រតនគិរី ៖ ភ្លៀងមួយមេលាយឡំខ្យល់និងរន្ទះ បានបាញ់សត្វគោងាប់ប្រាំមួយក្បាលរបស់ជនជាតិគ្រឹង នៅភូមិចាអ៊ុងកេតជុំចាអ៊ុង ស្រុកអូរជុំ ។ ហេតុការណ៏នេះបានកើតឡើងកាលពីវេលាម៉ោងជាង ១០ យប់ថ្ងៃទី ៣០ ខែឧសភា ឆ្នាំ២០១៨។
លោក នី ណុល ភេទប្រុសអាយុ៤៨ឆ្នាំ ជនជាតិគ្រឹង មានទីលំនៅភូមិឃុំខាងលើ និងជាម្ចាស់គោងាប់នោះបានប្រាប់ឱ្យដឹងថា នៅវេលាជាង១០យប់ថ្ងៃទី៣០ខែឧសភា ភ្លៀងបានធ្លាក់មួយមេធំដោយលាយឡំខ្យល់កន្ទ្រាក់ ពេលនោះ ស្រាប់តែមានរន្ទះបាញ់ដើមស្វាយចន្ទី បណ្ដាលឱ្យគោដែលគាត់ចងឱ្យដេកនៅខាងក្រោមដើមស្វាយនោះងាប់ចំនួនប្រាំមួយក្បាល។
ម្ចាស់គោរូបនោះបានបន្ដឱ្យដឹងទៀតថា គោប្រាំមួយក្បាលដែលរន្ទះបាញ់ងាប់នោះ មានឈ្មូលចំនួនបួនក្បាលនិងញីចំនួនពីរក្បាល ។ គាត់សម្រេចលក់គោងាប់នោះឱ្យទៅកុងស៊ីចំនួនបីក្បាល ក្នុងតម្លៃជិតមួយលានរៀល ។ ម្ចាស់គោថា គ្រួសារគាត់បានចិញ្ចឹមសត្វគោដល់ទៅ២២ក្បាលគឺទុកសម្រាប់លក់។
លោក ពៀន សុវណ្ណ មេប៉ុស្ដិប៉ូលិសរដ្ឋបាលឃុំចាអ៊ុងបានប្រាប់ឱ្យដឹងតាមទូរស័ព្ទថា ករណីរន្ទះបាញ់សត្វគោនៅទីតាំងខាងលើតាមពិតទៅរន្ទះបាញ់ដើមស្វាយចន្ទីទេប៉ុន្ដែដោយសារគេយកគោទៅចងនៅខាងក្រោមដើមចន្ទីនោះទើបបណ្ដាលឱ្យងាប់សត្វគោដល់ទៅប្រាំមួយក្បាលតែម្ដងទៅ។
លោកមេប៉ុស្ដិបានបញ្ជាក់ថាប៉ាតុភូតធម្មជាតិបែបនេះ កន្លងមកមិនធ្លាប់កើតមានក្នុងភូមិរបស់បងប្អូនជនជាតិគ្រឹនោះឡើយ ហើយនេះជាលើកទីមួយដែលរន្ទះបានបាញ់គោរបស់កសិករនៅភូមិចាអ៊ុងកេត៕
ដោយ ៖ ចាប សំអាន
