ករណីបាញ់ប្រហារគ្នារវាងព្រះរាជអាជ្ញាអមសាលាដំបូងខេត្តក្រចេះ ជាមួយ និងក្រុមតៃកុងឡានស៊ីឈ្នួល ដឹកឈើ កាលពីយប់រំលងអាធ្រាត្រឈានចូលថ្ងៃទី ២៥ ខែកក្កដា ឆ្នាំ២០១៤ នៅត្រង់ចំណុចភូមិខ្នុរ ឃុំស្វាយជ្រះ ស្រុកស្នួល ខេត្តក្រចេះ កន្លងទៅថ្មីៗនេះ ដំណឹងភ្នំពេញទទួលបានព័ត៌មានជាច្រើនពាក់ព័ន្ធជាមួយនឹងរឿងនេះ
។
តាមប្រភពពីប្រជាពលរដ្ឋដែលរស់នៅក្បែរកន្លែងកើតបានលួចប្រាប់ភ្នាក់ងារដំណឹងភ្នំពេញ ក្នុងលក្ខខណ្ឌ មិនបញ្ចោញឈ្មោះថា មុនពេលឮស្នូរគ្រាប់កាំភ្លើងផ្ទុះ គេ ឃើញមានរថយន្ត ២គ្រឿង រត់តាមបណ្តោយផ្លូវជាតិលេខ ៧ ពីទិសខាងជើង ទៅទិសខាងត្បូង មួយគ្រឿងម៉ាក សាំងយ៉ុង ១២ កៅអី មួយគ្រឿងទៀត ម៉ាកកាំមារី ០៧ បើកបរយ៉ាងលឿនទំនងជាខ្លាចអ្វីមួយ ។ បន្ទាប់មកគេក៏ក្រឡេកឃើញមានរថយន្តមួយគ្រឿងទៀត ម៉ាកថុនត្រា ជិះគ្នាប្រហែល ៧ ទៅ ៨នាក់ មានខ្លះស្លៀកពាក់ឯកសណ្ឋានជាប៉ូលិស ហើយខ្លះទៀត ពាក់ជាស៊ីវិលធម្មតា ដោយ ស្រែកបញ្ជាឱ្យរថយន្តដែលនៅខាងមុខទាំងពីរគ្រឿងនោះឈប់ ។ តែរថយន្តទាំងពីរនោះ ក៏មិនព្រម ឈប់ទើបកើត ឱ្យមានស្នូរកាំភ្លើងផ្ទុះឡើង ។ បន្ទាប់មកក៏ឃើញរថយន្តម៉ាកកាំមារីបានបើកយ៉ាងលឿនគេចបាត់ទៅ ។
ដោយឡែកតែរថយន្តសាំងយ៉ុង ទំនងជាដឹងថា ខ្លួនពុំអាចរត់រួចពីក្រញ៉ាំដៃ រថយន្តថុនត្រាខាងក្រោយបាន ក៏នាំគ្នាចុះពីលើរថយន្តរត់គេចខ្លួនចូលទៅក្នុងផ្ទះប្រជាពលរដ្ឋ តែម្តង ។ ទោះបីជាតៃកុងរថយន្តសាំងយ៉ុង ក៏ដូចជា អ្នកជិះជាមួយបានចុះគេចខ្លួនចូលទៅក្នុងផ្ទះប្រជាពលរដ្ឋក៏ដោយក៏ស្នូរកាំភ្លើងនៅតែបន្តផ្ទុះទៅវិញទៅមកដដែល រហូតដល់មានកម្លាំងសមត្ថកិច្ចជាច្រើនមកជួយអន្តរាគមន៍ ទើបស្ងាត់ ។ ពេលនោះទើបដឹងថា មានប្រជាពលរដ្ឋ ម្នាក់បានរងរបួសដោយសារការវាយប្រហារគ្នាដោយ គ្រាប់កាំភ្លើង ។
