កោះកុង៖ ចិនកំពុងតែសាងសង់កំពង់ផែមួយ អាកាសយានដ្ឋានមួយ និងទីក្រុងរណបមួយលើដីកម្ពុជាទំហំ៤៥០០០ហិកតា នៅក្នុងស្រុកគិរីសាគរខេត្តកោះកុង។សមាគមសំណង់កម្ពុជាបានប៉ាន់ស្មានថា គម្រោងដែលហៅថា «គម្រោងសាកល្បង» ដែលមានតម្លៃជាទឹកប្រាក់សរុប៣៨០០លានដុល្លារ និងអាកាសយានដ្ឋានដែលនឹងត្រូវបានសាងសង់ នឹងត្រូវទទួលស្វាគមន៍ភ្ញៀវប្រមាណ១០លាននាក់ក្នុងមួយឆ្នាំ។
រមណីយដ្ឋានទេសចរណ៍ដ៏ស្រស់ត្រកាលដែលគេស្គាល់ថា តារាសាគរ គឺជាគម្រោងមួយនាំមកនូវវត្តមានប្រជាជនចិនមកស្នាក់នៅដែលនឹងក្លាយជាទីក្រុងចិន(China Town)នៅថ្ងៃណាមួយ។ កាលពីឆ្នាំ២០០៨ ក្រុមហ៊ុនអភិវឌ្ឍន៍ Tianjin Union របស់ចិន ដែលហៅកាត់ថា UDG ត្រូវបានផ្តល់សម្បទានចំនួន៩៩ឆ្នាំលើផ្ទៃដីប្រមាណ២០%នៃតំបន់ឆ្នេរសមុទ្ររបស់កម្ពុជាក្នុងទឹកប្រាក់ត្រឹមតែ៣០ដុល្លារក្នុងមួយហិកតាប៉ុណ្ណោះ។
ដីដែលដាក់ជួលឲ្យចិនមានទំហំបីដងធំជាងទំហំដីដែលអនុញ្ញាតឲ្យធ្វើសម្បទានក្រោមច្បាប់ភូមិបាល ដែលកម្រិតត្រឹមតែ១០០០០ហិកតាប៉ុណ្ណោះ?។
ដីសម្បទាននេះក៏រួមបញ្ចូលទាំងដីដែលកាលពីមុនត្រូវបានការពារមិនឲ្យអភិវឌ្ឍក្នុងឧទ្យានជាតិបុទ្ទមសាគរផងដែរ ប៉ុន្តែក្រោយមកត្រូវបានអនុញ្ញាតឲ្យឯកជនទិញបានដោយសារតែអនុក្រឹត្យមួយ។
