រាជធានីភ្នំពេញ ៖ សម្ដេច ហ៊ុន សែន បានបញ្ជាឲ្យអភិបាលរាជធានីខេត្តទាំងអស់ ចាប់រថយន្ត តទ្រុង នឹងដឹកលើសទំងន់ ចាប់ពីម៉ោង ០០យប់នេះតទៅ ។ ការថ្លែងរបស់សម្តេចធ្វើឡើងកាលពីព្រឹកមិញ ក្នុងឱកាសសម្ពោធបើកការដ្ឋានសាងសង់ស្ពានបេតុងឆ្លងកាត់ទន្លេមេគង្គតភ្ជាប់ពីខេត្តកំពង់ចាម ទៅត្បូងឃ្មុំ ។
សម្ដេច ហ៊ុន សែន មានប្រសាសន៍ថា គ្រោះថ្នាក់ចរាចរណ៍ នៅប្រទេសយើងនៅតែច្រើន អារឿងរថយន្តដឹកទំនិញ លើសទម្ងន់នេះ ។ ដូច្នេះសម្តេច ដាក់ចេញតែម្ដង មើលក្រុមហ៊ុនណាដឹកលើសទម្ងន់ យើងអាចចាប់រថយន្តហើយ បិទក្រុមហ៊ុនតែម្ដង បើអ្នកឯងមិនកែខ្ញុំបិទក្រុមហ៊ុនចោល ។ សម្តេចបញ្ជាក់ថា រឿងកាត់ឡានត គឺចាប់ពី ០ម៉ោងយប់នេះ ទៅឡានតទាំងប៉ុន្មាន មិនត្រូវឲ្យមាននៅលើផ្លូវទេ បើមាននៅខេត្តណាចៅហ្វាយខេត្ត នោះត្រូវទទួលខុសត្រូវ បែងចែកគ្នាទទួលខុសត្រូវ ខ្ញុំនឹងតាមមើល ដឹងដៃ ហ៊ុន សែន ហើយបើចង់ដកចៅហ្វាយខេត្ត ចៅហ្វាយស្រុកមិនយូរទេ ។ ឲ្យតែមានឡានតខុស ទំនងចាប់បញ្ចូលទ្រុង ទាំងអស់ហើយចាំឲ្យគេលើកគ្នា មកតវ៉ាដល់ផ្ទះហ៊ុនសែន ហើយចាប់បញ្ជូនទៅព្រៃស ទាំងអស់តែម្ដង ៕
