ខេត្តរតនគិរី ៖ សង្វៀនបញ្ជល់មាន់ ដុះស្លែមួយកន្លែងដែលកំពុងតែជ្រកក្រោមស្លាក់កាស៊ីណូ ដែលមានទីតាំងនៅជាប់ច្រកទ្វារអន្តរជាតិអូរយ៉ាដាវ ស្ថិតក្នុងភូមិប៉ក់ធំ ឃុំប៉ក់ញ៉ៃ ស្រុកអូរញ៉ាដាវ ខេត្តរតនគិរី ដែលត្រូវបានគេរាយការណ៍ថាមានឧកញ៉ាទ្រីភាពជាថៅកែបានបើកលេងយ៉ាងគក្រឹកគគ្រេងយ៉ាងអនាធិបតេយ្យដោយមានខ្មែរនិងបរទេសលេងតែមិនមានសមត្ថកិច្ចពាក់ព័ន្ធទៅបង្ក្រាបតាមបទបញ្ជារបស់សម្តេចក្រឡាហោម ស ខេងឡើយ។
តាមប្រភពព័ត៌មានច្បាស់ការបានឲ្យដឹងថា អ្នកញៀនល្បែងសុទ្ធសឹងតែជាជនជាតិខ្មែរ មិនមានជនជាតិបរទេស អាចចាត់ទុកជាដើមហេតុ ធ្វើឱ្យប្រជាពលរដ្ឋខ្មែរវង្វេងក្នុងល្បែងភ្នាល់បញ្ជល់មាន់មួយនេះមានបញ្ហាក្នុងគ្រួសារ បង្កើតបំណុលកាន់តែច្រើនបំពានទៅលើច្បាប់ភូមិ-ឃុំមានសុវត្ថិភាពទាំង៩ចំណុច ដែលរាជរដ្ឋាភិបាលប្រកាសឱ្យអនុវត្តន៍នាពេលកន្លងមក។
គេនៅចាំបានថា ៖ សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលនៃព្រះរាជាណាចក្រកម្ពុជា បានប្រកាសហាមជាដាច់ខាតថា រាល់កាស៊ីណូទាំងអស់មិនអនុញ្ញាតឱ្យប្រជាពរដ្ឋខ្មែរចូលលេងនោះទេ ក៏ប៉ុន្តែរាល់បទបញ្ជាផ្សេងៗរបស់សម្តេចហាក់បីដូចជាមិនមានប្រសិទ្ធភាពសោះ។ ជាក់ស្តែងដូចជាកាស៊ីណូរបស់ឧកញា ទ្រី ភាព ដែលកំពុងធ្វើសកម្មភាពយ៉ាងគគ្រឹកគគ្រេងនូវល្បែងបញ្ជល់មាន់បន្ថែមដោយបើកឱ្យប្រជាពលរដ្ឋខ្មែរចូលទៅលេងដោយចំហរអត់ខ្លាចសមត្តកិច្ច។
ជាមួយគ្នានេះដែរ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃក៏បានចេញបទបញ្ជាឱ្យសមត្ថកិច្ចបង្ក្រាបឱ្យបានជាដាច់ខាតនៅល្បែងស៊ីសងខុសច្បាប់ គ្រប់ប្រភេទដើម្បីអនុវត្តន៍ឱ្យបាននៅច្បាប់ភូមិ-ឃុំមានសុវត្ថិភាពដែរតែឃ្សុយគ្មានអ្នកអនុវត្តន៍បោះទោះជា ក្រសួងមហាផ្ទៃនឹងបង្កើតនាយកដ្ឋានគ្រប់គ្រងទៅលើល្បែងស៊ីខុសច្បាប់ទាំងអស់នោះក៏ដោយ ។
បើតាមសេចក្តីរាយការណ៍មួយបានឲ្យដឹងពីកន្លែងសង្វៀនបញ្ជល់មាន់ខាងលើនោះថា ម្ចាស់សង្វៀនបញ្ជល់មាន់ដុះស្លែដែលជ្រកក្រោមផ្លាក់កាស៊ីណូរបស់លោកឧកញ៉ា ទ្រី ភាព នេះមានលោក សុខ គឹម សាន្ត ហៅឧកញ៉ាមាន់ សុខ គឹមសាន្ត បានបើកលេងក្នុង១សប្តាហ៍ចំនួន៣ថ្ងៃទៅ៤ថ្ងៃ គឺច័ន្ទ ព្រហស្បត្តិ៍ សុក្រ និងសៅរ៍ ប៉ុន្តែបើមានគូណាត់ពិសេសដែលមកពីតាមខេត្តផ្សេងៗដូចជាខេត្តកំពង់ចាម ត្បូងឃ្មុំ ក្រចេះ ស្ទឹងត្រែង។ល។ គេលេងច្រើនថ្ងៃជាងនេះទៅទៀត ដោយគូពិសេសៗគេចាក់ដល់ទៅរាប់ម៉ឺនដុល្លារឯណ្ណោះ។
ប្រភពបានបន្តឲ្យដឹងទៀតថា មានក្រុមអ្នកញៀនល្បែងបញ្ជល់មាន់នេះច្រើននៅក្រុងបានលុង ខេត្តរតនគិរីដែលអ្នកទាំងនោះភាគច្រើនសុទ្ធសឹងតែជាសមត្ថកិច្ចទៀតផង ដូចជាប៉ូលិសវរៈ និងយោធា។ មិនតែប៉ុណ្ណោះនៅក្នុងបរិវេណសង្វៀនបញ្ជល់មាន់នេះទៀតបានបង្កប់នូវល្បែងស៊ីសងជាច្រើនប្រភេទដូចជាបៀរ អាប៉ោង និងយ៉ូគី។ល។ ដែលជាហេតុធ្វើអោយមានប្រជាពលរដ្ឋខ្មែរជាច្រើននាក់បានចូលទៅលេងល្បែងទាំងនោះផងដែរ។
ពាក់ព័ន្ធជុំវិញករណីខាងលើនេះ សារព័ត៌មានយើងមិនអាចសុំការពន្យល់ណាមួយពីលោកឧកញ៉ាទ្រីភាពនោះទេ ថាតើសង្វៀនបញ្ជល់មាន់របសគាត់មានច្បាប់ ឬអត់ច្បាប់ ។ ចំណែកលោក ម៉ា វិចិត្រ អភិបាលស្រុកអូរយ៉ាដាវបានឆ្លើយថា កន្លងមកលោកធ្លាប់បានមើល ស ជ ណ ដែរ ប៉ុន្តែឥឡូវនេះមិនដឹងថា យ៉ាងម៉េចនោះទេ។ ប៉ុន្តែពាក់ព័ន្ធទៅនឹងពលរដ្ឋខ្មែរដែលបានចូលលេងនោះលោកបានទទួលស្គាល់វាពិតជាមានមែន៕
