ភ្នំពេញ៖នៅព្រឹកថ្ងៃទី១៨ ខែឧសភា ឆ្នាំ២០១៨ តាមរយៈបណ្តាញ ប្រព័ន្ធផ្សព្វផ្សាយFacebookផ្លូវការរបស់នាយកដ្ឋាន នគរបាល ប្រឆាំងបទល្មើសសេដ្ឋកិច្ច ក្រសួងមហាផ្ទៃ លោកឧត្តមសេនីយ៍ទោ ឡុង ស្រេង អនុប្រធាននាយកដ្ឋាន នគរបាលប្រឆាំងបទល្មើសសេដ្ឋកិច្ច បានមានប្រសាសន៍ថា ដោយបានការអនុញ្ញាត្ដិពីឯឧត្ដមឧត្ដមសេនីយ៍ឯក ចាន់ វ៉ាន់ធឿន ប្រធាន នាយកដ្ឋាននគរបាលប្រឆាំងបទល្មើសសេដ្ឋកិច្ច លោកបានដឹកនាំកម្លាំងជំនាញសហការជាមួយមន្ដ្រីអគ្គនាយដ្ឋានសុខភាពសត្វនិងផលិតកម្មសត្វនៃក្រសួងកសិកម្ម រុក្ខាប្រមា់ញ់ និងនេសាទ ចុះបង្ក្រាបការលួចនាំចូលចំណីសត្វចំនួនប្រមាណ២០តោន ពីប្រទេសថៃតាមច្រកម៉ាឡៃ ខេត្ដបន្ទាយមានជ័យដោយគ្មានច្បាប់អនុញ្ញាតិ្ដនិងបញ្ជីការ របស់ ក្រសួងកសិកម្ម រុក្ខាប្រមាញ់ និងនេសាទ បច្ចុប្បន្នវត្ថុតាងនិងជនសង្ស័យបានធ្វើការប្រគល់អោយអគ្គនាយកដ្ឋានសុខភាពសត្វនិងផលិតកម្មសត្វដើម្បីបន្ដនីតិវិធី ។
សូមបញ្ជាក់ថា មួយរយៈពេលកន្លងមកនេះ បើគិតពីរយៈពេលនៃការបោះ ឆ្នោតក្រុមប្រឹក្សាឃុំ-សង្កាត់តាំងពីឆ្នាំ២០១៧ មក គេច្រើន ឃើញវត្តមានលោក ឡុង ស្រេង ជាសកម្មជនចុះជួយពង្រឹង មូលដ្ឋាននៅក្នុង ស្រុកកញ្ជ្រៀច ខេត្តព្រៃវែង ពិសេសឃុំត្នោត ។
ប៉ុន្តែចាប់តាំងពីក្រោយការបោះឆ្នោតឃុំ-សង្កាត់មកគេ កម្រឃើញវត្តមានរបស់លោក ឡុង ស្រេង ណាស់ បើឃើញម្តង ម្កាលតាមfacebook ផ្ទាល់ខ្លួនរបស់លោកគឺលោកភាគច្រើន រវល់និងការថែទាំចៅដ៏ជាទីស្រលាញ់សំណព្វចិត្តរបស់លោក ។ រហូតមានការលើកឡើងពីក្រុមអ្នកកាសែត និងទូរទស្សន៍នានា ដែលតែងតែចូលរួមផ្សព្វផ្សាយអំពីសកម្មភាព និងស្នាដៃ នៃការដឹកនាំកងកម្លាំងនគរបាលជំនាញចុះបង្ក្រាបទប់ស្កាត់បទល្មើសសេដ្ឋកិច្ចគ្រប់ទីកន្លែងមិនថាពេលយប់ ឬពេលថ្ងៃ ភ្លៀងរលឹមអីនោះទេ។
នេះមិននិយាយពីការចំណាយ ធនធានផ្ទាល់ខ្លួនរបស់លោកក្នុងការបំពេញការងារនោះទេ រាប់ទាំងការបង្ក្រាបបទល្មើសនេសាទនៅលើផ្ទៃទឹកក្នុងបឹង ទន្លេសាបនាពេលកន្លងមកផងដែរ លោក ឡុង ស្រេង តែងតែ ហៅក្រុមអ្នកយកព័ត៌មានទាំងកាសែត និង ទូរទស្សន៍អោយ ចូលរួមផ្សព្វផ្សាយ ។ តែមកដល់ពេលនេះ គឹកុំថាឡើយក្រុម ឈ្មួញធំៗដែលរកសុីដឹកជញ្ជូនទំនិញគេចពន្ធ ឬបង់ពន្ធមិន គ្រប់ ឬទំនិញខូចគុណភាព ។ល។
ក៏ថៅកែៗឈ្មួញគ្រាក់ៗ មួយចំនួនចង់ភ្លេចមុខលោក ឡុង ស្រេង ដែរ កុំថាឡើយក្រុម អ្នកកាសែតនោះ ។ ទាក់ទិននឹងការលើកឡើងពីការអវត្តមាន លោក ឡុង ស្រេង ក្នុងការចេញមុខបង្ក្រាបបទល្មើសសេដ្ឋ កិច្ចមួយរយៈនេះ ថាតើមកពីមូលហេតុអ្វី ? តើអត់ មានបទល្មើសកើតឡើង ឬ គ្មានបទបញ្ជាពីថ្នាក់លើ ឬសម្ងំហូបចេកខ្ចី ជាជៀងស្រដីនោះ ? ការិយាល័យនិពន្ធយើងខ្ញុំនៅពុំទាន់ អាចសុំការបកស្រាយបំភ្លឺពីលោក ឧត្តមសេនីយ៍ទោ ឡុង ស្រេង បាននៅឡើយទេ ព្រោះទូរស័ព្ទ ឆ្លើយតបថា មិនអាចទាក់ទងបានទេនៅពេលនេះ៕ ដោយៈ សុផល
