រាជធានីភ្នំពេញ ៖ សម្តេច ហ៊ុន សែន ធ្លាប់បានប្រកាសហើយ ប្រកាសទៀតថា សម្តេចនឹងបន្តតំណែងរហូត១០ឆ្នាំ ទៀត បើប្រជាពលរដ្ឋនៅតែបោះឆ្នោតជូនសម្តេច ។ ប៉ុន្តែសម្តេចមិនដែលបង្ហាញទេថា តើហេតុ អ្វីបានជាសម្តេចបន្តកាន់តំណែងយូរដូច្នេះ? ផ្តើមពីនោះក៏ធ្វើឲ្យក្រុមគាំទ្របក្សប្រឆាំងរិះគន់ថា សម្តេចក្រាញនឹងអំណាច ហើយរិះរកគ្រប់វិធី ដើម្បីផ្លាស់ប្តូរសម្តេចចេញពីប្រមុខដឹកនាំ ។
ប៉ុន្តែឥឡូវនេះច្បាស់ហើយ ខណដែលសម្តេច ហ៊ុន សែន ថ្លែងនៅចំពោះមុខក្រុមសមាគមគ្រូពេទ្យស្ម័គ្រចិត្តយុវជន សម្តេចតេជោ (TYDA) នៅថ្ងៃទី២ ខែមីនា ឆ្នាំ២០១៨ម្សិលមិញនេះ ដោយសម្ដេចបានប្រកាសថា សម្ដេចនឹង បន្ដមុខតំណែង ជានាយក រដ្ឋមន្ដ្រីជាង១០ឆ្នាំទៀត ។ សម្តេចថា លុះត្រាតែ CNRP រលាយគ្មានសល់រូបរាង និងស្រមោល ហើយសភាពការណ៍នៅកម្ពុជាមានភាពនឹងនរ និងច្បាស់លាស់ល្អ ទើបការ ចាកចេញពីតំណែងរបស់សម្ដេច មានភាពងាយស្រួលបំផុត ។
សម្ដេចនាយករដ្ឋមន្ត្រីមានប្រសាសន៍ថា លុះត្រាតែពួកអាចង្រៃអស់នេះអាលាយ សភាពការណ៍ វានឹងនរ ច្បាស់លាស់ ការចាកចេញរបស់ ហ៊ុន សែន គឺមានភាពងាយស្រួល ប៉ុន្ដែនៅពួក អាចង្រៃអស់នេះ ហ៊ុន សែន នៅព្រោះអ្នកអាចត្រួតត្រាវាបាន គឺប្រហែលមនុស្សមិនច្រើនទេ សំខាន់ជាងគេគឺ ហ៊ុន សែន ។
សម្ដេចបន្ដថា មានអ្នកគាំទ្រអតីត CNRP នៅក្រៅប្រទេសបានប្រមូលម្ដុំគ្នា វាយប្រហារ សម្ដេចតាមរយៈពាក្យសម្ដី និងបានវាយត្រកូល “ហ៊ុន” ដែលពួកគេទាំងនេះចង់ធ្វើឲ្យ សម្ដេចខឹង ។ សម្តេចសង្កត់ធ្ងន់ថា គោលនយោបាយអតីត CNRP ដាក់ចេញគឺកំចាត់គេ កំចាត់ឯង ។
ដូច្នេះសម្តេចសួរថា តើអ្នកនយោបាយអតីត CNRP បានកែឬនៅ “មានស៊ីអត់ សែន មានសែនអត់ស៊ី” ប្រសិនបើពួកអស់លោកមិនទាន់កែ សម្ដេចនៅកំដរលេងដល់ទីបញ្ចប់ សម្តេចព្រលយថា “ខ្មោចរបស់ខ្ញុំស្លាប់កប់នៅកម្ពុជា ប៉ុន្ដែខ្មោចអ្នកឯងងាប់កប់នៅក្រៅប្រទេស” ។ សម្ដេច ហ៊ុន សែន ក៏បានបង្ហើបថា សម្ដេចបើកទ្វារចំហរ ទៅលើកិច្ចសន្ទនា ខាងនយោបាយ ជាមួយអ្នកណាក៏បានដែរ ក៏ប៉ុន្ដែសម្ដេចបញ្ជាក់ថា សម្ដេចមិនអាចសន្ទនា ជាមួយអ្នកណាដែល ជាប់ទោសនោះទេ ៕
