រាជធានីភ្នំពេញ ៖ ទោះបីជាសម្តេច ហ៊ុន សែន នាយករដ្ឋមន្ត្រីកម្ពុជា មិនបានបញ្ចេញ ឈ្មោះអ្នកដែលត្រូវបានសម្តេចព្រមានថា « សូមផ្តាំកុំមកអាស៊ីឲ្យសោះ ខ្ញុំនិងតាមយកអ្នកឯងឲ្យ ទាល់តែបានបើគេប្រកាសខ្លួនជាភេរវករទៅហើយ…..ជនភេរវករយើងអាចសហប្រតិបត្តិការទៅតាមចាប់ខ្លួននៅតាមកន្លែងនេះ កន្លែងនោះឲ្យបាន » ។ ប៉ុន្តែគេដឹងថា ការព្រមានរបស់សម្តេច បែបនោះ គឺសំដៅលើមេដឹកនាំចលនាសង្គ្រោះជាតិ CNRP គឺលោក សម រង្ស៊ី តែម្តង ។
សម្តេច ហ៊ុន សែន បានថ្លែងបែបនោះនៅក្នុងពិធីប្រគល់សញ្ញាបត្រ និងសម្ពោធអគារ ទេពកោសល្យវិស្វកម្ម នៅវិទ្យាស្ថានបច្ចេកវិទ្យាកម្ពុជា នាព្រឹកថ្ងៃទី០១ ខែកុម្ភៈ ឆ្នាំ២០១៨នេះ ។
សម្តេចមានប្រសាសន៍ថា ក្នុងទសវត្ស៨០ មានរដ្ឋមន្ត្រីមួយចំនួន ហៅខ្ញុំថារដ្ឋមន្ត្រី មិនទាន់បាត់ធុំក្លិនទឹកដោះគោ ខ្ញុំមិនខឹងគេទេ ខ្ញុំមានតែខិតខំបន្ថែមទៀត ព្រោះ បញ្ហាមិនស្ថិតនៅ ត្រង់អ្នកណាថាទេ ស្ថិតនៅលើយើងធ្វើបានឬអត់? ។ សម្តេចបានបញ្ជាក់ថា គ្មានអ្នកណាផ្ដួលហ៊ុន សែន ក្រៅពី ហ៊ុន សែន បានទេសូមបញ្ជាក់នៅកន្លែងនេះ ។ សម្តេចបន្តថា អារឿងស្រែកឡូឡាប៉ុន្មានថ្ងៃនេះ សូមផ្ដាំទៅកុំចង់ឲ្យគេវៃ ដែកគោលលើក្ដាមឈូស….ចលនាអីក៏ដោយ អញ្ជើញមកចុះ ហ៊ុន សែនមិនកាន់ទ័ពក៏ដោយ តែ ហ៊ុន សែន អាចបញ្ជាទ័ពបានទាំងអស់ ។
សម្តេចបញ្ជាក់បន្ថែមថា មេទ័ពមួយនេះមិនមែនជាមេទ័ព ទន់ជ្រាយនោះទេ ។ ខ្ញុំមិន និយាយចំអ្នកណាទេ នៅចាំទេក្នុងសត្សវត្សទី២០ គេហៅអាឆ្កែហើយកូនអាមួយនោះ នៅសត្សវត្សទី២១គេហៅអាឆ្កែទៀត ៕