ខេត្តព្រៃវែង ៖ ខណៈនេះប្រជាពលរដ្ឋ ភូមិក្រោលគោ ឃុំគោខ្វក ស្រុកកំពង់ត្របែក ខេត្តព្រៃវែង កំពុងតែព្រួយបារម្មណ៍អំពីដង្កូវទាំងហ្វូងហ្វាយធ្វើការបំផ្លិចបំផ្លាញផលដំណាំស្រូវខុចខាតអស់ជាច្រើនហិកតា ។
អ្នកឆ្លងឆ្លើយពត៌មានបញ្ញវន្តខ្មែរប្រចាំខេត្តព្រៃវែងបានជួបសម្ភាសន៍ជាមួយលោក អ៊ំ មាស ហឿន រស់នៅក្នុងភូមិកើតហេតុខាងលើបានរៀបរាប់ឲ្យដឹងថា ដោយសារគ្រោះរាំងស្ងួតយ៉ាងធ្ងន់ធ្ងរ គួបផ្សំនឹងដង្កូវមកចាក់គុលស្រូវ ទោះបីគាត់ប្រើថ្នាំបាញ់សម្លាប់សត្វចង្រៃនេះយ៉ាងណាក៏ដោយ ក៏គាត់មិនអាចដោះស្រាយបញ្ហាស្រោចស្រង់ផលដំណាំរបស់គាត់បានឡើយ។
ប្រជាជនក្នុងភូមិ បានសំណូមពរឲ្យមន្ទីរកសិកម្មខេត្តព្រៃវែង ចុះមកជួយកម្ចាត់សត្វដង្កូវនេះ ប៉ុន្តែរហូតមកទល់នឹងពេលនេះ នៅមិនទាន់ឃើញដោះស្រាយបញ្ហានេះ ចេញជាលទ្ធផលអ្វីនៅឡើយ។ បើនៅតែពុំមានលទ្ធភាពកម្ចាត់ដង្កូវនេះបានទេនោះ ប្រាកដជាដល់រដូវចុងឆ្នាំនេះ ប្រជាពលរដ្ឋរស់នៅតំបន់នេះមានការខ្វះខាតស្រូវអង្គរហូបចុក គួបផ្សំនឹងជីវភាពក្រក្សត់ អាចនឹងឲ្យពួកគាត់ធ្វើចំណាក់ស្រុករហូតស្ងាត់ភូមិឋានក៏អាចថាបានដែរ។
ឈរលើមូលហេតុនេះក្រសួងកសិកម្ម គួរតែចាត់មន្ត្រីជំនាញឲ្យចុះទៅពិនិត្យករណីនេះជាបន្ទាន់ ដើម្បីជួយដោះស្រាយបញ្ហាដង្កូវបំផ្លិចបំផ្លាញស្រូវឲ្យទាន់ពេលវេលា៕
