ភ្នំពេញ ៖ សម្តេចនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូកម្ពុជាទៅកាន់ប្រទេសចិន នៅដើមសប្តាហ៍ក្រោយនេះ ដើម្បីចូលរួមពិព័រណ៍ចិន-អាស៊ាន លើកទី១៥ ចាប់ពីថ្ងៃទី១០ ដល់ថ្ងៃទី១២ ខែកញ្ញា។ នេះបើតាមសេចក្តីប្រកាសពតិមានរបស់ក្រសួងការបរទេសកម្ពុជាចុះថ្ងៃទី៧ ខែកញ្ញា នេះ។
ក្រៅពីចូលរួមក្នុងនាមជាភ្ញៀវកិត្តិយស នៃពិធីបើកពិព័រណ៍ចិន-អាស៊ាន លើកទី១៥ ដែលនឹងធ្វើឡើងនៅទីក្រុងណានីងប្រទេសចិន នាយករដ្ឋមន្ត្រីកម្ពុជាអាណត្តិទី៦សម្តេច ហ៊ុន សែន ក៏នឹងមានជំនួបដាច់ដោយឡែក ជាមួយឥស្សរជនចិន អភិបាលខេត្តក្វាងស៊ី និងថ្នាក់ដឹកនាំចិនជាច្រើនរូបទៀត។ ក្រៅពីនោះ សម្តេចតេជោ ហ៊ុន សែន រួមជាមួយនឹងឧបនាយករដ្ឋមន្ត្រីចិន លោក ហាន់ ចឹង (Han Zheng) នឹងអញ្ជើញធ្វើជាអធិបតីរួមគ្នា ក្នុងពិធីកាត់ខ្សែបូ សម្ពោធព្រះពន្លាជាតិកម្ពុជា រួមទាំងអញ្ជើញទស្សនាសាលពិព័រណ៍ពាណិជ្ជកម្មកម្ពុជាផងដែរ។
បើតាមសេចក្តីប្រកាសដដែល ប្រមុខរដ្ឋាភិបាលកម្ពុជា លោក ហ៊ុន សែន ក៏ត្រូវបានផ្តល់ឱកាស ឲ្យឡើងថ្លែងសុន្ទរកថាគន្លឹះ នៅពិធីបើកពិព័រណ៍ចិន-អាស៊ានលើកទី១៥ ក្នុងគោលបំណងដើម្បីលើកស្ទួយពាណិជ្ជកម្ម និងការវិនិយោគរវាងអាស៊ាននិងចិន រួមទាំងការទាក់ទាញវិនិយោគិន និងភ្ញៀវទេសចរចិន ដែលមានសក្តានុពល មកកាន់តំបន់អាស៊ានថែមទៀត។ សូមបញ្ជាក់ថា គណៈប្រតិភូជាន់ខ្ពស់កម្ពុជា ដែលនឹងអមដំណើរលោកនាយករដ្ឋមន្ត្រីហ៊ុន សែន ទៅកាន់ប្រទេសចិននេះ រួមមាន លោកឧបនាយករដ្ឋមន្ត្រី ហោ ណាំហុង, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ថោង ខុន រដ្ឋមន្ត្រីក្រសួងទេសចរណ៍កម្ពុជាជាដើម។
អ្វីជាការកត់សំគាល់ នេះគឺជាដំណើរចេញទៅក្រៅប្រទេសលើកទី១របស់លោកនាយករដ្ឋមន្ត្រី ហ៊ុន សែន បន្ទាប់ពីលោកត្រូវបានរដ្ឋសភាជាតិបោះឆ្នោតផ្តល់សេចក្តីទុកចិត្ត ឲ្យធ្វើជានាយករដ្ឋមន្ត្រីកម្ពុជាសម្រាប់អាណត្តិទី៦ តាមរយៈកិច្ចប្រជុំលើកទី១ នីតិកាលទី៦ កាលពីថ្ងៃទី៦ កញ្ញា។
បន្ទាប់ពីដំណើរទស្សនកិច្ចទៅកាន់ប្រទេសចិនដែលជានិច្ចកាលាប្រកាសគាំទ្ររាជរដ្ឋាភិបាលកម្ពុជា សម្តេចតេជោ ក៏បានប្រកាសពីគម្រោងធ្វើដំណើរទៅកាន់សហរដ្ឋអាមេរិក ដើម្បីចូលរួមកិច្ចប្រជុំមហាសន្និបាតអង្គការសហប្រជាជាតិ និងកិច្ចប្រជុំមួយចំនួនទៀត នៅក្នុងប្រទេសអឺរ៉ុប ចាប់ពីអំឡុងខែកញ្ញា និងខែតុលាខាងមុខនេះ ។សូមបញ្ជាក់ដែរថា៖ប្រទេសលោកខាងលិច ដូចជា សហរដ្ឋអាមេរិក កាណាដា អូស្ត្រាលី បារាំង អាឡឺម៉ង់ អង់គ្លេស ស៊ុយអេត និងសហភាពអឺរុប នៅមិនទាន់បានបង្ហាញជំហរផ្លូវការជុំវិញលទ្ធផលនៃការបោះឆ្នោតនៅកម្ពុជានិងការបង្កើតរាជរដ្ឋាភិបាលកម្ពុជាថ្មីអាណត្តិទី៦នេះនៅឡើយ៕