លោក ទី សុវិនថាល់ ព្រះរាជអាជ្ញាអមសាលាដំបូងខេត្តក្រចេះ បានប្រាប់សារព័ត៌មានក្នុងស្រុកថា នៅក្នុង ប្រតិបត្តិការបង្ក្រាបបទល្មើសព្រៃឈើខាងលើនេះ គឺក្រុមឈ្មួញ ឈើបានបាញ់ប្រហារមកលើរូបលោក និងកម្លាំង សមត្ថកិច្ច ហើយខាងសមត្ថកិច្ចមិនបានបាញ់តបតវិញទេ តែគ្រាន់តែបាញ់ឡើងលើដើម្បីសុំអន្តរាគមន៍បន្ថែម ។ ចំពោះ ការផ្សាយរបស់សារព័ត៌មានខ្លះថា សមត្ថកិច្ចបាញ់ទៅលើក្រុមឈ្មួញឈើបណ្តាលឱ្យប្រជាពលរដ្ឋម្នាក់រងរបួស នោះ គឺជាការមិនពិត ។
នៅក្នុងប្រតិបត្តិការនេះលោកក៏បានរាយការណ៍ជូនដល់សមត្ថកិច្ចជំនាញរដ្ឋបាលព្រៃឈើ និងស្នងការដ្ឋាន នគរបាលខេត្តដើម្បីឱ្យជួយដាក់កម្លាំង ចំណែកលោក កែវ ជា មេបញ្ជាការកងរាជអាវុធហត្ថខេត្តក្រចេះ ទូរស័ព្ទមិនចូលទេ ពេលប្រតិបត្តិការនោះ ។ លោកព្រះរាជអាជ្ញាបន្តថា នៅពេលជិតដល់ចំណុចវត្តស្វាយជ្រះ ក្នុងឃុំស្វាយជ្រះ ស្រាប់តែលេចចេញរថយន្តលុចស៊ីស ៤៧០ ស្លាកលេខ ០៧៧៧ ហើយឈ្មោះ ធី បាញ់ បានទូរស័ព្ទ ទៅមន្ត្រីប៉េអឹមឈ្មោះ ធារ៉ា ជាបន្តបន្ទាប់សុំកុំឱ្យដេញបង្ក្រាបឡាន ដឹកឈើ ប៉ុន្តែយើងអត់ដេញទេ គ្រាន់តែសុំឱ្យ ឡានដឹកឈើនោះវាឈប់តែឡាននោះអត់ឈប់ ។ រហូតដល់វត្តស្វាយជ្រះ ចូលទៅដល់ក្នុងវត្តបានបន្តិចស្រាប់តែ ពួក នោះបានបាញ់មកលើរូបលោក និងសមត្ថកិច្ចប៉ុន្តែលោកបានហាមឃាត់មិនឱ្យតបតទេ។ ហើយនៅពេលដែល ចាប់ជនល្មើសបានពីរនាក់ ទើបដឹងថា ក្រុមឈ្មួញ បាញ់ ត្រូវប្រជាពលរដ្ឋម្នាក់នៅក្បែរនោះ ។ សមត្ថកិច្ចគ្រាន់តែ បាញ់បង្អើលទៅលើដើម្បីឱ្យសមត្ថកិច្ចដទៃទៀតមកជួយអន្តរាគមន៍ហើយប្រជាពលរដ្ឋដែលត្រូវរបួស គឺនៅក្នុង វត្ត វាខុសគ្នាឆ្ងាយណាស់ ដែលសារព័ត៌មានមួយចំនួនចេះតែផ្សាយនោះ ។
