រាជធានីភ្នំពេញ ៖ នៅព្រឹកថ្ងៃពុធ ៧រោច ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី០៧ ខែកុម្ភៈ ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បន្តអញ្ជើញចុះជួបសំណេះសំណាលជាមួយកម្មករ កម្មការិនីសរុបប្រមាណ១៥,១០៩នាក់ មកពីរោងចក្រ សហគ្រាសចំនួន៧ នៅតំបន់កប់ស្រូវ ខណ្ឌពោធិ៍សែនជ័យ រាជធានីភ្នំពេញ។
សូមជម្រាបថា ចាប់តាំងពីថ្ងៃទី២០ ខែសីហា ឆ្នាំ២០១៧មក សម្តេចតេជោ ហ៊ុន សែន បានជួបសំណេះសំណាលជាមួយកម្មករ និយោជិត ក៏ដូចជាប្រធានរដ្ឋបាល ប្រធានផ្នែក ប្រធានក្រុម និងជំនួយការរោងចក្រ សហគ្រាសនានា បានចំនួន ២៨លើករួចមកហើយ។ ក្នុងនោះមានកម្មករ និយោជិតសរុបជាង ៣២ម៉ឺននាក់ហើយ បានជួបសំណេះសំណាល ដោយផ្ទាល់ជាមួយសម្តេចប្រមុខរាជរដ្ឋាភិបាលកម្ពុជា។
ក្រៅពីការចុះជួបសំណេះសំណាលជាមួយកម្មករ និយោជិត ក៏ដូចជាតំណាងកម្មករ និយោជិតហើយនោះ សម្តេចតេជោ ហ៊ុន សែន ក៏បានជួបកម្មករ និយោជិតផ្ទាល់ជាង ២ម៉ឺននាក់នៅតាមរោងចក្រចំនួន១០ផងដែរ ហើយក៏បានជួបជាមួយអ្នកសេដ្ឋកិច្ចក្រៅប្រព័ន្ធជិត ៥ពាន់នាក់ផងដែរ៕
