ក្រចេះ ៖ ឯកឧត្ដម វ៉ា ថន អភិបាលខេត្តស្ដីទី នៃគណៈអភិបាលខេត្តក្រចេះ បានមានប្រសាសន៍ថា បុណ្យមាឃបូជាប្រារព្ធឡើង ដើម្បីរំលឹកដល់ថៃ្ងដែល ព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនាឡើងក្នុងលោកនាប្រទេសឥណ្ឌាកាលពី ៥៨៨ ឆ្នាំ មុនគ្រិស្តសករាជ នាថៃ្ងទី ១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន ៩ ខែគត់ ។ ហើយការបង្កើតព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅក្នុងចំណោម ព្រះសង្ឃចំនួន១,២៥០អង្គ ជាសមាជិកក្នុងអង្គ មហាសន្និបាតមួយ ដែលបាននិមន្តមក ពីគ្រប់ស្រទាប់វណ្ណៈទាំងអស់ ។
ពិធីដង្ហែមាឃបូជាដែលប្រារព្ធនៅដើមពោធិ៍(បឹងគីឡូ) ក្នុងក្រុងក្រចេះ ខេត្តក្រចេះ នាល្ងាចថ្ងៃទី៣១ ខែ មករា ឆ្នាំ២០១៨នេះ ដោយឯកឧត្ដម វ៉ា ថន អភិបាលខេត្តស្ដីទី អញ្ជើញគណៈអធិបតី និងមានកិច្ចសហការចូលរួមពីគណៈមន្ត្រីសង្ឃខេត្ត ព្រះចៅអធិការក្នុងខេត្តជាច្រើនវត្ត និងមន្ត្រីរាជការ អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងប្រជាពុទ្ធបរិស័ទ លោកគ្រូ អ្នកគ្រូ សិស្សានុសិស្ស និងយុវជន ស ស យ ក យ៉ាងច្រើនកុះករ ។
ឯកឧត្ដម វ៉ា ថន បានបញ្ជាក់ថា ពិធីបុណ្យមាឃបូជា នាល្ងាចនេះ គឺក្នុងគោលដំណងផ្សាភ្ជាប់ ជាមួយព្រះពុទ្ធសាសនារបស់មន្ត្រីរាជការ អាជ្ញាធរមូលដ្ឋាន គ្រប់លំដាប់ ថ្នាក់ ប្រជាពុទ្ធបរិស័ទ លោកគ្រូ អ្នកគ្រូ សិស្សានុសិស្សទាំងអស់ ឲ្យចូលរួមថែរក្សាប្រពៃណីបុរាណ ឲ្យកាន់តែរឹងមាំជាងនេះ ក្រោយពីបំរើភារកិច្ចការពារ សុខសុវត្ថិភាពជូនប្រជាពលរដ្ឋ៕ ដោយ កិះខន
