ភ្នំពេញ ៖ ស្រីស្រស់សោភាម្នាក់បើកបររថយន្តម៉ាកហាយឡែនឌ័រយ៉ាងលឿន ហើយក៏ច្រុលទៅបុកគូទរថយន្តប្រមូលសម្រាមស៊ីនទ្រីមួយគ្រឿង ដែលដែលកំពុងឈប់ចតយកសំរាមបង្កឲ្យកម្មករម្នាក់បាក់ជើង កាលពីវេលាម៉ោង១០និង១០នាទីយប់ ថ្ងៃទី២១ ខែមីនា ឆ្នាំ២០១៨ ត្រង់ចំណុចខាងត្បូងអង់តែនទួលគោក ប្រមាណ១០០ម៉ែត្រ តាមបណ្ដោយផ្លូវ២៨៩ ស្ថិតក្នុងសង្កាត់បឹងកក់ទី១ ខណ្ឌទួលគោក ។
នៅមុនពេលកើតហេតុ គេឃើញស្ត្រីវ័យប្រមាណ៣០ឆ្នាំម្នាក់ស្រវឹងបើកបររថយន្តមួយគ្រឿងម៉ាកហាយឡែនឌ័រ ពណ៌ស ពាក់ផ្លាកលេខ ភ្នំពេញ ២U-៨៣១៥ ធ្វើដំណើរតាមបណ្ដោយផ្លូវ២៨៩ ទិសដៅពីត្បូងទៅជើង និងក្នុងល្បឿនយ៉ាងលឿន ។
លុះមកដល់ចំណុចកើតហេតុ រថយន្តខាងលើក៏បានរេចង្កូតទៅខាងស្តាំទៅបុកបុរសម្នាក់ ដែលជាកម្មករប្រមូលសំរាមរបស់ក្រុមហ៊ុនស៊ីនទ្រី ដែលកំពុងឈរលើកសំរាមដាក់ចូលរថយន្ត បណ្ដាលឲ្យរងរបួសបាក់ជើងខាងឆ្វេង ហើយក៏បន្តទៅបុកគូទរថយន្តស៊ីនទ្រី ដែលកំពុងឈប់ចតយកសំរាមនៅលើចិញ្ចើមផ្លូវ ចំពីក្រោយពេញទំហឹង បណ្ដាលឲ្យរថយន្តស៊ីនទ្រី រងការខូចខាតផ្នែកខាងក្រោយ ចំណែកឯរថយន្តបង្ករងការខូចខាតផ្នែកខាងមុខយ៉ាងដំណំ ។
បុកហើយអ្នកបើកបររថយន្តបង្កមិនចុះពីលើរថយន្តទេគឺអង្គុយសង្ងំនៅតែក្នុងរថយន្តរបស់ខ្លួន បន្ទាប់មកគេក៌៏ឃើញមានរថយន្តមួយគ្រឿងទៀតម៉ាកឡិចស៊ីស RX៣៣០ ពណ៌ស ពាក់ផ្លាកលេខ ភ្នំពេញ ២AU-៣៣៨៩ បានបើកមកយកស្ត្រីដែលជាអ្នកបើកបររថយន្តបង្កគេចខ្លួនចេញពីកន្លែងកើតហេតុបាត់ស្រមោលចោលឡានទុកឲ្យនគរបាលចាត់ការទៅ ។បានន័យថាម្ចាស់ឡានមានខ្សែស្រលាយមិនណយប៉ុន្មានទេ!៕