ខេត្តមណ្ឌលគិរី ៖ បន្ទាប់ពីសារពតិមានយើងបានផ្សាយអំពីសកម្មភាពឈ្មួញលួចកាប់បំផ្លាញ អារ ផ្តួលរលំឈើដោយខុសច្បាប់នៅចំណុចភូមិរវ៉ាក់ ឃុំរយ៉ ស្រុកកោះញែក ខេត្តមណ្ឌលគិរីរួចមកមានសេចក្តីរាយការណ៍ថា៖មានកម្លាំងជំនាញបរិស្ថានខេត្តចុះទៅដល់ទីតាំងឈានដល់បង្ក្រាបចាប់យកឈើជាច្រើនកំណាត់នៅជិតៗនិងក្រុមហ៊ុនយូនីសហ្គ្រីនហើយ។
ប្រជាជនក្នុងសហគមន៍ជនជាតិដើមរស់នៅភូមិរវ៉ាក់ ឃុំរយ៉
ស្រុកកោះញែក ខេត្តមណ្ឌលគិរី បានអោយដឹងថា៖ សកម្មភាពកាប់បំផ្លាញឈើនៅតំបន់ព្រៃសហគមន៍ជនជាតិដើមខងលើ គឺមានឧកញ៉ាចំនួន៣រូបជាអ្នកនៅពីក្រោយដោយយកក្រុមហ៊ុនយូនីសហ្គ្រីនធ្វើជាបង្អែកបន្លំ ។
ប៉ុន្តែករណីនេះត្រូវបានបែកការណ៍ ដោយសារតែ ដីព្រៃសម្បទានរបស់ក្រុមហ៊ុនយូនីសហ្គ្រីនអស់ឈើ ហើយ ។ ផ្ទុយទៅវិញឈើប្រមាណជាង៩០ភាគរយ គឺជាឈើកាប់ថ្មីៗ ទាំងអារ ជាជ្រុង ជាឡាំង និងជាប្រភេទឈើមូលនេះជាដើម។
បើទោះជាសមត្ថកិច្ចជំនាញមិនទាន់បញ្ជាក់ពីអត្តសញ្ញាណច្បាស់ពីម្ចាស់ឈើខុសច្បាប់នេះ ឬក៏នឹងអាចដាក់របាយការណ៍ត្រឹមជាឈើ អញ្ញត្តិជនក៏ដោយ ក៏ប្រភពច្បាស់លាស់ពីអ្នករកស៊ីឲ្យដឹងថា៖ ឈើជាច្រើនកំណាត់ដែលមន្ទីរបរិស្ថានខេត្តចុះចាប់នោះទាំងនោះជាឈើរបស់ឧកញ៉ា លាង ចាន់មុនី ដែលអ្នកមណ្ឌលគិរី និយមហៅថា៖ (ឧកញ៉ាមុនីៗ)ព្រោះប៉ុន្មានខែមុននេះមានឧកញ៉ា៣រូប(មានស្ត្រីម្នាក់)បានទៅជួបថៅកែវៀតណាម ។
លោក កែវ សុភ័ក្ត្រ ប្រធានមន្ទីរបរិស្ថានខេត្តមណ្ឌលគិរី បានប្រាប់អង្គភាព«នគរដ្រេហ្គន»តាមទូរស័ព្ទនាព្រឹកថ្ងៃទី១៥ ខែមិថុនា ឆ្នាំ២០១៨ថា៖ ឈើដែលចាប់នេះមិនទាន់ដឹងចំនួនប៉ុន្មានពិតប្រាកដនៅឡើយ ខណះឈើទាំងនោះត្រូវបានគេដាក់រាយប៉ាយជិតៗក្រុមហ៊ុន គំនរឈើខ្លះឆ្ងាយពីទីតាំងក្រុមហ៊ុនក្នុងចំងាយដីពី១០០ម៉ែត្រ ឬ៣០០ទៅ៤០០ម៉ែត្រ។ លោកបន្តថា៖ និយាយរួមកំលាំងរបស់លោក ពិបាកចូលដឹក ដោយស្ថានភាពផ្លូវលំបាក ភ្លៀងធ្លាក់ ហើយបើជួលឡានអ្នកភូមិក៏គាត់មិនព្រមជួលអោយ ដូច្នេះយើងខ្វះមធ្យោបាយដឹកជញ្ជូនឈើចេញ។
លោកប្រធានមន្ទីរបញ្ជាក់ថា៖ ជាក់ស្តែងមកទល់ថ្ងៃទី១៥ ខែមិថុនា ឆ្នាំ២០១៨នេះ ខាងកម្លាំងលោកទើបដឹកបាន៥ឡាននៅឡើយទេ និងព្យាយាមប្រមូលឈើទាំងនេះបន្ត ។ ករណីបង្ក្រាបឈើ(ឧកញ៉ា លាង ចាន់មុនី )ភស្តុតាងថាចាប់យកប្រមាណជាង៥០០កំណាត់ ។ តែមានពតិមានថា កំពុងឋិតក្នុងការសម្របសម្រួលគ្នាអោយដាក់ចំនួនតិចជាងនេះ?!៕
