ដោយសារប្រទេសជាតិយើង មានសុខសន្តិភាព ឯករាជ្យពេញបរិបូរណ៍ ធ្វើឲ្យប្រជាពលរដ្ឋគ្រប់ រូប មានសិទ្ធសេរីភាពគ្រប់បែបយ៉ាង និងមានសិទ្ធិគោរពបូជា កាន់ជំនឿសាសនារៀងៗខ្លួន តាមការពេញចិត្ត។ ទន្ទឹមនឹងនោះ ប្រទេសកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិត របស់សម្ដេចតេជោ ហ៊ុន សែន នាយករដ្ឋមន្ត្រី បានកែប្រែប្រទេសពីបាតដៃទទេ រហូតមានការអភិវឌ្ឍន៍ រីកចំម្រើនលើគ្រប់វិស័យ ទាំងវិស័យពុទ្ធចក្រ និងអាណាចក្រ។
ឯកឧត្តម អ៊ឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានថ្លែងបែបនេះ នៅក្នុងពិធីសម្ពោធឆ្លងដាក់ឲ្យប្រើប្រាស់នូវសមិទ្ធផលនានាជាច្រើនក្នុងវត្តបទុមមុន្នីវណ្ណារាម (ហៅរកាកណ្តាល) មានដូចជា ព្រះវិហារ និងខ្លោងទ្វារ នាព្រឹកថ្ងៃទី២៣ ខែមិនា ឆ្នាំ២០១៨ ដោយមានការអញ្ជើញចូលរួមពីឯកឧត្តម សរ ចំរុង អភិបាលខេត្តក្រចេះ និងថ្នាក់ដឹកនាំមន្ត្រីរាជាការគ្រប់ លំដាប់ថ្នាក់ រួមនិងប្រជាពលរដ្ឋ ពុទ្ធបរិស័ទចំនួនប្រមាណជាង ២០០០នាក់ ផងដែរ ។
លោក យិន វណ្ណះ អភិបាលក្រុងក្រចេះ បានបញ្ជាក់ថា ក្រុងក្រចេះ កំពុងធានាបាននូវសន្តិសុខ សណ្តាប់ធ្នាប់សង្គមល្អប្រសើរ ប្រែមុខមាត់គួរឲ្យគត់សម្គាល់។ ជាក់ស្តែងថ្ងៃនេះ ពិធីបុណ្យឆ្លងព្រះវិហារ និងសម្ពោធសមិទ្ធផលនានានៅវត្តបទុមមុន្នីវណ្ណារាម ស្ថិតនៅភូមិរកាកណ្តាល សង្កាត់រការកណ្តាល ក្រុងក្រចេះ គឺមានការចូលរួមឧប្ថម្ភគាំទ្រពីឯកឧត្តម អ៊ឹម ឈុនលឹម ប្រធានធម្មនុញ្ញនៃព្រះរាជាណាចក្រ កម្ពុជា ។
យោងតាមឯកសារមួយចំនួនដែលបានកត់ត្រាទុកអំពីប្រវត្តិនៃការកសាងវត្តរកាកណ្ដាលនេះ បានឲ្យដឹងថា វត្តនេះ ត្រូវបានកសាងឡើងក្នុងអំឡុងឆ្នាំ១៩៤៦ ដោយព្រះតេជគុណ ស្រី អ៊ូ ។ ហើយព្រះវិហារនេះទៀតសោធ គឺជាសំណងដែលបន្សល់ទុកពីមុនមក បច្ចុប្បន្នមានការជួសជុល តែតួព្រះវិហារ ក្នុងនោះមានការជួសជុលថ្មីរួមមាន រុះរើក្បឿងលាបព៌ណ ផ្លាស់ប្តូរបង្កង់ដៃរណែង ផ្លានផ្ទោង ឈូសកោស កែលម្អក្បាច់ និងលាបថ្នាំតួព្រះវិហារ ការគាស់រើសាប និងរៀបចំការ៉ូ និងការីឡា ខឿនជាន់ទី១ និងទី កសាងក្លោងទ្វារធំ និងបង្ការន់ដៃព័ទ្ធជុំវិញព្រះវិហារ កសាងក្លោងទ្វារធំ២ នៅខាងជើង និងខាងត្បូង និងតចាក់សាបផ្ទៃក្រោមជុំវិញព្រះវិហារ ហើយសរុបការចំណាយទាំងអស់ ទឹកប្រាក់ចំនួន ៦៦,១៣៧ ដុល្លាអាមេរិក។
មានប្រសាសន៍សំណេះសំណាលជាមួយតាជីយាយជីនិងក្មួយៗសិស្សានុសិស្ស ឯកឧត្តម អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានគូសបញ្ជាក់ថា កន្លងមកទោះដោយផ្ទាល់ក្តី មិនផ្ទាល់ក្តី ប្រជាពលរដ្ឋសុទ្ធតែបានដឹងថា សុខសន្តិភាព និងការអភិវឌ្ឍន៍ ដែលកំពុងមានសព្វថ្ងៃ គឺពិតជាមនុញ្ញផលជាប្រវត្តិសាស្ត្រ ដែលសម្រេចបានដោយត្រូវឆ្លងកាត់ការលំបាក ឧបសគ្គតូចធំ ម៉ឺនសែនរាប់មិនអស់ ជាពិសេសការរំដោះប្រទេសជាតិ ឲ្យរួចផុតពីរបបប្រល័យពូជសាសន៍ និងការរំលត់ភ្លើងសង្គ្រាមរុំារ៉ៃរាប់ទស្សវត្សរ៍ បន្ទាបពីការស្តារ និងការអភិវឌ្ឍន៍ប្រទេសជាតិ ចេញពីគំនរផេះផង់ ឲ្យក្លាយមកជា “កូនខ្លាសេដ្ឋកិច្ច” ក្នុងតំបន់ ៕