ខេត្តស្ទឹងត្រែង៖ បុរស៣នាក់ត្រូវបានចាប់ខ្លួនជាមួយ និងទម្ងន់គ្រឿងញៀន១២០គីឡូក្រាម នៅច្រកទ្វារអន្តរជាតិត្រពាំងគ្រៀលព្រំដែនកម្ពុជា-ឡាវ ក្នុងខេត្តស្ទឹងត្រែង នៅរសៀលថ្ងៃទី២៦ ខែមីថុនា ឆ្នាំ២០១៨ ខណៈក្រុមឈ្មួញដឹកចេញពីប្រទេសឡាវចូលមកក្នុងប្រទេសកម្ពុជា តាមរយរថយន្តក្រុងដឹកអ្នកដំណើរ «សូរិយា» ។
មន្ត្រីច្រកទ្វារអន្តរជាតិត្រពាំងគ្រៀល ក្រុងស្ទឹងត្រែង ឲ្យដឹងថា ថ្នាំញៀនចំនួន១២០ដុំ ជាប្រភេទ
ម៉ាកទឹកកក គឺក្នុងមួយដុំ ទម្ងន់ប្រហែលជា១គីឡូក្រាម ត្រូវបានរកឃើញលើរថយន្តក្រុងដឹកអ្នកដំណើរ «សូរិយា» ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3C-2671 ខណៈកំពុងធ្វើដំណើរចេញពីច្រកទ្វារអន្តរជាតិ និងបន្តគោលដៅទៅរាជធានីភ្នំពេញ ។
មនុស្សប្រុស៣នាក់ សង្ស័យពាក់ព័ន្ធក្នុងករណីនេះ គឺតៃកុងរថយន្ត, អ្នកបកប្រែភាសា និងជនសង្ស័យជាម្ចាស់ថ្នាំញៀនត្រូវបានចាប់ខ្លួន។ជួនគ្នានេះដែរនៅភ្នំពេញអាជ្ញាធរជាតិប្រយុទ្ធប្រឆាំង គ្រឿងញៀនដុតបំផ្លាញ គ្រឿងញៀនចំនួន៦៤ គីឡូដែលមានតម្លៃប្រមាណជាង ២លានដុល្លារ ។
សម្ដេចតេជោ ហ៊ុន សែនប្រមុខរាជរដ្ឋាភិបាលកម្ពុជាបានប្រាប់ពីមូលហេតុគ្រឿងញៀនចូលស្រុកខ្មែរដោយសារ កម្ពុជានៅជិតតំបន់ត្រីកោណមាស និងអឌ្ឍច័ន្ទមាសផងនោះ ទើបធ្វើឲ្យក្រុមឧក្រិដ្ឋជន និងបណ្ដាញរបស់ពួកគេនៅតែបន្ដ ព្យាយាមលួចលាក់ចរាចរឆ្លងកាត់ និងចូលមកកម្ពុជា នូវគ្រឿងញៀន និងសារធាតុប៉ះពាល់ ប្រព័ន្ធប្រសាទប្រភេទថ្មី ។
ក្នុងសារលិខិតចូលរួម ប្រារព្ធទិវាអន្ដរជាតិប្រយុទ្ធ ប្រឆាំងគ្រឿង នៅថ្ងៃទី២៦ មិថុនាញៀន របស់សម្ដេចតេជោ ហ៊ុន សែន បានពន្យល់ថា “ទោះបីជាកម្ពុជាបានយកចិត្តទុកដាក់ និងខិតខំប្រឹងប្រែង ដោះស្រាយបញ្ហាគ្រឿងញៀន រហូតទទួលបានលទ្ធផល ជាច្រើនគួរជាទីមោទនៈ យ៉ាងណាក៏ដោយ ក៏ប៉ុន្ដែដោយសារនិន្នាការថ្មីៗនៃបញ្ហា គ្រឿងញៀន នៅលើពិភពលោក និងនៅក្នុងតំបន់ក៏ដូចជា ដោយសារស្ថានភាព ភូមិសាស្ដ្ររបស់ប្រទេសកម្ពុជា នៅជិតតំបន់ត្រីកោណមាស និងអឌ្ឍច័ន្ទ មាសផងនោះ ធ្វើឲ្យក្រុមឧក្រិដ្ឋជន និងបណ្ដាញរបស់ពួកវានៅតែបន្ដ ព្យាយាមលួចលាក់ចរាចរឆ្លងកាត់ និងចូលមកកម្ពុជានូវ គ្រឿងញៀនខុសច្បាប់ និងសារធាតុប៉ះពាល់ប្រព័ន្ធប្រសាទ ប្រភេទថ្មី” ៕
