ភ្នំពេញ៖ នៅវេលាម៉ោងជាង៩ព្រឹក ថ្ងៃពុធ ទី៤ ខែកក្កដា ឆ្នាំ២០១៨នេះ ពលការិនី កែន ចន្ថា ដែលចាញ់បោកមេខ្យល់ ទៅធ្វើការតាមផ្ទះនៅប្រទេស អារ៉ាប៊ីសាអូឌីតអស់រយៈពេល៤ឆ្នាំ ដោយគ្មានប្រាក់បៀវត្ស និងរងការធ្វើទុក្ខបុកម្មេញពីសំណាក់ថៅកែ ត្រូវបានសង្គ្រោះឲ្យត្រឡប់មកកម្ពុជាវិញហើយកាលពីម៉ោង៩ព្រឹកថ្ងៃទី៤កក្កដាឆ្នាំ២០១៨។ នេះបើតាមលោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ឲ្យកាសែតដឹង។
លោក អូស្មាន ហាស្សាន់ ឲ្យដឹងទៀតថា “នេះជានារីរងគ្រោះទី៤ហើយ ដែលខ្ញុំបានដោះស្រាយឲ្យបានវិលត្រឡប់មកកម្ពុជាវិញ នោះដោយសារតែនៅប្រទេសអារ៉ាប់នោះ មិនទាន់មានស្ថានទូត ឬស្ថានកុងស៊ុល រាល់ការដោះស្រាយបញ្ហាម្ដងៗ មានការលំបាក យឺតយ៉ាវ ដែលលើកទី១ ខ្ញុំបានសហការនឹងទូតយើងប្រចាំនៅគុយវ៉ែតផង អេហ្ស៊ីបផង ឯលើកទី2,3,4 សហការនឹងទូតយើង ប្រចាំនៅអេហ្ស៊ីប។ ការត្រឡប់មកវិញនេះ ពលការិនីមិនទទួលបាន ប្រាក់ខែពីថៅកែទី១នោះទេ តែបានពីថៅកែទី២” ។
ការផ្តល់កិច្ចអន្តរាគមន៍នេះ ឆ្លើយតបនឹងការទទូចស្នើសុំជំនួយពីពលការិនីខាងលើ នៅលើបណ្តាញសង្គមហ្វេសបប៊ុក ដែលបានរៀបរាប់ពីដំណើរដើមទងនៃការដែលខ្លួនត្រូវបានចាញ់បោកមេខ្យល់ មកធ្វើជាពលការិនីបម្រើការងារផ្ទះនៅ អារ៉ាប៊ី សាអូឌីត ដោយរងការកេងប្រវ័ញ្ចកម្លាំងពលកម្ម ការធ្វើទុក្ខបុកម្នេញពីថៅកែ និងការមិនផ្តល់ប្រាក់បៀវត្សជាដើម។សូមបញ្ជាក់ដែរថារាជរដ្ឋាភិបាលបានបណ្តេញលោកអះម៉ាត់យ៉ះយ៉ាចេញពីរដ្ឋលេខាធិការក្រសួងសង្គមកិច្ចចោលដោយសារជាប់ពាក់ពន្ធ័ក្នុងការនាំពលករទៅធ្វើការនៅប្រទេសខាងលើហើយមិនរវីរវល់បណ្តាលឲ្យនាងរងទុក្ខអស់ជាច្រើនឆ្នាំ៕