ខេត្តក្រចេះ ៖ បុរសវ័យចំណាស់ម្នាក់បានពុលត្រីកាពតស្លាប់ ខណៈប្រពន្ធ និងកូនកំពុងសម្រាកព្យាបាលនៅមន្ទីរពេទ្យស្រុកឆ្លូង បន្ទាប់ពីពួកគេនាំគ្នាហូបត្រីកំពត ហើយចង្អោរ ចុកពោះហើយយកទៅមន្ទីរពេទ្យ តែក្រុមគ្រួពេទ្យជួយសង្គ្រោះឪពុកមិនបានដោយមានសភាពធ្ងន់ធ្ងរពេក។
ហេតុការណ៍បានកើតឡើស្ថិតក្នុងភូមិប្រម៉ា ឃុំកំពងដំរី ស្រុកឆ្លូង ខេត្តក្រចេះ កាលពីល្ងាចថ្ងៃទី២៧ ខែកុម្ភៈ ឆ្នាំ២០១៨។
អភិបាលស្រុកឆ្លូង លោក ហេង ស៊ីថា បានបញ្ជាក់ឱ្យដឹងថា ជនរងគ្រោះដែលស្លាប់នោះមានឈ្មោះ ខាត់ ខាន់ ភេទប្រុស អាយុ៥៧ឆ្នាំ បានស្លាប់ពេលយកទៅដល់មន្ទីរពេទ្យ។ ឯប្រពន្ធឈ្មោះ ហម ប៉ក់ ភេទស្រីអាយុ ៥៣ឆ្នាំ និងកូនស្រីឈ្មោះ ខាន់ រ៉ាទី អាយុ១៨ឆ្នាំ អ្នកទាំងពីររងគ្រោះធ្ងន់កំពុងសម្រាកព្យាបាលនៅមន្ទីរពេទ្យ បង្អែកស្រុក។
លោក ឆុង តូរ៉ាន អធិការស្រុកឆ្លូងបានឱ្យដឹងថា មូលហេតុដែលពួកគាត់ពុលត្រីកាពតដោយពួកគាត់ទៅនេសាទត្រីនៅបឹងត្រពាំងរ៉ុន ពេលបានត្រីកាពត់មកចំអិនធ្វើអាហារពេលហូបទៅបណ្ដាលឲ្យពុលតែម្ដង។ ករណីនេះកម្លាំងជំនាញបច្ចេកទេសចុះទៅត្រួតពិនិត្យស្រាវជ្រាវដល់កន្លែងកើតហេតុឃើញថាពិតជាពុលត្រីកាពតប្រាកដមែន៕
