ភ្នំពេញ ៖ លោកងួន ញ៉ិលអនុប្រធានទី២ នៃរដ្ឋសភាប៉ុន្មានថ្ងៃនេះទទួលបានការចាប់អារម្មណ៍ល្បីឈ្មោះយ៉ាងខ្លាំងដោយសាអ្នកលេងបណ្តាញសង្គមហ្វេសប៊ុកជួយឃោសនា ។រឿងទីមួយ នៅលើបណ្តាញ Facebook ជាច្រើន បានបង្ហោះរូបលោកដែលលង់លក់ក្នុងដំណេកខណៈកំពុងប្រជុំសភា។រឿងទីមួយ កំពុងតែនៅក្តៅនៅឡើយ ស្រាប់តែមានរឿងចំឡែកមួយទៀត គឺ រថយន្តរបស់លោកម៉ាក Lexus 570 ពណ៌ស ពាក់ស្លាកលេខ រដ្ឋ៣៤: 2-2222 ដែលបើកបញ្ច្រាស់ទិសចរាចរណ៍នៅលើផ្លូវនរោត្តមនាពេលថ្មីៗនេះ។ រឿងទីពីរនេះ កាន់តែបង្កឲ្យមានការចាប់អារម្មណ៍ខ្លាំងមែនទែនព្រោះ លោកងួន ញ៉ិល ជាអនុប្រធានរដ្ឋសភាជាអ្នកបង្កើតច្បាប់ តែបែរជាមិនអនុវត្តច្បាប់ ។
បញ្ហាខាងលើ លោក ងួន ញ៉ិល បានចេញមុខពន្យល់ថា ការបើកបញ្ច្រាស់ផ្លូវនេះ ដោយសារតែមានការចាំបាច់ ត្រូវទៅរាយការណ៍ដោយផ្ទាល់ជូនលោកសាយ ឈុំ ប្រធានព្រឹទ្ធសភាអំពីកិច្ចប្រជុំ APA ហើយក៏មានការសម្រួលដោយនគរបាលចរាចរផងដែរ។
លោកងួន ញ៉ិល បាន បញ្ជាក់ថា យោងតាម ច្បាប់ចរាចរណ៍ជើងគោក មាត្រា៦ អំពីបញ្ហាសិទ្ធិអទិភាពចំណុចទី៣ បានចែងថា សញ្ញាបញ្ជារបស់ភ្នាក់ងារចរាចរ មានសិទ្ធិអទិភាពលើភ្លើងសញ្ញាចរាចរណ៍ គំនូសសញ្ញាចរាចរណ៍ នៅលើទ្រូងផ្លូវ ផ្លាកសញ្ញាចរាចរណ៍នៅតាមដងផ្លូវ និងបទប្បញ្ញត្តិចរាចរណ៍ទាំងឡាយ។
លោកថា ក្នុងនាមលោកជាថ្នាក់ដឹកនាំជាន់ខ្ពស់នៅស្ថាប័នរដ្ឋសភា និងជាអ្នកពិភាក្សា និងអនុម័តច្បាប់ នោះលោកមិនបំពានច្បាប់ចរាចរណ៍នេះទេ (ស៊ិក) ៕
