មណ្ឌលគិរី៖ កាលពីព្រឹកថ្ងៃទី០១ខែសីហាឆ្នាំ២០១៦នេះ លោក ប៉េង សម្បត្តិ អភិបាលរងខេត្តមណ្ឌលគិរី បានដឹកនាំក្រុមការងាររួមមាន លោក ងិន សុភឿន ស្នងការរង នៃស្នងការដ្ឋាននគរបាលខេត្តមណ្ឌលគិរី លោក ឃន់ អូន អភិបាលរងក្រុងសែនមនោរម្យ លោក កាន់ ពេញ អធិការក្រុងសែនមនោរម្យ និងកម្លាំងកងរាជអាវុធហត្ថក្រុងសែនមនោរម្យ ចុះរៀបចំសណ្តាប់ធ្នាប់ការដាក់លក់នៅលើចិញ្ចើមផ្លូវ ដែលពួកអាជីរករបានតសំយ៉ាបលយមកលើចិញ្ចើមផ្លូវនៅចំនុចដើមឫស្សីក្រោយផ្សារក្រុងសែនមនោរម្យ។
ខណៈនោះដែលសមត្ថកិច្ច បានធ្វើការរុះរើដំបូលប្រក់តង់ដែលអាជីវករយកចំណីផ្លូវធ្វើការលក់ដូរ និងកាយសំរាមនៅសងខាងផ្លូវដែលមានសំរាមជាច្រើនចោលពាស់វាលពាស់កាលដែលធ្វើអោយកកស្ទះនៅប្រព័ន្ធលូបង្ហូរទឹក ព្រមទាំងណែនាំដល់អាជិវករសូមចូលរួមកែលម្អឡើងវិញតាមរយះការដាក់លក់នូវត្រីសាច និងបន្លែបង្កាអោយមានរបៀរៀបរយទៅតាមតូបនិមួយៗ អោយមានសណ្តាប់ធ្នាប់ ចំណែកអ្នកដែលមកទិញត្រូវចតម៉ូតូនៅកន្លែងធំទូលាយ កុំមកចតយ៉ាងអនាធិបតេយ្យដូចពេលមុន ដែលធ្វើអោយអ្នកធ្វើដំណើរនៅលើដងផ្លូវនោះពិបាកក្នុងការធ្វើដំណើរដោយសារការចតម៉ូតូមិនមានសណ្តាប់ធ្នាប់ ។
ដោយឡែកចំពោះផ្សារជនជាតិដើមភាគតិចវិញ ត្រូវបាន លោក ម្លាំង ឆន អភិបាលរងក្រុងសែនមនោរម្យ ដែលទទួលបន្ទុកទៅលើបញ្ហារនេះ លោកក៏បានឆ្លើយតបទៅនឹងវេទិកាសាធារណៈក្រុងសែនមនោរម្យនាពេលកន្លងមកផងដែរ ដោយលោកបានអោយបងប្អូនជនជាតិដើមភាគតិចមកលក់ដូរនៅក្នុងផ្សារជនជាតិវិញ និងបានអោយរថយន្តដែលចតនៅទីនោះយ៉ាងអនាធិបតេយ្យ ចេញពីទីនោះផងដែរ ។
បើមើលពីសភាពជាក់ស្តែងរបស់បងប្អូនជនជាតិដើមភាគតិចពេលដែលកំពុងលក់ដូរនៅក្នុងផ្សារជនជាតិដើមវិញ ទឹកមុខរបស់ពួកគាត់មានការសប្បាយរីករាយដោយពួកគាត់បានវិលត្រឡប់មកលក់ដូរនៅកន្លែងដើមវិញ ហើយបន្លែបង្កាដែលពួកគាត់ដាក់លក់សុទ្ធតែបន្លែដែលពួកគាត់ដាំផ្ទាល់ដៃមិនមានជាតិគីមីនោះទេ៕
