តាកែវ ៖ ផ្លូវលំ១ខ្សែប្រវែង៣០០០ម៉ែត្រទទឹង៥ម៉ែត្រដែលតភ្ជាប់ពីកំណាត់ផ្លូវជាតិលេខ៣ត្រង់បង្គោលគីឡូម៉ែត្រលេខ៦៩ពីភ្នំពេញទៅខេត្តកំពត(ផ្សារដំណាក់តាសេក) ចូលទៅវត្តព្រៃជូរ ស្ថិតនៅភូមិព្រៃជួរ ភូមិព្រៃឈើទាល ឃុំពពេល ស្រុកត្រាំកក់ ខេត្តតាកែវ ដែលរងការខួចខាតស្ទើរទាំងស្រុង ត្រូវបាន លោក ថៃ ផានី(ហៅម៉ាប់ដែលគេស្គាល់ថាជាថៅកែសង្វៀនមាន់) និង ភរិយាលោកស្រី ហ៊ុន ចាន់ថុល ក្មួយបង្កើតសម្តេចតេជោ ហ៊ុន សែន នាយករដ្ឋមន្ត្រី មានសទ្ធាជ្រះថ្លាបានលះបង់ថវិកាផ្ទាល់ខ្លួនធ្វើការជួសជុល និងទិញគ្រួសសចាក់ និងឈួសពង្រាបបំពេញផ្លូវឲ្យបានស្អាតឡើងវិញដើម្បីទុកជាប្រយោជន៍ជូនប្រជាពលរដ្ឋធ្វើចរាចរណ៍។
ផ្លូវនេះបានចំណាយដីអស់ចំនួន ១០០ឡានស្មើ៦ម៉ែត្រគូបក្នុង១ឡាន បើគិតជាថវិកាស្មើនឹងចំនួន៖ 10,500,000R (2,625$)។ សម្តេចព្រះហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សង្ឃនាយកនៃព្រះរាជាណាចក្រកម្ពុជា ព្រះអង្គមានទឹកព្រះទ័យ សោមនស្សរីករាយសាទរអំណោយសប្បុរសរបស់ឯកឧត្តម ថៃ ផានី និងលោកជំទាវ ហ៊ុន ចាន់ថុល ដែលបានឆ្លើយតបភ្លាមៗតាមការស្នើរសុំនិងបិណ្ឌបាតពីព្រះគ្រូចៅអធិការវត្ត អាចារ្យ គណៈកម្មការអាជ្ញាធរឃុំ ប្រជាពលរដ្ឋ ក៏ដូចជាព្រះអង្គផ្ទាល់…។
ក្នុងពេលចួលរួមពិនិត្យការជួសជុលផ្លូវកាលពីថ្ងៃទី១២កញ្ញាលោក ទូច ប៉ាវ ប្រធានក្រុមប្រឹក្សាឃុំពពេល តំណាងឲ្យបងប្អូនប្រជាពលរដ្ឋទូទាំងឃុំ បានសម្តែងការដឹងគុណ ចំពោះឯកឧត្តម ថៃ ផានី និងលោកជំទាវ ហ៊ុន ចាន់ថុល លោកតា ហ៊ុន សាន ជាពិសេសក្រុមគ្រួសារសម្តេចតេជោ សែន ដែលតែងតែបានយកចិត្តទុកដាក់ជួយដោះស្រាបញ្ហាជូនបងប្អូនប្រជាពលរដ្ឋគ្រប់មជ្ឈដ្ឋានក្នុងក្របខណ្ឌទូទាំងប្រទេសមិនដែលបណ្តែតបណ្តាយឲ្យបងប្អូនប្រជាពលរដ្ឋរងគ្រោះនោះឡើយ។
