ក្រចេះ៖ អភិបាលនៃគណៈអភិបាលខេត្តក្រចេះ ឯកឧត្តម វ៉ា ថន បានអញ្ជើញចុះជួបសំណេះសំណាលជាមួយបងប្អូនប្រជាពលរដ្ឋដែលរងគ្រោះ ដោយសារពុលស្រាស និងអ្នកជំងឺទូរទៅ ជាពិសេស ស្ត្រីទើបសម្រាលកូនរួច សរុបប្រមាណជា 36នាក់ នៅមន្ទីរពេទ្យបង្អែកស្រុកស្នួល នារសៀលថ្ងៃទី16 ខែកក្កដា ឆ្នាំ 2018។
នៅក្នុងឱកាសនេះដែរឯកឧត្តមអភិបាលខេត្ត ក៏បានពាំនាំនូវប្រសាសន៍សួរសុខទុក្ខពីសំណាក់សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធិបណ្ឌិត ប៊ុន រ៉ានីហ៊ុន សែន ដែលជានិច្ចកាល សម្ដេចទាំង 2 តែងតែគិតគូរយកចិត្តទុក្ខដាក់ខ្ពស់ចំពោះសុខទុក្ខ ជីវភាព និងការរស់នៅប្រចាំថ្ងៃរបស់បងប្អូនប្រជាពលរដ្ឋ ដោយមិនប្រកាន់នូវនិន្នាកា នយោបាយនៅឡើយ។
មានប្រសាសន៍ទៅកាន់បងប្អូនប្រជាពលរដ្ឋដែលកំពុងសម្រាកព្យាបាល អភិបាលខេត្តក្រចេះ ឯកឧត្តម វ៉ា ថន បានអំពាវនាវដល់ប្រជាពលរដ្ឋពេលត្រឡប់ទៅលំនៅឋានវិញ សុំឲ្យផ្អាកការទទួលទានស្រាស បណ្ដោះអាសន្នមួយរយៈសិន ដើម្បីសុខភាពបងប្អូនប្រជាពរដ្ឋទាំងអស់គ្នា និងសូមជួយផ្សព្វផ្សាយដល់បងប្អូនប្រជាពរដ្ឋ ដទៃទៀត មុនពិសារស្រាស ត្រូវឲ្យមានប្រភពច្បាស់លាស់ ជៀសវាងធ្វើឲ្យប៉ះពាល់ដល់សុខភាព ខាតបង់ពេលវេលា និងទ្រព្យសម្បត្តិ។
ឯកឧត្តមអភិបាលខេត្ត ក៏បាននាំយកនូវអំណោយ មួយចំនួនជូនដល់ ជនរងគ្រោះដោយសារពុលស្រា និងមានជំងឺទូទៅ ជាពិសេសស្ត្រីដែលទើបសម្រាលកូនរួចសរុប 36នាក់។ ជាមួយគ្នានោះដែរ ឯកឧត្តម ក៏បានលើកទឹកចិត្តដល់ស្ត្រីមានផ្ទៃពោះ ដោយ ឯកឧត្តមបានលើកឡើងថានៅឆ្នាំ 2019 ក្នុងគោលនយោបាយក៏ដូចជាការប្ដេជ្ញាចិត្តរបស់គណបក្សប្រជាជនកម្ពុជានៅក្នុងឆ្នាំ 2019គឺបញ្ចុះថ្លៃភ្លើងឲ្យនៅត្រឹម 610រៀលក្នុងមួយគីឡូដែលបច្ចុប្បន្ននេះភ្លើងភ្លើងមានតម្លៃ750 រៀល ដែលជាការរួមចំណែកដល់ជីវភាពរស់នៅរបស់បងប្អូនប្រជាពលរដ្ឋ ។
ព្រមទាំងមានការផ្ដល់ឱ្យប្រជាពលរដ្ឋដែលមានប័ណ្ណក្រីក្រទទួលការព្យាបាលដោយមិនយកលុយ មិនតែប៉ុណ្ណោះក៏មានការថែមលុយចំនួន 4ម៉ឺនរៀលសម្រាប់ការពិនិត្យផ្ទៃពោះម្ដង សម្រាប់ពេលឆ្លងទន្លេមួយចំនួន20 ម៉ឺនរៀល ពេលឆ្លងទន្លេរួចយកទៅបន្តក់ថ្នាំចំនួន10 លើកក្នុងមួយលើកផ្តល់ជូនចំនួន 4 ម៉ឺនរៀល សរុបចំនួន76ម៉ឺនរៀល។
សូមគូសបញ្ជាក់ដែរថាចាប់តាំងពីឯកឧត្តមវ៉ាថនឡើងកាន់តំណែងជាអភិបាលខេត្តក្រចេះ លោកបានយកចិត្តទុក្ខដាក់ចំពោះសុខទុក្ខប្រជាពលរដ្ឋនៅក្នុងមូលដ្ឋានទូទាំងខេត្តក្រចេះ ជាពិសេស នៅក្នុងខែឧសភា គឺមានការផ្ទុះបាតុភាព ពុលស្រាស ដែលមានប្រជាពលរដ្ឋ ប្រមាណជា 13 នាក់ និងជាង 200នាក់ដែលរងគ្រោះនៅក្នុងហេតុការណ៍នោះ នៅស្រុកចិត្របុរីកន្លងទៅ មិនបានចូលរួមបរិច្ចាគនូវថវិកាផ្ទាល់ខ្លួនមួយចំនួនជូនដល់កាកបាទក្រហមកម្ពុជា និងបានជួយសង្គ្រោះដល់ប្រជាពលរដ្ឋដែលងាយរងគ្រោះដទៃទៀតនាពេលកន្លងទៅថ្មីៗនេះ៕
ដោយ ម៉ែន បូរិទ្ធ