ដោយឡែកលោក ធី បាញ់ ដែលទទួលរងការចោទប្រកាន់ថា បានទូរស័ព្ទមកគំរាមសមត្ថកិច្ចថា មករំដោះ ឈើ និងបក្ខពួកគ្នារកពីរនាក់ក្នុងពេលនោះ បានប្រាប់ដំណឹង ភ្នំពេញតាមទូរស័ព្ទកាលពីព្រឹកម៉ោង ៨ៈ៤៣នាទី ថ្ងៃទី ២៩ ខែកក្កដា ឆ្នាំ២០១៤ នេះថា មុនពេលកើតហេតុរូបលោកស្ថិតក្នុងកាស៊ីណូ ហើយឈ្មោះ បុល ដែលជាមិត្ត ភ័ក្ត្រ លោកបានទូរស័ព្ទមកលោកថា គេ (ឈ្មោះ បុល)បានទិញឈើក្តារងឿចំនួន ៩ សន្លឹក ពីស្រុកឆ្លូង ដឹកមកទីរួមខេត្ត និងបន្តយកទៅឈ្នួលពេលនេះត្រូវបានកម្លាំង សមត្ថកិច្ចតាមហើយ ។ លោកក៏បានទូរស័ព្ទទៅឈ្មោះ ធារ៉ា ដែលជា មន្ត្រីប៉េអឹមប្រចាំការនៅតំបន់ផ្លូវជាតិលេខ ៧ ក្បែរចំណុចកើតហេតុខាងលើថា ធារ៉ា អ៊ើយឡានឈើ ដែលកម្លាំង ធារ៉ា ឯងតាមចាប់នោះជារបស់មិត្តភ័ក្ត្រខ្ញុំទេ ហើយគ្មានឈើអ្វីសំខាន់នោះឡើយ ។ មានការអីចាំជួបគ្នាពេល ក្រោយ បន្ទាប់មកមិត្តភ័ក្ត្ររបស់លោកក៏បាន
ទូរស័ព្ទមកប្រាប់ថា គេបានបាញ់មកលើឡានវាហើយ លោក ធី បាញ់ ក៏បានប្រាប់ទៅមិត្តភ័ក្ត្រវិញថា ឯងធ្វើយ៉ាងរត់ឱ្យរួចខ្លួនសិនទៅឡានចាំពេលក្រោយ ។ ហើយ លោកក៏បានធ្វើដំណើរ ទៅកន្លែងកើតហេតុ ដោយរថយន្តរបស់លោក គឺបានធ្វើដំណើរពីក្រោយរថយន្តលោក ហាក់ ហ៊ាន់ ព្រះរាជអាជ្ញារង អមសាលាដំបូងខេត្តក្រចេះ ។
លោក ធី បាញ់ បន្តថាចំពោះការដែលគេចោទថា រូបលោកជាអ្នកបាញ់បោះមកលើសមត្ថកិច្ច ឬព្រះរាជ អាជ្ញានោះ មិនមែនជាការពិតឡើយ ព្រោះថា អ្នកណាក៏ដឹងថា លោក គ្មានស្ថិតនៅកន្លែងកើតហេតុនោះឡើយ ។ ហើយម្យ៉ាងទៀតយើងជាប្រជាពលរដ្ឋគោរពច្បាប់ម៉េចក៏ហ៊ានធ្វើការតបតបជាមួយអ្នកកាន់ច្បាប់ទៅវិញយ៉ាងនេះ ? ។
លោក ធី បាញ់ បញ្ជាក់បន្ថែមថា ពេលខ្ញុំទៅដល់កន្លែងកើតហេតុ មានសាក្សីមួយ ចំនួនថា ការបាញ់មកលើ រថយន្តព្រះរាជអាជ្ញានោះ គឺជាកូនចៅរបស់លោក ព្រះរាជអាជ្ញាដែលលោតចុះពីលើរថយន្តហើយបានបាញ់ រថយន្តរបស់មេខ្លួនឯង បន្ទាប់ពីដឹងថា មានប្រជាពលរដ្ឋរងរបួស ។
