ខេត្តបាត់ដំបង ៖ អនុវត្តតាមមតិណែនាំរបស់ឧត្តមសេនីយ៍ទោ ស ថេត ស្នងការនៃស្នងការដ្ឋាននគរបាលខេត្តបាត់ដំបង និងដោយមានការអនុញ្ញាតពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង នៅយប់ថ្ងៃទី ៣០ ខែ សីហា ឆ្នាំ ២០១៦ លោកវរសេនីយ៍ឯក កុយ ហៀង ស្នងការរងទទួលផែនប្រឆាំងបទល្មើស និងលោកវរសេនីយ៍ឯក ម៉ៅ រង្ស៊ី នាយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង បានដឹកនាំកម្លាំង និងប្រើប្រាស់វិធានការជំនាញរបស់នគរបាលតាមរយៈប្រជាពលរដ្ឋល្អ បានផ្តល់ពត៌មានអំពីករណីបទល្មើសជួញដូរ និងដឹកជញ្ជូនសត្វព្រៃមួយករណី ដែលឈ្មួញទុច្ចរិតកំពុងលួចលាក់ដឹកជញ្ជូនក្នុងទិសដៅពីខេត្ត បន្ទាយមានជ័យឆ្ពោះទៅកាន់រាជធានីភ្នំពេញ ។
ឆ្លងតាមរយៈកិច្ចប្រតិបត្តិការក្នុងរាត្រីថ្ងៃទី ៣១ ខែ សីហា ឆ្នាំ ២០១៦ ក្នុងទឹកដីខេត្តបាត់ដំបង សត្វព្រៃចំនួន ០២ ប្រភេទត្រូវបាននគរបាលយើងធ្វើការរិបអូសបានដែលក្នុងនោះមាន៖
១-សត្វអណ្តើករស់ចំនួន ២០៧ គីឡូក្រាម ( ពីររយប្រាំពីរគីឡូក្រាម)
២-សត្វពស់រស់ចំនួន ១៦ គីឡូក្រាម ( ដប់ប្រាំមួយគីឡូក្រាម )
សូមបញ្ជាក់ថា ជនសង្ស័យដែលជាម្ចាស់ ( សត្វអណ្តើក និងសត្វពស់ )ទាំងនេះ បានគេចខ្លួនបាត់ក្នុងពេលដែលសម្ថកិច្ចធ្វើប្រតិបត្តិការ ដែលបច្ចុប្បន្ន នគរបាលជំនាញកំពុងធ្វើការស្រាវជ្រាវ កំណត់ឲ្យបាន នូវអត្តសញ្ញាណជនសង្ស័យដើម្បី យកមកទទួលខុសត្រូវចំពោះមុខច្បាប់ ។
នៅព្រឹកថ្ងៃទី ៣១ ខែ សីហា ឆ្នាំ ២០១៦ នេះ ដោយបានការឯកភាពពីលោក នួន សាន ព្រះរាជ អាជ្ញាអមសាលាដំបូងខេត្តបាត់ដំបង ស្នងការដ្ឋាននគរបាលខេត្តបាត់ដំបង ធ្វើការបានប្រគល់ ( សត្វអណ្តើក និងសត្វពស់ ) ទាំងនេះ ជូនទៅជំនាញរដ្ឋបាលជលផល ដើម្បីចាត់ចែងយកទៅប្រលែងនៅបឹងធម្មជាតិ ។ ក្នុងនាមស្នងការដ្ឋាននគរបាលខេត្តបាត់ដំបង សូមកោតសរសើរចំពោះទឹកចិត្តនៃការចូលរួមសហការណ៍ពីប្រជាពលរដ្ឋ និងសមត្ថកិច្ចពាក់ព័ន្ឋ ទាំងអស់ជាពិសេសលោកព្រះរាអាជ្ញាអមសាលាដំបូង ខេត្តបាត់ដំបង៕