បាត់ដំបង ៖ ស្ត្រីម្នាក់ដែលអះអាងថា ជាគ្រូ ចេះទស្សន៍ទាយ និងចេះដកអំពើ ចេញពីខ្លួនប្រាណត្រូវប៉េអឹមស្រុកសំពៅលូនចាប់ឃាត់ ពីបទឆបោកលុយពីជនរងគ្រោះជាង១៦ម៉ឺនបាតកាលពី ថ្ងៃទី៩ ខែមេសា ឆ្នាំ២០១៨ វេលាម៉ោង៦ ល្ងាច នៅចំណុចភូមិកណ្តោល ឃុំសន្តិភាព ស្រុកសំពៅលូន ខេត្តបាត់ដំបង ទៅតាមពាក្យបណ្តឹងរបស់ជនរងគ្រោះឈ្មោះ ហ៊យ ណាត
ភេទស្រី អាយុ៥១ឆ្នាំរស់នៅភូមិអូរ ឃុំសន្តិភាព ស្រុកសំពៅលូន ពីបទឆបោក រំលោភលើទំនុកចិត្ត។ គ្រូអាយអំពាយនោះមានឈ្មោះ កាំង លាង ហៅ តាំងគីមមួយហេង អាយុ ៣៧ឆ្នាំ ។
ដំបូងជនរងគ្រោះចេះតែមានអការៈឈឺចាប់នៅក្នុងខ្លួន ទើបបានមកឲ្យគ្រូហោទស្សន៍មើលឲ្យ ក្រែងមានខុសអ្វីមួយ ។
ពេលមកដល់ស្រីជា គ្រូហោរូបនេះបាននិយាយថា ខ្លួនត្រូវអំពើគេហើយ ដោយនៅក្នុងខ្លួនមានសសៃលួសច្រើនណាស់ ហើយគ្រូបានសន្យាថាគេអាចដកលួសទាំងនេះចេញពីខ្លួនប្រាណរបស់ខ្លួនបាន ប៉ុន្តែកំណល់គ្រូរាងថ្លៃបន្តិច ទើបពូកែស័ក្តិសិទ្ធ និងអាចទាញចេញឲ្យអស់ពីក្នុងខ្លួន ។ ដោយសារមានការភ័យខ្លាច ខ្លួនក៏យល់ព្រមឲ្យគ្រូហោនោះជួយដោះអំពើចេញពីខ្លួន ប៉ុន្តែជំហានដំបូងគ្រូទាមទារប្រាក់ចំនួន ១៧០០០ បាត មកតម្កល់លើអសនៈ ដើម្បីឲ្យការធ្វើនេះបានពូកែ ។
ប៉ុន្តែក្រោយពីគ្រូទាយបានព្យាបាលតាមរយៈមន្តអាគមរបស់ខ្លួន គ្រូដោះអំពើរូបនេះបានប្រាប់អ្នកជំងឺថា គ្រូបានដោះអំពើចេញខ្លះៗហើយថាមានទាំងដែកគោល និងរបស់ផ្សេងទៀត តែដោះមិនទាន់អស់ទេ ។ គ្រូទាយរូបនេះ បានបង្គាប់ឱ្យអ្នកជំងឺតម្កល់លុយជាង១០ម៉ឺនបាតបន្ថែមទៀតគម្រប់១៧ម៉ឺនបាត ដើម្បីឲ្យកាន់តែពូកែស័ក្តិសិទ្ធ ហើយអ្នកជំងឺក៏រកលុយយកមកឲ្យគ្រូបន្ថែមទៀតគ្រប់ចំនួន ។
ប៉ុន្តែក្រោយពីមក គ្រូទាយបានបង្ហាញពីសកម្មភាពបោកប្រាស់ ទើបជនរងគ្រោះមានការសង្ស័យ ក៏សួរនាំរហូតមានការឈ្លោះប្រកែកគ្នាបែកផ្សែង ។ ពេលដែលផ្ទុះរឿងនេះស្ត្រីគ្រូទាយបានយល់ព្រមសងលុយអ្នកជំងឺវិញ តែបានចេញជាសែក ដែលមានទឹកប្រាក់ចំនួនជាង៣ម៉ឺនដុល្លារ ឱ្យទៅជនរងគ្រោះ។
គ្រូទាយរូបនេះបានបញ្ជាក់ប្រាប់អ្នកជំងឺថា អាចយកសែកនោះទៅដូរលុយនៅធនាគារចាយសិនទៅ។ ព្រោះមិនអាចដកលុយជាង១៧ម៉ឺន ដែលតម្កល់លើអាសន:គ្រូនេះឱ្យវិញភ្លាមៗបានទេ ខុសតំណមគ្រូ លុះចាយលុយក្នុងសែកនោះអស់ហើយ ទើបដកបាន។
ប៉ុន្តែនៅពេលជនរងគ្រោះយកសែក ដែលមានទឹកលុយជាង៣ម៉ឺនដុល្លារនោះទៅដូរនៅធនាគារ ខាងធនាគារប្រាប់ថា ជាសែកគ្មានទឹកប្រាក់ ទើបអ្នកជំងឺរូបនេះប្ដឹងសមត្ថកិច្ចឲ្យឃាត់ខ្លួនស្ត្រីគ្រូទាយបោកប្រាស់នេះតែម្ដងទៅ ។ ទោះជាចាប់ខ្លួណតែអត់ទាន់បានលុយមកវិញទេ ៕