ក្រចេះ៖ ដើម្បីបង្ហាញពីភាពលូតលាស់លើវិស័យកសិកម្ម បង្កើនការយល់ដឹងអំពី សាកវប្បកម្ម និងលើកកម្ពស់សុវត្ថិភាពចំណីអាហារ មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ បានរៀបចំពិពរណ៍កសិកម្ម បន្លែ ផ្លែឈើ ឡើងនៅរាត្រីថ្ងៃទី០៦ ខែមិនា ឆ្នាំ២០១៧ នៅបរិវេណមាត់ទន្លេទល់មុខមហោស្រពខេត្ត ។
ការតាំងពិពរណ៍ផលិតផលកសិកម្មនេះ គឺដោយមានការគាំទ្រពីទីភ្នាក់ងារស្វីស សម្រាប់ការអភិវឌ្ឍន៍ និងកិច្ចសហប្រតិបត្តិការ ដែលហៅកាត់ថា SDC ជាម្ចាស់ជំនួយ និងក្រុមអនុវត្តគម្រោង CHAIN ដែលរួមមាន អង្គការអភិវឌ្ឍន៍ហូឡង់ SNV សហការជាមួយមន្ទីរកិច្ចការនារីខេត្ត អង្គការមិនមែនរដ្ឋាភិបាល វិស័យឯកជន និងស្ថាប័នពាក់ព័ន្ធនានាទូទាំងខេត្ត ។
លោក ម៉ៅ វិចិត្រ អនុប្រធាន មន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា គោលបំណងសំខាន់នៃការរៀបចំពិពរណ៍កសិកម្ម បន្លែ ផ្លែឈើ សាកវប្បកម្មនេះឡើង គឺក្នុងគោលបំណងចង់ឲ្យសហគមន៍អ្នកដាំបន្លែ ផ្លែឈើ បានដាក់តាំងនូវផលិតផលរបស់ ខ្លួន និងចង់ឲ្យពួកគាត់បានស្គាល់ជាមួយខាងក្រុមហ៊ុន ក្រុមអ្នកទិញបន្លែ ជាពិសេស គឺមានទំនាក់ទំនងជាមួយគ្នា ។
លោក បានបន្តថា ការរៀបចំពិពរណ៍កសិកម្មនេះ មិនមែនដើម្បីរកប្រាក់ចំនូលឡើយ ប៉ុន្តែជាព្រឹត្តិការណ៍ ដើម្បីបង្កើនតំបន់ផលិតកម្ម រកឱកាសភ្ជាប់បណ្ដាញទីផ្សារជាមួយ ពាណិជ្ជករ និងអ្នកពាក់ព័ន្ធដទៃទៀត និងដើម្បីអនុញ្ញាត្តិឲ្យអ្នកពាក់ព័ន្ធទាំងនោះ បានបង្ហាញពីផលិតផល និងសេវាកម្មរបស់ខ្លួន សម្រាប់ការចែករំឡែកចំណេះដឹង និងការតភ្ជាប់កិច្ចសន្ទា ពាក់ព័ន្ធនិងវិស័យកសិកម្ម និងរកឱកាសសម្រាប់សាកវប្បកម្ម ក្នុងខេត្តក្រចេះ ។
អភិបាលរងខេត្ត ឯកឧត្តម ខ័ណ្ឌ ចំណាន បានមានប្រសាសន៍លើកឡើងថា តាមរយៈ ព្រឹត្តិការណ៍នេះ វានឹងក្លាយជាឱកាសមួយស្រាប់ប្រជាកសិករ ដើម្បីផ្លាស់ប្ដូរបទពិសោធន៍ ជាមួយកសិករផ្សេងទៀត រៀនអំពីអាហាររូបត្ថម្ភ ការទទួលបាននូវបច្ចេកទេសល្អថ្មីៗ និងឱកាសដើម្បីពិភាក្សាអំពីកង្វល់ និងការលំបាក់របស់កសិករក្នុងការធ្វើកសិកម្ម ជាមួយអ្នកជំនាញ ឬការចែករំឡែកស្នាដៃ និងបទពិសោធន៍របស់អ្នកជាមួយកសិករ ផ្សេងទៀត ដែលមកពីតំបន់ផ្សេងគ្នា ។
ឯកឧត្តម អភិបាលរងខេត្ត មានប្រសាសន៍បន្ដថា បន្លែ ផលែឈើភាគច្រើន ដែលប្រជាជន កម្ពុជាទទួលទានមានច្រើនប្រភេទណាស់ ដែលមួយចំនួននៃបន្លែផ្លែឈើទាំងនោះជា ប្រភេទបន្លែ ដាំដុះក្នុងមូលដ្ឋាន ប៉ុន្តែការផលិតផលនៅក្នុងខេត្ត នៅពុំទាន់អាចបំពេញតាម តម្រូវការទីផ្សាក្នុងស្រុកបានគ្រប់គ្រាន់នៅឡើយទេ នេះហើយជាកត្តាដែលជម្រុញឲ្យមានការនាំចូលបន្លែផ្លែឈើពីប្រទេសជិតខាង ៕
កិះខន
