ភ្នំពេញ)៖ នៅថ្ងៃទី២៧ ខែកុម្ភៈ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបង្ហោះខសារនៅលើ Account Facebook របស់លោក ដោយនិយាយបញ្ឆិតបញ្ឆៀងរឿង ដែលអ្នកអានវាយត្លៃថាលោកចង់ឌឺរឿងហាងបិទខារ៉ាអូខេកូសូឡូដែលធ្លាយរឿងមន្ត្រីនិងឧកញ៉ាបង្ខំឲ្យស្រីស្រាតរាំ។សូមពិនិត្យមើលសារ «សូមទោសជាមុនដែលមាត់ខ្ញុំទទួលទានអំបិល ប្រហុកហេតុនេះចេះតែរពិសមាត់។ យើងតែងប្រាប់ប្រជាជនថា កុំខឹងគោវាយរទេះ ពោលគឺបុគ្គលម្នាក់ធ្វើខុស តែមកស្អប់រាជរដ្ឋាភិបាលនោះមិនត្រូវទេ។ តែដល់ភ្ញៀវធ្វើខុសនៅក្នុងហាង អ្នកខុសអត់មានទោស តែបិទហាងទាំងមូល។ ណឹងមិនយើងប្រាប់រាស្ត្រផ្សឹង តែយើងធ្វើផ្សេង?»។
កាលពីថ្ងៃទី២១ ខែកុម្ភៈកន្លងទៅនេះលេចធ្លាយ វីដេអូឃ្លឹបបង្ហាញពីការរាំស្រាត បែបអាសអាភាស តាមរយៈបណ្តាញសង្គម ហើយវីដេអូនោះ គេទម្លាយឲ្យដឹងថា នៅក្នុងបន្ទប់ខារ៉ាអូខេ កូឡូសូ «Coloso» ដែលថតដោយភ្ញៀវក្នុងបន្ទប់១ នៃខារ៉ាអូខេ។
បន្ទាប់មកនៅថ្ងៃទី២៣ ខែកុម្ភៈ ឆ្នាំ២០១៨ កម្លាំងចម្រុះរដ្ឋបាលខណ្ឌចំការមនដឹកនាំដោយលោកស្រី កែវ សុគន្ធា ព្រះរាជ្ញារងអមសាលាដំបូងរាជធានីភ្នំពេញ, លោក ព្រុំ សំខាន់ អភិបាលខណ្ឌចំការមន និងលោកស្រី គឹម វណ្ណា ប្រធានការិយាល័យទេសចរណ៍រាជធានីភ្នំពេញ បានចុះមកពិនិត្យទីតាំងខារ៉ាអូខេ កូឡូសូ ដែលស្ថិតនៅផ្លូវ៣៦០ សង្កាត់បឹងកេងកងទី៣ ខណ្ឌចំការមន ដែលមានការរាំអាស់អាភាស ។
ក្រោយពីបានចុះពិនិត្យសួរនាំ និងធ្វើកំណត់ហេតុចូលរួមជាមួយក្រុមការងារចម្រុះរួចហើយ លោកស្រីព្រះរាជអាជ្ញារង បានសម្រេចបិទបន្ទប់ខារ៉ាអូខេ ចំនួន៣៤បន្ទប់ ចាប់ពីម៉ោង២៣៖០០យប់ថ្ងៃទី២៣ ខែកុម្ភៈ ឆ្នាំ២០១៨ ជាបណ្តោះអាសន្ន ហើយក្រុមការងារបានបញ្ចប់ការងារ ដោយបានបិទកំណត់ហេតុនៅនឹងបន្ទប់ខារ៉ាអូនខេ ចំនួន៣៤បន្ទប់នេះ ដោយបញ្ចប់នៅវេលាម៉ោង០១៖៣០នាទីយប់ឈានចូលថ្ងៃទី២៤ ខែកុម្ភៈ ឆ្នាំ២០១៨។