រាជធានីភ្នំពេញ ៖ នៅថ្ងៃនេះពលរដ្ឋខ្មែរ ដែលរួចទោសនៅអាមេរិកចំនួន៤៣នាក់ ក្នុងនោះមានស្ត្រី៣នាក់ផង ត្រូវបានបញ្ជូនមកដល់កម្ពុជាវិញហើយ បន្ទាប់ពីពួកគេបានអនុវត្តទោសរួចរាល់នៅទឹកដីអាមេរិក ។
សូមរំលឹកថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា នឹងទទួលយកពលរដ្ឋខ្មែរ ដែលមានទោសនៅអាមេរិក ត្រឡប់វិញ ។ ទន្ទឹមនោះលោក ផៃ ស៊ីផាន អ្នកនាំពាក្យទីស្តីការគណរដ្ឋមន្ត្រីបានលើកឡើងថា រដ្ឋាភិបាលសហរដ្ឋអាមេរិក គួរតែពិចារណាពីទិដ្ឋភាព នៃប្រជាពលរដ្ឋដែលត្រូវបានបញ្ជូនមកវិញគឺមានមួយចំនួនមានអាយុចាស់ជរា ដែលអាមេរិកបញ្ជូនត្រឡប់មកវិញ។
សូមបញ្ជាក់ថា រាជរដ្ឋាភិបាលកម្ពុជា និងរដ្ឋាភិបាលអាមេរិក បានចុះកិច្ចព្រមព្រៀងបញ្ជូន និងទទួលយកពលរដ្ឋខ្មែរពីសហរដ្ឋអាមេរិកឲ្យត្រឡប់មកកម្ពុជាវិញ ចាប់តាំងពីឆ្នាំ២០០២។ កិច្ចព្រមព្រៀងនេះ រដ្ឋាភិបាលសហរដ្ឋអាមេរិក នឹងបញ្ជូនពលរដ្ឋខ្មែរណា ដែលប្រព្រឹត្តល្មើសឲ្យត្រឡប់មកមាតុភូមិវិញ ក្រោយពេលអនុវត្តទោសរួចរាល់ ៕