អូស្ត្រាលី ៖ សម្តេចតេជោ ហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញទៅដល់ទីក្រុងស៊ីដនី ប្រទេសអូស្ត្រាលី ប្រកបដោយសុវត្តិភាពហើយ នៅវេលាម៉ោង ៨ព្រឹក ម៉ោងនៅទីក្រុងស៊ីដនី ត្រូវនឹងម៉ោង ៤ទៀបភ្លឺម៉ោងនៅប្រទេសកម្ពុជាថ្ងៃទី១៦ ខែមីនា ឆ្នាំ២០១៨នេះដែលនៅទីនោះទទួលបានការស្វគមន៍គាំទ្រយ៉ាងកក់ក្តៅពីបងប្អូនប្រជាជនខ្មែរ និងមន្ត្រីជាន់ខ្ពស់អូស្ត្រាលីនៃរដ្ឋញ៉ូវសោធវ៉េល (New South Wales) និងឥស្សរជនការទូតរបស់កម្ពុជា ប្រចាំប្រទេសអូស្ត្រាលី ជាច្រើនរូប។
ដំណើររបស់សម្តេចមិនត្រូវបានរំខានពីក្រុមខ្មែរមាននិន្នាការប្រឆាំងមួយក្តាប់តូចនោះឡើយ។ សម្តេចតេជោ ហ៊ុន សែន ពេលចេញពីកិច្ចប្រជុំឃើញបងប្អូនជួបជុំច្រើន ក៏បានឆ្លៀតចុះជួបសំណេះសំណាល និងសួរសុខទុក្ខជាមួយពួកគាត់ផងដែរ។
នៅកន្លែងជួបជុំដែលធ្វើឡើងនៅមុខកន្លែងស្នាក់នៅរបស់សម្តេចតេជោផ្ទាល់តែម្តងនោះ បងប្អូនប្រជាពលរដ្ឋខ្មែរនៅអូស្ត្រាលី ដែលគោរពស្រឡាញ់សម្តេច បាននាំគ្នាលើកបដា និងស្រែកជយឃោសនានា ដូចជាថា មានសម្តេចតេជោ ហ៊ុន សែន មានការអភិវឌ្ឍ មានសម្តេចតេជោ ហ៊ុន សែន មានសន្តិភាព ហើយពួកគេក៏បានស្រែកថា ប្រឆាំងដាច់ខាតរាល់ការញុះញង់ទាំងឡាយនាំឲ្យជាវិនាសអន្តរាយ។
សម្តេចតេជោនាយករដ្ឋមន្ត្រីនៃកម្ពុជា ត្រូវអញ្ជើញចូលរួមកិច្ចប្រជុំកំពូលពិសេសអាស៊ាន-អូស្ត្រាលី ដែលនឹងប្រារព្វធ្វើឡើងនៅថ្ងៃទី១៧-១៨មីនា។ តាមកម្មវិធីដែលបានគ្រោងទុកនៅរសៀលថ្ងៃទី១៦ ខែមីនានេះ សម្តេចតេជោ នឹងអញ្ជើញជួបប្រជុំទ្វេភាគីជាមួយលោក ម៉ាល់ខូម ថើនប៊ុល (Malcolm Turnbull) នាយករដ្ឋមន្ត្រីអូស្ត្រាលី ជួបសំដែងការគួរសមជាមួយលោក ជេរេមី ចនសុន ប្រធានសភាពាណិជ្ជកម្ម និងឧស្សាហកម្មអូស្ត្រាលី និងជួបសំណេះសំណាលជាមួយប្រជាពលរដ្ឋខ្មែររស់នៅប្រទេសអូស្ត្រាលី និងនូវ៉ែលហ្សេឡង់ប្រមាណ ៧៥០នាក់ មុនការអញ្ជើញចូលរួមកិច្ចប្រជុំកំពូលពិសេសអាស៊ាន-អូស្ត្រាលី ដែលនឹងប្រារព្វធ្វើឡើងនៅថ្ងៃទី១៧-១៨មីនា។
ឥស្សរជនកម្ពុជាដែលនឹងអញ្ជើញអមដំណើរសម្តេចតេជោ ហ៊ុន សែន រួមមាន ទេសរដ្ឋមន្ដ្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ, ទេសរដ្ឋមន្ដ្រី ឱម យ៉ិន ទៀង អនុប្រធានលេខាធិការដ្ឋាន នៃគណៈកម្មារធិការជាតិប្រឆាំងភេរវកម្ម និងជាប្រធានអង្គភាពប្រឆាំងអំពើពុករលួយ, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ព្រមទាំងសមាជិកដទៃទៀត នៃរាជរដ្ឋាភិបាលកម្ពុជា។
យោងតាមក្រសួងការបរទេស និងសហប្រតិបត្តិការអន្ដរជាតិ បានឲ្យដឹងថា ក្នុងកិច្ចប្រជុំកំពូលពិសេសអាស៊ាន-អូស្រា្តលី សម្តេចតេជោនាយករដ្ឋមន្ត្រី រួមជាមួយថ្នាក់ដឹកនាំអាស៊ាន និងនាយករដ្ឋមន្ត្រីអូស្ត្រាលី នឹងអញ្ជើញធ្វើជាអធិបតីក្នុងពិធីចុះហត្ថលេខាលើអនុស្សរណៈ នៃការយោគយល់គ្នារវាងអាស៊ាន និងអូស្រា្តលី ស្តីពីកិច្ចសហប្រតិបត្តិការប្រយុទ្ធប្រឆាំងភេរវកម្មអន្តរជាតិ ដោយលោក ប៉េហាំង ដាតូ លីម ជុក ហ័យ អគ្គលេខាធិការអាស៊ាន និងលោកស្រី ជូលី ប៊ីហ្សប រដ្ឋមន្ត្រីការបរទេសអូស្ត្រាលី។
ក្រៅពីកិច្ចប្រជុំមេដឹកនាំកំពូលអាស៊ាន និងអូស្ត្រាលី នឹងទទួលជួបដោយឡែកពីគ្នាជាមួយនិស្សិតអូស្ត្រាលី ដែលកំពុងសិក្សានៅប្រទេសសមាជិកអាស៊ាន ក្រោមផែនការកូឡុមបូថ្មី និងនិស្សិតប្រទេសសមាជិកអាស៊ាន ដែលកំពុងសិក្សានៅអូស្ត្រាលី តាមរយៈអាហារូបករណ៍របស់អូស្ត្រាលី។
ក្រសួងការបរទេសកម្ពុជាឲ្យដឹងថា៖ ក្រៅពីអញ្ជើញចូលរួមកិច្ចប្រជុំកំពូលពិសេសអាស៊ាន-អូស្រា្តលី សម្តេចតេជោ ហ៊ុន សែន នឹងជួបប្រជុំទ្វេភាគីជាមួយ លោក ម៉ាល់កុម ធឺនប៊ុល នាយករដ្ឋមន្ត្រីអូស្រា្តលី អញ្ជើញចូលរួមពិសារអាហារពេលព្រឹក ការងារជាមួយលោក ង្វៀន សួនហ្វ៊ុក នាយករដ្ឋមន្ត្រី នៃសាធារណរដ្ឋសង្គមនិយមវៀតណាម និងលោក ថងលូន ស៊ីស៊ូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ៕
