម្លៃក្នុង១ប្លង់ចាប់ពី ៥.២០០ដុល្លាទៅ១៥០០០$ ដោយមានលោកមេភូមិទៅ៧ និងលោកចៅសង្កាត់ខ្សាមចុះហត្ថលេខាទទួលស្គាល់លើលិខិតលក់ទិញត្រឹមត្រូវ និងដឹងឭផងដែរ ពួកគាត់និយាយថា បើអជ្ញាធរភូមិ សង្កាត់មិនទទួលស្គាល់ពួកគាត់ក៏មិនទិញដែរ ។ ស្រាប់តែនៅថ្ងៃទី២២ ខែសីហា ឆ្នាំ២០១៦ គេឃើញលោក លី ផេង ( នៅក្រុងភ្នំពេញ ) និងបក្សពួកដោយមានកម្លាំងកងរាជអាវុធហត្ថខេត្តមួយចំនួនមកការពារពួកគេផងនោះ បាននាំគ្នាមកដកបង្គោលព្រុំដី និងរុះរោងក្នុងដីរបស់ពួកគាត់ ហើយក្រុមលោក លី ផេង បានធ្វើរបងហ៊ុំពទ្ធ័លួសបន្លាយកដី របស់ពួកគាត់ដោយនិយាយថា ដីទាំងនេះជាដីរបស់ លី ផេង មិនមែនដីរបស់អៀរ គុយម៉ង់ទេ បើអ្នកណាហ៊ានដកបង្គោលគេចេញ១ដើម គឺត្រូវសងគេ២០០០ដុល្លា ហើយបើចង់ប្តឹងទៅណាក៏ប្តឹងទៅ។
ក្នុងការទិញដីនេះពួកគាត់ភាគច្រើន បានខ្ចីចងការប្រាក់ពីធនាគារ ព្រោះតែចង់បានដីសង់ផ្ទះនៅរកស៊ីជិតតំបន់អភិវឌ្ឍន៍របស់ក្រុមហ៊ុនលាង សេងដែលខេត្តតម្រូវអោយសាង់ផ្សារថ្មីនៅទីនោះ ប៉ុន្តែបែរជាត្រូវគេរំលោភយកអស់ទៅវិញ ។ កន្លងមក ពួកគាត់បានដាក់លិខិតស្នើសុំអន្តរាគម ទៅអាជ្ញាធរសង្កាត់ខ្សាម លោកអភិបាលក្រុងកំពង់ឆ្នាំង ឯកឧត្តមអភិបាលខេត្តកំពង់ឆ្នាំង លោកជំទាវក្រុមប្រឹក្សាខេត្តកំពង់ឆ្នាំង លោកជំទាវ កែចន្ទ័មុនី អ្នកតំណាងរាស្ត្រមណ្ឌលកំពង់ឆ្នាំង និងកាលពីថ្ងៃទី២៥ ខែមករា ឆ្នាំ២០១៧ នេះក៏បានដាក់លិខិតទៅ ឯកឧត្តមរដ្ឋមន្ត្រី ក្រសួងដែនដីនគររូបនីយកម្ម សំណង់ និងសុរិយោដី និងក៏បានដាក់ជូនខុទ្ទកាល័យសម្តេចនាយរដ្ឋមន្ត្រីផងដែរ ប៉ុន្តែមកដល់ពេលនេះស្ងាត់សូន្យឈឹង មិនទាន់ឃើញស្ថាប័នណាជួយដោះស្រាយឡើយ ហេតុនេះហើយទើបពួកគាត់សំណូមពរតារយៈសារព័ត៌មានដើម្បីអោយសម្តេចតេជោ ហ៊ុន សែន នាយករដ្ឋមន្ត្រី មេត្តាជួយដោះស្រាយរឿងនេះអោយពួកគាត់ដោយក្តីអនុគ្រោះផង។
ទាក់ទងនិងរឿងនេះ លោក អៀរ គុយម៉ុង បាននិយាយអោយដឹងថា៖ លោកក៏ជាជងរងគ្រោះដែរព្រោះថា លោកបានទិញដីខាងលើនេះ ពីឈ្មោះ ជៀម ហៃ ដោយបានប្រគល់ប្រាក់អោយគ្រប់ចំនួនអស់ហើយ និងបានយកដីនេះមកលក់បន្តអោយប្រជាពលរដ្ឋខាងលើ ដោយមានអាជ្ញាធរភូមិសង្កាត់ដឹងឭនិងទទួលស្គាល់ តែក្រោយមកបែជា លោក លី ផេង ប្តឹងថាលោករំលោភយកដីគាត់ យកទៅលក់ទៅវិញ ។
