ភ្នំពេញ ៖ ភរិយានិងបងថ្លៃត្រូវបានលោកប្រធានមន្ទីរទ្យវិសាលសុខដែលជាប្តី ប្តឹងឲ្យតុលាការឃុំខ្លួនដោយសារហ៊ានវ៉ៃប្តីពេលនាំស្រីចូលដេកក្នងផ្ទះ ។ ភរិយាលោកប្រធានពហុព្យាបាលវិសាលសុខ និងបងថ្លៃប្រុស ត្រូវបានសមត្ថកិច្ចអាវុធហត្ថរាជធានីភ្នំពេញបញ្ជូនមកអយ្យការអមសាលាដំបូងរាជធានីភ្នំពេញកាលពីព្រឹកថ្ងៃទី ១៣កុម្ភៈ ឆ្នាំ២០១៨ដើម្បីសាកសួរករណីព្រួតគ្នាយកកាតូទឹកជ័រសម្រាប់ស្រោចផ្កាវាយប្តី បណ្ដាលអោយបែកឈាមខណៈពេលឃើញប្តីនៅក្នុងបន្ទប់ដេកក្នុងផ្ទះផ្ទាល់ខ្លួនជាមួយស្រីផ្សេង។
លោកខាំ សុផារី ព្រះរាជអាជ្ញារងអមសាលាដំបូងបាន សម្រេចចោទប្រកាន់ជនសង្ស័យទាំង២នាក់ ពីបទហឹង្សាដោយចេតនាមានស្ថានទំងន់ទោសតាមមាត្រា២១៨នៃក្រមព្រហ្មទណ្ឌ ហើយបញ្ជូនសំណុំរឿងនេះអោយចៅក្រមស៊ើបសួរបន្តតាមនីតិវិធីដោយភ្ជាប់ការស្នើសុំឃុំខ្លួនផងដែរ ។នៅល្ងាចថ្ងៃដដែលនេះលោកម៉ុងមុនីសោភា ចៅក្រមស៊ើបសួរបានសម្រេចឃុំខ្លួនទាំង២នាក់បងប្អូនដាក់ពន្ធនាគារហើយ។
ជនជាប់ចោទ ឈ្មោះ ទូច រស្មី ហៅអាម៉ី ភេទស្រី អាយុ៣៣ឆ្នាំ ជាភរិយាលោកជា សំអាន ប្រធានមន្ទីរពេទ្យវិសាលសុខ បច្ចុប្បន្នស្នាក់នៅផ្ទះលេខ១០៣៥ បុរីសេវិនវិឡា ស្ថិតក្នុងសង្កាត់ទឹកថ្លា ខណ្ឌសែនសុខ និងឈ្មោះ ទូច សុធា ហៅតុង ភេទប្រុស អាយុ៣៥ឆ្នាំ ជាបងប្រុសរបស់ឈ្មោះទូច រស្មី ។
សមត្ថកិច្ចបានឲ្យដឹងថា កាលពីវេលាម៉ោង៥ល្ងាចថ្ងៃទី ៩កុម្ភៈ ឆ្នាំ២០១៨ ឈ្មោះទូច រស្មី បានមកដល់ផ្ទះរបស់ខ្លួនលេខ១០៣៥ បុរីសេវិនវីឡា ស្រាប់តែឃើញប្ដីរបស់ខ្លួនឈ្មោះ ជា សំអាន នៅក្នុងបន្ទប់ដេកជាមួយស្រីក្មេងម្នាក់ដែលមិនស្គាល់ឈ្មោះ ។ ពេលនោះប្រពន្ធក៏សួរនាំប្ដីដែលថ្លើមធំហ៊ាននាំស្រីក្មេងមកស្នេហាគ្នាដល់ក្នុងផ្ទះមិនចេះអៀនខ្មាស ចឹង។ ការជជែកគ្នានោះបានឈានដល់មានការប្រតាយប្រតប់គ្នាស្រែកឡូឡាពេញផ្ទះក៏លឺដល់ឈ្មោះ ទូច សុធា ដែលនៅក្នុបន្ទប់ផ្សេង ។
ពេលលឺសូរសម្លេងឈ្លោះគ្នារបស់ប្ដីប្រពន្ធនេះ ឈ្មោះទូច សុធា បានស្ទុះមកចាប់ដៃកុំអោយលោក ជា សំអាន វាយប្រពន្ធដោយសារតែប្រពន្ធសួរនាំរឿងយកស្រីក្មេងមកដេកដល់ក្នុងផ្ទះ ។ ឆ្លៀតពេលឃើញបងប្រុសចាប់ដៃប្ដីជាប់ ឈ្មោះ ទូច រស្មី បានស្ទុះទៅយកកាតូទឹកជ័រមកវាយក្បាលប្ដីឈ្មោះជា សំអាន ពីរបីប៉ូកបណ្ដាលអោយបែកឈាមហូររឹមៗ ។
ក្រោយបែកក្បាលហូរឈាមដូច្នេះ ឈ្មោះជា សំអាន ក៏បានប្ដឹងមកសមត្ថកិច្ចអាវុធហត្ថអោយចុះមកឃាត់ខ្លួនប្រពន្ធនិងបងថ្លៃកសាងសំណុំរឿងបញ្ជូនមកតុលាការតែម្ដង ។
គេមិនដឹងថាហេតុអីបានជាលោកប្រធានមន្ទីពេទ្យហ៊ាននាំស្រីក្មេងមកស្នេហាគ្នាប្រព្រឹត្តអំពើផិតមានទោសឯកពន្ធភាពបែរជាមកប្ដឹងប្រពន្ធនិងបងថ្លៃរហូតត្រូវឃុំខ្លួននោះឡើយ ព្រោះការអនុវត្តច្បាប់ស្រុកខ្មែរអាញ៉េអាញ៉ៃស្រេចចិត្តចឹងនោះ៕