តាមប្រភពពីសមត្ថកិច្ចដែលបំរើការងារនៅអង្គភាពកងរាជអាវុធហត្ថខេត្តក្រចេះ បានលួចបង្ហើបប្រាប់ ភ្នាក់ងារ ដំណឹងភ្នំពេញ ដោយសុំមិនបញ្ចោញឈ្មោះថា ក្នុងទឹកដី ខេត្តក្រចេះ ចាប់តាំងពីលោក ទី សុវិនថាល់ មកធ្វើ ជាព្រះរាជអាជ្ញាខេត្តមកករណីឈ្មួញរកស៊ីឈើក៏ដូចជា បទល្មើសផ្សេងៗមិនសូវជាកើតមានឡើយ ។ ជាពិសេសក្រុម រកស៊ីដឹកឈើធំៗ ដែលធ្លាប់តែដឹកយ៉ាងគគ្រឹកគគ្រេងកន្លងមក គឺលែងហ៊ានអើតក្បាលចេញមក ទៀតហើយ ។ ដោយសារតែគេខ្លាចអំណាចលោកព្រះរាជអាជ្ញាថ្មីនោះ ។ ព្រោះថា សកម្មភាពចុះបង្ក្រាបបទល្មើសរបស់លោក ទី សុវិនថាល់ គឺគាត់ចុះទៅដោយផ្ទាល់ៗមិនបានបញ្ជា ឬប្រើព្រះរាជអាជ្ញារងឱ្យទៅជំនួសទេ ហើយពេលខ្លះ លោកក៏មិនបានបញ្ជាកងកម្លាំងសមត្ថកិច្ចឱ្យចូលរួមនោះឡើយ ។ ប្រភពដដែលបន្តថា គិតទៅចាប់តាំងពីព្រះរាជអាជ្ញាថ្មីមកកាន់តំណែងស្នូរអាវុធដែលផ្ទុះឡើងដោយការបង្ក្រាប បទល្មើសផ្សេងៗ គឺមានចំនួនជិត ១០០គ្រាប់ ហើយក្នុង ៥ករណី តែមិនដឹងថា ភាគីណាបាញ់ភាគីណានោះទេ ។
តាមសម្តីក្រុមព្រះរាជអាជ្ញាក៏ដូចជា ចៅក្រមសាលាដំបូងរាជធានីភ្នំពេញ ដែលជជែកគ្នានៅក្នុងហាងកាហ្វេ មុខសាលាដំបូងរាជធានីភ្នំពេញថា លោក ទី សុវិនថាល់ អនុវត្តការងាររបៀបនេះគឺផ្ទុយស្រឡះពីនីតិវិធីព្រះរាជ អាជ្ញាហើយ ។ អានេះទំនងពាក់ព័ន្ធ និងលាភសក្ការៈ ? ឬក៏ដើម្បីសំញ៉ែងឱ្យក្រុមឈ្មួញដែលរកស៊ីល្មើសច្បាប់មាន ការ កោតខ្លាច ។ តួនាទីព្រះរាជអាជ្ញា គឺរងចាំតែបញ្ជានៅពេលដែលសមត្ថកិច្ចជំនាញស្នេស៊ិំដីកាឆែកឆេរ ឬអនុវត្ត សាលក្រមក៏ដូចជា ចុះសហការជាមួយនៅពេលដែល មានមន្ត្រីសមត្ថកិច្ចស្នើសុំបទបញ្ជាមិនមែនចុះទៅដោយខ្លួនឯង ពេលមានរឿងបានស្រែករកអន្តរាគមន៍បែបនេះទេ ។
តាមការបញ្ជាក់របស់លោក ហាក់ ហ៊ាន់ ព្រះរាជអាជ្ញារងអមសាលាដំបូងខេត្តក្រចេះ ដែលដឹកនាំកម្លាំងសាធារណៈចុះបង្ក្រាបបទល្មើសការដឹក និងជួញឈើប្រណីត ជាមួយលោក ទី សុវិនថាល់ ជាព្រះរាជអាជ្ញាអមសាលាដំបូងខេត្តក្រចេះនោះ បានឲ្យដឹងថា នៅ មុនពេលកើតហេតុ មានសេចក្តីរាយការណ៍មកថា មានរថយន្តដឹកឈើ ធំៗ នាំឲ្យកម្លាំង របស់លោកដេញតាមរថយន្តដឹកឈើទាំងនោះ និងក៏បានរាយការណ៍ជូនលោកព្រះរាជអាជ្ញា ផង ។ បន្ទាប់មក ត្រូវបានក្រុមឈ្មួញឈើព័ទ្ធកាក់រថយន្ត លោកព្រះរាជអាជ្ញាមិនឲ្យ បន្តដំណើរទៅមុខកើត ព្រមទាំងមានរថយន្តទំនើបម៉ាក Lexus មកព័ទ្ធពីក្រោយថែម ទៀត ។ ក្នុងស្ថានភាពតានតឹងបែបនេះ លោកក៏បាន ទំនាក់ទំនងជាមួយរដ្ឋបាលព្រៃឈើស្វាយជ្រះ និងសមត្ថកិច្ចជំនាញពាក់ព័ន្ធ ដើម្បីសហការគ្នាបង្ក្រាប ធ្វើឲ្យក្រុមដឹក ជញ្ជូនឈើបើករថយន្តរត់គេច តែដំណាលគ្នានោះ រថយន្ត Lexus របស់ឈ្មួញឈើបានដេញតាមពីក្រោយ និងបានបាញ់សំដៅមកលើរថយន្តរបស់លោកព្រះរាជអាជ្ញា ទើបបង្កឲ្យ មានការប៉ះទង្គិចគ្នា ហើយក្រុម ជនល្មើសក៏បានបើករថយន្តគេចខ្លួនទៅបាត់ ខណៈ សមត្ថកិច្ចក៏ចាប់បានជនល្មើសចំនួន២នាក់ ។ បន្ទាប់ពីចាប់បានជនល្មើស២នាក់រួចហើយ ក្រុមបក្ខពួកជនល្មើសក៏បានលើកគ្នាមកទៀត ក្នុងបំណងដើម្បីរំដោះរថយន្តដឹកឈើ និងមនុស្ស ប៉ុន្តែដោយមានកម្លាំងសមត្ថកិច្ចចុះទៅអន្តរាគមន៍ច្រើននាក់ ធ្វើឲ្យក្រុម ជនល្មើសនោះរត់គេចខ្លួនអស់ទៅ ។
លោកព្រះរាជអាជ្ញារងអមសាលាដំបូងខេត្តក្រចេះ បានឲ្យដឹងទៀតថា តាមចម្លើយសារភាពរបស់ជនសង្ស័យដែលចាប់ខ្លួនបាននោះ គឺបានចង្អុលបង្ហាញឲ្យឃើញនូវ មុខសញ្ញា ក្រុមឈ្មួញឈើដែលជាប់ពាក់ព័ន្ធ រួមមានឈ្មោះ ពៅ និងឈ្មោះ ធី រួមទាំងមានមន្ត្រី មួយចំនួនទៀតចូលរួមផង ។
តាមការកត់សម្គាល់ជាក់ស្តែង បានបង្ហាញឲ្យឃើញថា បទល្មើសព្រៃឈើនៅបណ្តាខេត្តភាគឦសាននៃប្រទេសកម្ពុជា គឺបានកើតឡើងជាប់ជាប្រចាំ ដោយមានមន្ត្រីធំៗនិង ឈ្មួញគ្រាក់ៗជាប់ពាក់ព័ន្ធជាមួយនឹងបទល្មើសនេះអស់ជាច្រើនឆ្នាំមកហើយៗក៏មិនងាយនឹងបង្ក្រាបអស់ងាយៗដែរ ដ្បិតថ្នាក់លើកំពូលបានត្រឹមតែស្រែកឲ្យរួចពី មាត់ ៕
រថយន្តដឹកឈើ និងតៃកុង រួមទាំងព្រូ ជិះជាមួយគ្នា ត្រូវបានចាប់ខ្លួន
ជនរងគ្រោះសម្រាកនៅមន្ទីរពេទ្យ
ផ្ទះជនរងគ្រោះដែលត្រូវគ្រាប់កាំភ្លើង