ក្រចេះ ៖ សមត្ថកិច្ចនគរបាលក្រុងក្រចេះ បានឃាត់ខ្លួនជនម្នាក់ ដែលប្រើអំពើហឹង្សាក្នុងគ្រួសារ ដោយដេញវាយម្តាយបង្កើត និងបំផ្លាញទ្រព្យសម្បិត្តក្នុងផ្ទះ បណ្ដាលឲ្យខូចខាតខ្ទេចខ្ទីអស់ជាច្រើន ។
ហេតុការណ៍បានកើតឡើងនៅចំណុចព្រែកអណ្ដែងដូនស្ថិតក្នុងភូមិក្រគរសង្កាត់ក្រគរ ក្រុងក្រចេះខេត្តក្រចេះកាលពីរសៀលថ្ងៃទី ២៤ ខែ មករា ឆ្នាំ ២០១៧ ។
មន្ត្រីនគរបាលបានឲ្យដឹងថាជនបង្កអំពើក្នុងគ្រួសារឈ្មោះ អ៊ឹម សុខជា ហៅតាក់ ភេទប្រុស អាយុ ២៤ឆ្នាំ មុខរបរមិនពិតប្រាកដ ។
ជននេះជាមុខសញ្ញាធ្លាប់ជាប់ពន្ធនាគារជាច្រើនលើក ហើយបានធ្វើសកម្មភាពដេញវាយម្ដាយបង្កើតរបស់ខ្លួនដែលមានឈ្មោះ វន សុខាក់ អាយុ ៥០ឆ្នាំ មុខរបរលក់បន្លែ ។ ក្នុងនោះ បានវាយបំផ្លិចបំផ្លាញទ្រព្យសម្បិត្តនៅក្នុងផ្ទះ បណ្ដាលអោយខូចខាតអស់ជាច្រើន ។
បច្ចុប្បន្នជនសង្ស័យត្រូវសមត្ថកិច្ចឃាត់ខ្លួនជាបណ្ដោះអាសន្ន នៅអធិការដ្ឋាននគរបាលក្រុងក្រចេះដើម្បីកសាងសំណុំរឿងបញ្ជូនបន្ត ៕