ភ្នំពេញ៖ កាលពីព្រឹកថ្ងៃទី០១ កញ្ញាម្សិលមិញនេះ លោក ឃួង ស្រេង អភិបាលរាជធានីភ្នំពេញបានរួមជាមួយអាជ្ញាធរមូលដ្ឋាន និងមន្ត្រីជំនាញចុះពិនិត្យមើលស្ថានភាព ផ្លូវលេខ ១២៣CC ស្ថិតនៅក្នុងភូមិថ្មគោលទី២ សង្កាត់ចោមចៅទី២ និងបានបន្តដំណើរចុះសួរសុខទុក្ខ និងពិនិត្យមើលការដឹកទឹកម៉ាស៊ីនចែកចាយជូនប្រជាពលរដ្ឋនៅភូមិទួលកី សង្កាត់ភ្លើងឆេះរទេះខណ្ឌពោធិ៍សែនជ័យ ។
ជាលទ្ធផលលោកឃួងស្រេងបាន សមរេចសាងសង់ផ្លូវ១២៣CC ជាផ្លូវ បេតុងមានប្រវែង ៩៧០ម៉ែត្រ និងទទឹងប្រវែង ៦ម៉ែត្រចាប់ពីពេលនេះ និងរៀបចំប្រព័ន្ធលូជូនប្រជាពលរដ្ឋ ដោយដាក់គ្រឿងចក្រធ្វើភ្លាមៗហ្ម៉ង។ រីឯការខ្វះទឹកប្រើប្រាស់នៅភូមិចំនួន៨ របស់សង្កាត់ភ្លើងឆេះរទេះ អាជ្ញាធរវិញលោកអភិបាលក្រុងនឹងបន្ថែមរថយន្តដឹកទឹកនេះបន្ថែមទៀត ពោលគឺទាំង៨ភូមិដែលមិនទាន់មានទឹកម៉ាស៊ីនប្រើប្រាស់ អាច១ភូមិមានរថយន្តដឹកទឹក១គ្រឿង ដើម្បីដឹកទឹកចែកចាយឱ្យទាន់ចិត្តប្រជាពលរដ្ឋ ទម្រាំមានទឹកស្អាតរៀបចំចូលដល់ភូមិ ៕