ចំណែកលោក លី ផេង បាននិយាយអោយក្រុមអ្នកកាសែតដឹងថា៖ លោកបានទិញដីខាងលើនេះ ពីឈ្មោះ ជៀម ហៃ ជាម្ចាស់ដី តាមរយះលោក អៀរ គុយម៉ុងដោយផ្ដល់លុយទៅអោយលោកអៀរ គុយម៉ង់ជាអ្នកយកទៅ អោយ លោកជៀម ហៃជាម្ចាសដី ប៉ុន្តែបែជាលោក អៀរ គុយម៉ុង បានរំលោភយកដីទាំងអស់នោះធ្វើជាកម្មសិទ្ធិរបស់ខ្លួនហើយយកដីនោះទៅអង្កន់ លក់បន្តអោយប្រជាពលរដ្ឋខាងលើ។
សូមបញ្ជាក់ថា ៖ រឿងរ៉ាវខាងលើនេះ លោក អៀរ គុយម៉ុង និងលោក លី ផេង បាននឹងកំពុងប្តឹងផ្តល់ក្ដីក្ដាន់គ្នានៅតុលាការខេត្តកំពង់ឆ្នាំងសព្វថ្ងៃរហូត មកដល់ពេលនេះមានរយះពេលជាង៥ខែមកហើយ មិនទាន់ឃើញតុលាកាជំនំជុំរះរឿងក្ដីនេះនៅឡើយទេ។
បើយោងតាមប្រភពបានបង្ហើបអោយដឹងថា ភាគីទាំងសងខាងបានរកលេសល្បិចវិធីធ្វើបាបគ្នាទៅវិញ ទៅមករៀងៗខ្លួនដោយភាគីខាងលោក អៀរ គុយម៉ង់ បានបុកលុយប្រមាណជាង២ម៉ឺនដុល្លា ទៅអោយតុលាការខេត្តកពង់ឆ្នាំងអោយចាត់ការភាគីលោកលី ផេង ហើយតុលាការបានរកល្បិចវិធីដោយលើកយកសំុណំរឿងរដ្ឋបាលព្រៃឈើប្ដឹងលោកលន់ ឡេងពីបទរារាំងកិច្ចការងារសមត្ថកិច្ចក្នុងករណីរចាប់រថយន្តតាកុម៉ាដឹកឈើរាជថ្កុល៣ដំុនិងឈើអា២ដំុនៅចំណុចត្នោត១ដើមក្នុងភូមិត្រពាំងម្លូ ឃុំគ្រាំងស្គា កាលពីអំឡុងឆ្នាំ២០១៤កន្លងទៅយកមកចាត់ការ ហើយក៏បានចាប់លោកលន់ ឡេងតំណាងលោកលី ផេងដាក់ពន្ធនាគារហូតសព្វថ្ងៃ។
ចំណែកភាគីខាងលោកលី ផេង វិញក៏បានរកល្បិចវិធី ប្ដឹភាគីលោកអៀរ គុយម៉ង់វិញផងដែរដោយប្ដឹងលោកសាយ សូរតំណាងលោកអៀរ គុយម៉ង់ ទៅតុលាការពីបទក្លែងឯកសារសាធារណៈ ក្នុងករណីទិញលក់រថយន្តបាឡែន១គ្រឿងដែលមានតម្លៃត្រឹមតែ៤៥០០$ ប៉ុន្តែក្នុងលិខិតលក់ទិញរថយន្តនោះមានតម្លៃរហូតដល់៨៥០០$ឯណោះ ហើយតុលាការក៏បានចាប់លោកសាយ សូរដាក់ពន្ធនាគាវិញដែរពីបទឆបោកនិងរំលោភលើសេចក្ដីទុកចិត្ត។
ប្រភពបានអោយដឹងបន្តទៀតថា រឿងទំនាស់ដីធ្លីខាងលើគឺបណ្ដាលមកពីភាគីខាងលោក អៀរ គុយម៉ង់ ជាអ្នករំលោភដោយដំបូងអ្នកទាំង២ជាមិត្តភ័ក្ដិនឹងគ្នា រកស៊ីក្រុមហ៊ុនតែមួយទិញដីពីឈ្មោះជៀម ហៃជាមួយគ្នា ប៉ុន្តែបែជាលោកអៀរ គុយម៉ង់ស៊ីដាច់ដោយយកដីនោះទៅអង្កន់លក់បន្តអោយប្រជាពលរដ្ឋទើបមានរឿងបែបនេះកើតឡើង ចំណែកប្រជាពលរដ្ឋទាំង៤៣គ្រួសារជាអ្នករងគ្រោះដោយសារក្រុមនេះ៕