ខេត្តស្ទឹងត្រែង ៖ សមត្ថកិច្ចកងរាជអាវុធហត្ថខេត្តស្ទឹងត្រែងនៅថ្ងៃទី២០ ខែមេសា ឆ្នាំ២០១៨នេះ បានចាប់ខ្លួនអគ្គនាយកក្រុមហ៊ុន «យិន ត្រាង ឌីវេឡប់ម៉ិន» ពាក់ព័ន្ធករណីបោករថយន្ដរាប់សិបគ្រឿង នៅរាជធានីភ្នំពេញ ។ ការចាប់ខ្លួនអគ្គនាយកក្រុមហ៊ុនរូបនេះ បន្ទាប់ពីបក្សពួក២នាក់ត្រូវបានសមត្ថកិច្ចឃាត់ខ្លួន រួចហើយកាលពីថ្ងៃទី១៨ ខែមេសា កន្លងទៅ។
សមត្ថកិច្ចបញ្ជាក់ថា ជនសង្ស័យដែលត្រូវឃាត់ខ្លួននោះ ឈ្មោះ ឈិន ចាន់ថុល ភេទប្រុស អាយុ៤២ឆ្នាំ មុខរបរ អគ្គនាយកក្រុមហ៊ុន «យិន ត្រាង ឌីវេឡប់ម៉ិន ឯ.ក» អាស័យដ្ឋានផ្ទះលេខ៨០៦ ផ្លូវNTZ ក្រុមទី០៤ ភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ និងមានស្រុកកំណើតភូមិក្បាលជួរ ឃុំសំបុក ក្រុងក្រចេះ ខេត្តក្រចេះ។
លោក អៀង វ៉ាន់ឌី មេបញ្ជាការរាជអាវុធហត្ថខេត្តស្ទឹងត្រែង បានប្រាប់អ្នកសារព័ត៌មានថា បន្ទាប់ពីការចាប់ខ្លួនអគ្គនាយកក្រុមហ៊ុនរូបនោះ យើងដកហូតបាន រថយន្តចំនួន០៤គ្រឿង៖ ទី១៖រថយន្តម៉ាក HAWTAI ពណ៌ស ពាក់ស្លាកលេខភ្នំពេញ2AS-1787, ទី២៖រថយន្តម៉ាក LEXUS 300 ពណ៌ប្រផេះគ្មានស្លាកលេខ, ទី៣៖រថយន្តម៉ាកកាមរី បាឡែន ពណ៌ប្រផេះ ពាក់ស្លាកលេខកំពង់ចាម2A-2410 និងទី៤៖រថយន្តម៉ាក HIGHLANDER ពណ៌ទឹកប៊ិច គ្មានស្លាកលេខ ៕