ខេត្តកំពង់ធំ ៖ សមត្ថកិច្ចកងរាជអាវុធហត្ថបានឃាត់ខ្លួនយុវជនម្នាក់មាន Account Facebook ឈ្មោះ «Meng Hour» ដែលបានសរសេរបង្ហោះថា «ស៊ីឈ្នួលសម្លាប់មនុស្ស» ដើម្បីយកមកសួរនាំ ខណដែលការឃាត់ខ្លួននោះបានធ្វើឡើងកាលពីថ្ងៃទី១៨ ខែមេសា ឆ្នាំ២០១៨នេះ ។
យុវជនដែលត្រូវឃាត់ខ្លួននោះឈ្មោះ ហ៊ីម សុខហ័រ ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិស្មោញ ឃុំផាន់ញើម ស្រុកប្រាសាទបល្ល័ង្គ ខេត្តកំពង់ធំ។
ចំពោះមុខសមត្ថកិច្ចយុវជនខាងលើ បានសារភាពថា ខ្លួនបាន Share យករូបគេ កាន់កាំភ្លើងយកមកបង្ហោះ ហើយសរសេរថា «ស៊ីឈ្នួលសម្លាប់មនុស្ស» គ្រាន់តែចង់បង្អួតមិត្តភក្តិ តែប៉ុណ្ណោះ តាមពិតពុំមានកាំភ្លើងអ្វីឡើយ។
ក្រោយពីបានសួរនាំនិងបានធ្វើការអប់រំ រួចហើយសមត្ថកិច្ចបានអនុញ្ញាតឱ្យយុវជនខាងលើវិលត្រឡប់ទៅវិញផងដែរ ៕
