ខេត្តក្រចេះ ៖ តាមសេចក្តីរាយការណ៍បានឲ្យដឹងថា ជនរងគ្រោះដែលស្លាប់ដោយសង្ស័យពុលទឹកនៅខេត្តក្រចេះ បានកើនដល់១៣នាក់ហើយ ខណៈជនរងគ្រោះជាង២០០នាក់ទៀត កំពុងសម្រាកព្យាបាលនៅមន្ទីរពេទ្យបង្អែកខេត្តក្រចេះ។ នេះបើតាមការបញ្ជាក់ពីប្រធានមន្ទីរសុខាភិបាលខេត្តក្រចេះ លោក ឈ្នាង សុវត្ថា។
សូមជម្រាប់ថា ហេតុការណ៍នេះបានកើតឡើងនៅថ្ងៃទី៥ ខែឧសភា ឆ្នាំ២០១៨ ស្ថិតនៅភូមិស្រែនន និងភូមិអាលច ក្នុងឃុំកន្ទួត ស្រុកចិត្របុរី ខេត្តក្រចេះ ដោយប្រជាពលរដ្ឋរងគ្រោះមានរោគសញ្ញា ៖ ឈឺពោះ, ក្អួតចង្អោរ, ឈីក, អស់កម្លាំង, ទន់ដៃទន់ជើង, វិលមុខ និងថប់ដង្ហើម រហូតបណ្តាលឲ្យស្លាប់ និងជនរងគ្រោះជាច្រើននាក់ផ្សេងទៀត ត្រូវបានដឹកបញ្ជូនទៅកាន់មន្ទីរពេទ្យបង្អែកខេត្ត និងមន្ទីរពេទ្យកាល់់ម៉ែត រាជធានីភ្នំពេញ។
លោកម៉មប៊ុនហេងរដ្ឋមន្ត្រីក្រសួងសុខាភិបាលឲ្យដឹងថា៖
-រហូតមកដល់ពេលនេះនៅមន្ទីរពេទ្យខេត្តមានអ្នកជំងឺកំពុងសំរាកចំនួន ១៣៤នាក់ ហើយបានបញ្ជូនអ្នកជំងឺធ្ងន់ចំនួន១០នាក់មកមន្ទីរពេទ្យកាល់ម៉ែត។
-អ្នកជំងឺធ្ងន់ដែលកំពុងទទួលការព្យាបាលនៅមន្ទីពេទ្យកាល់ម៉ែត ចំនួន៨នាក់ ដែលក្នុងនោះ៦នាក់កំពុងលាងឈាម។ អ្នកជំងឺដែលបានបញ្ជូនមកដល់កាល់ម៉ែតទាំងអស់នោះសុទ្ធតែមានរោគសញ្ញាពុលស្រា ដែលមានជាតិមេតាណុលខ្ពស់មិនមែនទឹកទេ!។
-លទ្ធផលនៃការពិនិត្យរបស់មន្ទីរពិសោធន៏ជាតិ សុខាភិបាល លើសំណាកស្រាមួយចំនួនដែលក្រុមការងារបានផ្ញើរមកពីភូមិពាក់ពន្ធ័ បានបង្ហាញថាស្រាទាំងនោះមានផ្ទុកជាតិមេតាណុលខ្ពស់ ដែលធ្វើអោយពុល។ ដោយឡែកការវិភាគសំណាកទឹកដែលផ្ញើមកពីភូមិពាក់ពន្ធ័ ពុំទាន់ទទួលបានលទ្ធផលនៅឡើយ។
-វិធានការដែលបានដាក់ចេញរបស់អាជ្ញាធរមូលដ្ឋានរួមមាន៖ ១) ការបញ្ឈប់ការបិតនិងលក់ស្រាស ក្នុងមូលដ្ឋាន។ ២) បំរាមប្រជាជនក្នុងភូមិកុំអោយប្រើប្រាស់ទឹកអូរក្នុងតំបន់សង្ស័យ និងជួយដឹកទឹកស្អាតផ្គត់ផ្គង់ដល់អ្នកភូមិ។ ៣) អប់រំ អនាម័យ រស់នៅ និងហូបចុក ដល់ប្រជាជនក្នុងភូមិ។
ទោះជាយ៉ាងណាមានសេចក្តីរាយការណ៍ថាប្រជាពលរដ្ឋមួយចំនួនដោយការភ័យខ្លាចបានចាកចេញពីលំនៅដ្ឋាន ៕