រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញ លោក ហេង សុខណា កាលពីរសៀលថ្ងៃទី៣០ ខែមករា ឆ្នាំ២០១៨ ម្សិលមិញនេះបានប្រកាសសាលក្រមផ្តន្ទាទោសឧកញ៉ា ជួប ច័ន្ទ ដាក់ពន្ធនាគាររយៈពេល២ឆ្នាំ សងសំណងដើមបណ្តឹង១លានដុល្លារអាមេរិក និងសំណងជំងឺចិត្តចំនួន៥ម៉ឺនដុល្លារអាមេរិក ករណីចេញសែកអត់សាច់ប្រាក់ចំនួន១លានដុល្លារ។
ថ្លែងប្រាប់ក្រុមអ្នកសារព័ត៌មាន មន្ត្រីតុលាការបានលើកឡើងថា អង្គហេតុដែលតុលាការចោទប្រកាន់ឧកញ៉ា ជួប ច័ន្ទ ពីបទ «មិនបំពេញកាតព្វកិច្ចចំពោះឧបករណ៍អាចជួញដូរបាន» តាមមាត្រា២៣១ នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់គឺផ្ដើមចេញឧកញ៉ា ជួប ច័ន្ទ បានចុះកិច្ចព្រមព្រៀងជាមួយក្រុមហ៊ុន គឹម កៅ ក្នុងការបង្វិលប្រាក់សងមកក្រុមហ៊ុនគឹម កៅចំនួន៣លាន៥សែនដុល្លារ។ ក្នុងនោះឧកញ៉ា ជួប ច័ន្ទ បានចេញមូលប្បទានបត្រមួយសន្លឹក លេខ០៥៨៩៦០០ ចុះថ្ងៃទី១៤ ខែកញ្ញា ឆ្នាំ២០១៥ របស់ធនាគារកម្ពុជាពាណិជ្ជ ចំកាត់ដែលមានតម្លៃមួយលានដុល្លារ ដែលសែកនោះបានកំណត់ថ្ងៃបើកប្រាក់នៅថ្ងៃទី ៣០ ខែមិថុនា ឆ្នាំ២០១៧។ ប៉ុន្តែដល់ថ្ងៃកំណត់បើកប្រាក់ ស្រាប់តែខាងធនាគារបញ្ជាក់ថាគណនីនោះពុំមានប្រាក់ទេ ទើបក្រមហ៊ុន គឹម កៅ ដាក់ពាក្យប្ដឹងតែម្ដង៕
