ភ្នំពេញ ៖ ពិធីបញ្ចុះបឋមសីលាបួងសួងសុំសេរីសួស្តី ពីម្ចាស់ទឹកម្ចាស់ដី នៃគម្រោងសាងសង់ «មជ្ឈមណ្ឌលពាណិជ្ជកម្ម ថៃប៊ុនរ៉ុង» លំដាប់ពិភពលោក ត្រូវបានបើកធ្វើនាព្រឹកថ្ងៃទី១៩មីនាឆ្នាំ២០១៨។បើតាមលោកសាស្ត្រាចារ្យ ទួស សាភឿន អ្នកកាន់គម្រោង បានប្រាប់ថាគម្រោង «មជ្ឈមណ្ឌលពាណិជ្ជកម្ម ថៃប៊ុនរ៉ុង» សាងសង់នៅលើផ្ទៃដីទំហំ ៤៩.៧៣២ម៉ែត្រក្រឡា ដែលមានកំពស់៥៦១.៧ម៉ែត្រស្មើនិង ១៣៣ជាន់ គឺគិតចំនួនផ្ទៃដែលប្រើប្រាស់បាន។តែបើគិតបញ្ចូលទាំងកំពស់អង់តែន២៥ម៉ែត្រទៀតគឺមានកំពស់រហូតដល់៥៨៦.៧ម៉ែត្រឯណោះ។
មជ្ឈមណ្ឌលពាណិជ្ជកម្មលំដាប់ពិភពលោកនេះ រួមបញ្ចូលនូវសណ្ឋាគារកម្រិតផ្កាយ៥ ខុនដូប្រណីត អាផាតមិន ការិយាល័យលំដាប់អន្តរជាតិ ផ្សារទំនើបចំរុះ ភោជនីយដ្ឋាននិងសេវាកម្មកម្សាន្តលំដាប់ពិភពលោកជាច្រើនកន្លែង និងកន្លែងទេសចរណ៏គយគន់ទេសភាពរាជធានីភ្នំពេញ ។
គម្រោងនេះមានចំណតរថយន្តចំនួន ៣៨០០គ្រឿង និងម៉ូតូចំនួន ៣០០០គ្រឿង នៅក្រោមដីចំនួនពីរជាន់ សម្រាប់អ្នកចូលមកប្រើប្រាស់អគារនេះ។ ការចំណាយនៃគម្រោងសំណង់ទាំងមូលមានចំនួនទឹកប្រាក់រហូតដល់ជាង៣ពាន់លានដុល្លារអាមេរិក ។ គេមិនដឹងថា ក្នុងរង្វង់ទឹកលុយប៉ប៉ុនណឹងតើក្រុមហ៊ុនថៃប៊ុនរ៉ុងមានការចូលរួមពីភាគហ៊ុនខ្មែរនិងបរទេសប៉ុន្មាននោះទេ។
សូមបញ្ជាក់ថា៖បច្ចុប្បន្ន អគារខ្ពស់ជាងគេនៅអាស៊ានគឺមាន Petronas Tower នៅប្រទេសម៉ាឡេស៊ី ដែលមានកម្ពស់ ៤៥២ម៉ែត្រ ៨៨ជាន់ ៕