ភ្នំពេញ៖ នៅចំណុចការដ្ឋានសំណង់អគារខុនដូ Mekong View Tower 6 ស្ថិតក្នុងភូមិ២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញថ្ងៃអាទិត្យ ទី១ ខែកក្កដា ឆ្នាំ២០១៨ កម្មក២នាក់បានស្លាប់ភ្លាមៗ និង៥នាក់ផ្សេងទៀត រងរបួសធ្ងន់ស្រាល ដោយករណីបាក់បេតុងប្លង់សេនៅជាន់ទី២៣ ។ ជនរងគ្រោះចំនួន៥នាក់ ត្រូវបានបញ្ជូនទៅសង្គ្រោះបន្ទាន់ភ្លាមៗ តែមនុស្ស២នាក់ បានបាត់ខ្លួនរកមិនឃើញ។
ជនរងគ្រោះ ដែលរងរបួសទាំង៥ រួមមាន ទី១.ជាង នឿន របួសជើង, ទី២.ជាង ផាត របួសជើង, ទី៣.ជាង រិទ្ធ របួសស្មា, ទី៤.ស្រី លន ភេទស្រី របួសស្មា និងទី៥.ស្រី របួសកែងដៃ។
ដោយឡែក ជនរងគ្រោះ២នាក់ផ្សេងទៀត ដែល រកឃើញសាកសព មានឈ្មោះ ទី១ឈ្មោះ បាន លាស់ ភេទប្រុស អាយុ៤៨ឆ្នាំ រស់នៅភូមិតាពុំ ឃុំល្វេ ស្រុកកោះសូទិន ខេត្តកំពង់ចាម និងទី២ឈ្មោះ នាម ហ៊ីង ភេទប្រុស អាយុ៣៨ឆ្នាំ រស់នៅភូមិគោករុន ឃុំប៉ុបប៉ែន ខេត្តសៀមរាប។
ថ្ងៃកើតហេតុខាងលើ ក្រុមជាងប្រមាណជាង១០នាក់ បាននាំគ្នាចាក់ប្លង់សេនៅជាន់ទី២៣ ប៉ុន្តែមិនទាន់បញ្ចប់នោះទេ។ លុះវេលារសៀល ក៏បន្តបាញ់បេតុងចាក់ប្លង់សេបន្តទៀត ស្រាប់តែបាក់រន្ទារធ្លាក់ប្លង់សេសង្កត់ក្រុមកម្មករ និងជាង បណ្ដាលឲ្យរងរបួស៥នាក់ និងបាត់ខ្លួន២នាក់ ដោយជាប់នៅក្រោមប្លង់សេនោះតែម្ដង។
អាជ្ញាធរមានសមត្ថកិច្ច មានទាំងអភិបាលក្រុងភ្នំពេញ លោក ឃួង ស្រេង និងចៅហ្វាយខណ្ឌជ្រោយចង្វារ លោក ឃ្លាំង ហួត រួមនឹងមន្ត្រីតុលាការ បានចុះទៅពិនិត្យកន្លែងកើតហេតុផងដែរ ហើយក្រុមជាងបាននាំគ្នាដាប់គាស់បេតុង ដើម្បីរុករកជាងដែលបាត់ខ្លួននោះអស់ជាច្រើនម៉ោង រហូតដល់ម៉ោងប្រមាណ១០យប់ថ្ងៃដដែល ទើបរកឃើញសាកសពជនរងគ្រោះ។មិនទាន់ដឹងថាម្ចាស់ការដ្ឋានសងប៉ុន្មានដល់អ្នកស្លាប់នោះទេព្រោះវាជាការទទួលខុសត្រូវ!៕