រតនគិរី៖ កម្លាំងនគរបាលក្រុងបានលុងចុះធ្វើការឆែកឆេរផ្ទះជួលមួយកន្លែង ស្ថិតក្នុងភូមិអូរមៀត សង្កាត់ឡាបានសៀក ក្រុងបានលុង ហើយបានរឹបអូសទូរហ្គេមបាញ់ត្រី ចំនួន ២គ្រឿង និងនាំខ្លួនមនុស្សប្រុសស្រី ចំនួន ៥នាក់ មកអធិការរដ្ឋាននគរបាលក្រុងបានលុង។
ករណីឆែកឆេរបង្ក្រាបទូរហ្គេមបាញ់ត្រីខាងលើនេះ បានធ្វើឡើងនៅវេលាម៉ោង១០នឹង៣០នាទី ថ្ងៃទី២៣ ខែសីហា ឆ្នាំ២០១៨ ស្ថិតក្នុងភូមិអូររមៀត សង្កាត់ឡាបានសៀក ក្រុងបានលុង ដោយកម្លាំងនគរបាលអធិការក្រុងបានលុង ដឹកនាំបញ្ជាពីលោកវរសេនីយ៍ឯក ហួត បូរី អធិការនគរបាលក្រុងបានលុង ក្រោមការសម្របសម្រួល ពីលោក រ៉ា បូររ៉ាន់ឌី ព្រះរាជអាជ្ញារងអមសាលាដំបូងខេត្ត។
លោកវរសេនីយ៍ឯក ហួត បូរី អធិការនគរបាលក្រុងបានលុង បានឲ្យដឹងថា មុននិងឈានដល់ការចុះឆែកឆេរ រឹបអូសបានវត្ថុតាង និងមនុស្សខាងលើនេះ គឺលោកទទួលបានសេចក្ដីរាយការណ៍ពីឪពុកម្ដាយ របស់ក្មេងដែលតែងតែទៅលេងហ្គេមនោះ ហើយលោកក៏បានដាក់កម្លាំងចុះស៊ើបស្រាវជ្រាវរយៈពេល២-៣ថ្ងៃមកហើយ ទើបឈានដល់ការឆែកឆេរ រកឃើញនិងរឹបអូសទូរហ្គេម ព្រមទាំងមនុស្សប្រុសស្រី ចំនួន៥នាក់រួមមាន ទី១.ឈ្មោះ អ៊ឹង សម្រេច ភេទប្រុស អាយុ ២១ឆ្នាំ ជនជាតិខ្មែរ (អ្នកបើកហ្គេម) ទី២.ឈ្មោះ អឿន ស្រីណែត អាយុ ១៩ឆ្មាំ ជនជាតិខ្មែរ មុខរបរមេផ្ទះ ទី៣.ឈ្មោះ ឡេង ប៊ុនឡុង ភេទប្រុស អាយុ ២០ឆ្នាំ ជនជាតិខ្មែរ ជានិស្សិត ពិនិត្យទឹកនោមឃើញមានសារធាតុញៀន អ្នកទាំង៣នាក់ មានលំនៅភូមិអូរមៀត សង្កាត់ឡាបានសៀក ក្រុងបានលុង។
ទី៤.ឈ្មោះ ថាត បូរ៉ា ភេទប្រុស អាយុ ២១ឆ្នាំ ជនជាតិខ្មែរ មុខរបរមិនពិតប្រាកដ ទី៥.ឈ្មោះ ស្លេះ ពុធគ្រី ភេទប្រុស អាយុ ១៩ឆ្នាំ ជនជាតិខ្មែរអ៊ីស្លាម មុខរបរ ជាងផ្សាដែក អ្នកទាំង២នាក់ មានលំនៅភូមិថ្មី សង្កាត់ឡាបានសៀក ក្រុងបានលុង។
ក្នុងនោះដែរ សមត្ថកិច្ចបានដកហូតទូហ្គេមបាញ់ត្រីចំនួន២គ្រឿង យកមករក្សាទុកនៅអធិការក្រុងបានលុង។
លោកថា អ្នកទាំង ៣នាក់ដែលធ្វើតេសទឹកនោមជាប់ពាក់ព័ន្ធនូវសារធាតុញៀន ត្រូវបានកសាងសំណុំរឿងបញ្ជូនទៅអយ្យការសាលាដំបូងខេត្ត។
ដោយឡែក ២នាក់ទៀត ជាអ្នកលេងហ្គេមបាញ់ត្រីនោះ មិនជាប់ពាក់ព័ន្ធនូវសារធាតុញៀន គឺសមត្ថកិច្ច បានធ្វើការអប់រំ នឹងណែនាំ ធ្វើកិច្ចសន្យា ហើយឲ្យវិលត្រឡប់ទៅផ្ទះវិញផងដែរ៕
ដោយ ៖ ចាប សំអាន