ភ្នំពេញ៖ ព្រះចៅអធិការវត្តក្តុល ព្រះនាម មៀច សុវណ្ណ អាយុ៣៦ឆ្នាំ ត្រូវបានកម្លាំងសមត្ថកិច្ចចាបើឃាត់ខ្លួន ពេលក្លែងខ្លួនស្លៀកពាក់ស៊ីវិល ចេញពីវត្តទៅផ្ទះស្រីស្នេហ៍នៅម៉ោងប្រមាណ ២៖៣០នាទីរំលងអាធ្រាត្រ ឈានចូលថ្ងៃទី១៨ ខែកញ្ញា ឆ្នាំ២០១៨នេះ នៅក្នុងភូមិខ្វិត សង្កាត់សាក់សំពៅ ខណ្ឌដង្កោ។
ប្រភពពីសមត្ថកិច្ចឲ្យដឹងថា៖ ចៅអធិការវត្តក្តុលត្រូវប្រជាពលរដ្ឋឃាត់ខ្លួនពេលស្លៀកពាក់ស៊ីវិល(ពាក់អាវយឺតនិងស្លៀកខោជើងខ្លី)ចេញពីវត្ត ដែលមានទីតាំងស្ថិតនៅភូមិពោធិ៍រលំ សង្កាត់សាក់សំពៅ ខណ្ឌដង្កោ រាជធានីភ្នំពេញ នៅផ្ទះឈ្មោះហេង សុខហៀង ភេទស្រី អាយុ២២ឆ្នាំ ស្ថិតផ្លូវបេតុង ស្ថិតនៅភូមិខ្វិត សង្កាត់សាក់សំពៅ ខណ្ឌដង្កោ រាជធានីភ្នំពេញ ចម្ងាយពីវត្តប្រហែល១០០០ម៉ែត្រ ។
បច្ចុប្បន្នសមត្ថកិច្ចសង្កាត់សាក់សំពៅ កំពុង យកព្រះសង្ឃឈ្មោះ មៀច សុវណ្ណ មកស្នាក់បណ្តោះអាសន្ននៅអធិការដ្ឋាននគរបាល ខណ្ឌដង្កោ ដើម្បីការពារ សុវត្ថិភាព និងទុកប្រគល់ អោយការិយាល័យ ធម្មការ និង ចាត់វិធានការតាមវិន័យសង្ឃ។
គួររំលឹកថា ករណីនេះប្រជាពលរដ្ឋប្រហែលជាង២០០នាក់ ធ្លាប់មានការខឹងយ៉ាងខ្លាំង និងផ្ទុះការតវ៉ាជាមួយព្រះចៅអធិការវត្ដកំពុងក្ដុល ពាក់ព័ន្ធករណីចោទប្រកាន់ព្រះចៅអធិការវត្ដកំពុងក្ដុលថា មានប្រពន្ធមានកូន និងប្រើប្រាស់ថ្នាំញៀន ក្រោយពីបែកធ្លាយវីដេអូបង្ហោះតាមបណ្ដាញសង្គមហ្វេសប៊ុក ។
កាលពីវេលាម៉ោង២ រសៀលថ្ងៃទី៣១ ខែសីហា ឆ្នាំ២០១៨កន្លងទៅមានប្រជាពលរដ្ឋដែលរស់នៅក្បែរៗវត្ដកំពុងក្ដុល បានលើកគ្នាមកធ្វើការតវ៉ាពេញនៅក្នុងវត្ដ ។ព្រះចៅអធិការមិនបានចេញមកបកស្រាយបំភ្លឺចំពោះមកប្រជាពលរដ្ឋឡើយ មានតែលោកតាអាចារ្យ ២នាក់ចេញមុខមករេរាំង និង ឲ្យប្រជាពលរដ្ឋផ្ដិតមេដៃ ដើម្បីយកទៅប្រគល់ឲ្យអនុគុណខណ្ឌដង្កោ៕
