ប្រទេសតួគី៖នៅព្រឹកថ្ងៃទី២១ ខែតុលា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានជួបសួរសុខទុក្ខសំណេះសំណាលជាមួយក្មួយយុវជន សិស្ស និងនិស្សិតប្រមាណជាង ៦០ នាក់ ដែលកំពុងរស់នៅបន្តការសិក្សានៅប្រទេសតួគី។
សម្តេចតេជោ ហ៊ុនសែនបានឲ្យដឹងថា៖ កម្ពុជាមានកិត្តិយសដែលត្រូវទទួលបានសិទ្ធិក្នុងការរៀបចំធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប (ASEM) លើកទី១៣ នៅឆ្នាំ២០២០ ដែលនេះជាមោទភាពមួយដ៏ធំបំផុត ព្រោះកិច្ចប្រជុំកំពូលនេះនឹងមានជាង៥៣ប្រទេសដែលនឹងត្រូវមកចូលរួមនៅកម្ពុជា។ កន្លងមកកម្ពុជាក៏ធ្លាប់បានធ្វើជាម្ចាស់ផ្ទះនៃកិច្ចប្រជុំអាស៊ាន២ដងរួចទៅហើយគឺនៅឆ្នាំ ២០០២ និង២០១២។ សម្តេចតេជោបានថ្លែងថា ភារកិច្ចចម្បងរបស់រាជរដ្ឋាភិបាលអាណត្តិថ្មី គឺត្រូវរក្សាបាននូវស្ថេរភាពនយោបាយ និងសន្តិភាព ដើម្បីឈានទៅសម្រេចកំណើនសេដ្ឋកិច្ច ៧.២%យូរអង្វែង។
សម្តេចតេជោនាយករដ្ឋមន្ត្រី បានអរគុណដល់កូនក្មួយនិស្សិតរស់ក្រៅប្រទេសដែលបានចូលរួមដំណើរការប្រជាធិបតេយ្យដោយបានទៅបោះឆ្នោតខ្លួនឯងផង និងបានអំពាវនាវអោយក្រុមគ្រួសារទៅបោះឆ្នោតផងដែរ។ ការបោះឆ្នោតជូនគណបក្សប្រជាជនកម្ពុជា គឺជាការជ្រើសរើសដ៏ត្រឹមត្រូវ មានន័យថា ជាការបោះឆ្នោតជ្រើសរើសយកនូវសុខសន្តិភាព ការអភិវឌ្ឍ និងបន្តរក្សានូវកិច្ចខិតខំប្រឹងប្រែងរបស់ជីដូនជីតារបស់ខ្លួនយើងម្នាក់ៗ។
សម្ដេចតេជោនាយករដ្ឋមន្ត្រី ក៏បានផ្តាំផ្ញើឲ្យសិស្សនិស្សិតទាំងអស់ដែលបានទទួលអាហារូបករណ៍មកសិក្សានៅប្រទេសតួគីនេះ គោរពច្បាប់ប្រទេសគេ ហើយត្រូវខិតខំប្រឹងប្រែងរៀនសូត្រ ជាពិសេសខិតខំប្រឹងប្រែងរៀនសូត្រមុខជំនាញ និងភាសាបរទេសឲ្យបានច្រើនភាសា ជាពិសេសភាសាអង់គ្លេស ដែលងាយស្រួលក្នុងការស្វែងរកការងារធ្វើដើម្បីអនាគតរបស់ខ្លួនឯង គ្រួសារ និងប្រទេសជាតិ។
នៅក្នុងឱកាសនេះដែរ ដើម្បីជាការលើកទឹកចិត្តសម្រាប់កូនក្មួយយុវជនសិស្ស និស្សិតទាំងអស់ដែលកំពុងរស់នៅសិក្សារៀនសូត្រនៅក្នុងប្រទេសតួគី សម្ដេចតេជោនាយករដ្ឋមន្ត្រីបានផ្ដល់នូវថវិកាឧបត្ថម្ភដល់និស្សិតទាំង 68 នាក់ ដោយក្នុងម្នាក់ៗទទួលបានថវិកាចំនួន500ដុល្លារ។
សូមបញ្ជាក់ថាកាលពីឆ្នាំ ១៩៩៥ តួគីបានផ្តល់អាហារូបករណ៍ដំបូងឲ្យកម្ពុជាសម្រាប់និស្សិត៤ រូប។ នៅឆ្នាំ ១៩៩៧ មានចំនួន ៤ រូបទៀត ហើយនៅថ្ងៃទី ០៤ ខែមេសា ឆ្នាំ២០១៨ សមាគមនិស្សិតកម្ពុជា-តួគីក៏បានបង្កើតឡើងដោយមានសមាជិកចំនួន៦៨ នាក់ ដែលក្នុងនោះមានថ្នាក់បណ្ឌិត២នាក់, បរិញ្ញាបត្រជាន់ខ្ពស់៧នាក់, បរិញ្ញាបត្រ១៨នាក់, សាសនាអ៊ីស្លាម៣០នាក់ និងវិទ្យាល័យ១១ នាក់។
ក្នុងចំណោមនេះសិស្ស និស្សិតអាហារូបករណ៏រដ្ឋាភិបាលមានចំនួន៣៥ នាក់, អាហារូបករណ៍អង្គការក្រៅរដ្ឋាភិបាលចំនួន ៣០នាក់ និងបង់ថ្លៃ៣នាក់។ និស្សិតដែលបានសិក្សានៅប្រទេសតួគីមានជំនាញដូចជា វិស្វកម្មកុំព្យូទ័រ, រដ្ឋបាលអប់រំ, ទំនាក់ទំនងការបរទេស, សំណង់ស៊ីវិល, គ្រប់គ្រងបុគ្គលិក, ច្បាប់, សេដ្ឋកិច្ច, ទេសចរណ៍, ពេទ្យ, ឱសថ, វិទ្យាសាស្ត្រនយោបាយ, ពាណិជ្ជកម្មអន្តរជាតិ, សុខភាពសាធារណៈ និងសាសនាអ៊ីស្លាម។ប្រភពហ្វេសប៊ុកតេជោ!