ខេត្តបាត់ដំបង ៖ តាមសេចក្តីរាយការណ៍បានឲ្យដឹងថា នៅព្រឹកថ្ងៃទី៦ ខែកុម្ភៈ ឆ្នាំ២០១៨នេះសិស្សរៀននៅវិទ្យាល័យបវេលបានឈានដល់នាំគ្នាមកតវ៉ានៅមន្ទីរអប់រំ យុវជន និងកីឡាខេត្តបាត់ដំបងហើយ បន្ទាប់ពីការិយាល័យអប់រំស្រុកដោះស្រាយមិនចេញ ករណីដកគ្រូគណិតវិទ្យាម្នាក់ ឈ្មោះ រ៉ាត់ សារ៉េត បង្រៀននៅវិទ្យាល័យបវេល ស្ថិតក្នុងស្រុកបវេល ខេត្តបាត់ដំបង ។
បើតាមការឲ្យដឹងរបស់សិស្សម្នាក់ ក្នុងចំណោមពួកគេដែលគ្រោងឡើងមកតវ៉ាដល់មន្ទីរ ហើយក៏ប្រមូលផ្ដុំគ្នារួចហើយដែរ ប្រមាណជាង២០នាក់ (ធ្វើដំណើរតាមម៉ូតូ) កំពុងរៀបចំចេញមកហើយ ក្នុងគោលបំណងឲ្យខាងមន្ទីរអប់រំខេត្ត ជួយដោះស្រាយរឿងនេះ។
សេចក្តីរាយការណ៍បញ្ជាក់ថា មុននឹងពួកគេនាំគ្នាមកទីរួមខេត្ត ក៏នាំគ្នាបួងសួងទីសក្ការៈ នៅរង្វង់មូលស្រុកបវេលផងដែរ ។
សូមបញ្ជាក់ថា កាលពីថ្ងៃទី៥ ខែកុម្ភៈ សិស្សវិទ្យាល័យបវេលប្រមាណជិត៦០នាក់បានលើកគ្នាទៅតវ៉ា នៅការិយាល័យអប់រំស្រុក ដើម្បីទាមទារកុំឲ្យដកលោកគ្រូ រ៉ាត់ សារ៉េត ឯកទេសគណិតវិទ្យា ទៅធ្វើការនៅការិយាល័យអប់រំស្រុក តាមសំណើររបស់លោក ហួរ វុទ្ធី នាយកវិទ្យាល័យបវេល តែការទាមទាររបស់ពួកគេ ត្រូវបានខាងមន្ត្រីអប់រំស្រុកបដិសេធ៕
