រាជធានីភ្នំពេញ ៖ ក្រុមជើងខ្លាំង៤នាក់ ដែលព្រួតគ្នាវាយសមត្ថកិច្ចនគរបាលកាលពីពេលថ្មីៗនេះ ត្រូវបានតុលាការក្រុងភ្នំពេញសម្រេចឃុំខ្លួនបណ្តោះអាសន្ន ដោយចោទពីបទហិង្សាដោយចេតនា ។
សូមបញ្ជាក់ថា មុនពេលកើត គឺនៅថ្ងៃទី០៨ ខែមករា ឆ្នាំ២០១៨ កម្លាំងអធិការដ្ឋាននគរបាលខណ្ឌសែនសុខ បានដាក់គោលដៅត្រួតពិនិត្យ ជាតិអាល់កុល តាមដងផ្លូវ ហើយបានឃើញក្រុមជនសង្ស័យពីនាក់ ជិះម៉ូតូមួយគ្រឿងគ្មានផ្លាកលេខ ឌុបគ្នាតាមដងផ្លូវ ហើយក្នុងស្ថានភាពស្រវឹង ហើយកម្លាំងសមត្ថកិច្ចបានហៅជនសង្ស័យ ឱ្យឈប់ធ្វើការណែនាំ និងត្រួតពិនិត្យ ។
ភ្លាមនោះក៏ស្រាប់តែក្រុមជនសង្ស័យឈ្មោះ ដុំ ចំរើន និងដុំ ម៉ាលី បានទូរស័ព្ទហៅក្រុមបក្ខពួក៤នាក់ ទៅ៥នាក់ មកដល់គោលដៅកិច្ចប្រតិបត្តិការបស់សមត្ថកិច្ច រួចបានស្រែកឡូឡា និងបង្កទំនាស់ រួចប្រតាយប្រតប់ និងប្រើដៃវាយមកលើសមត្ថកិច្ច កំពុងប្រតិបត្តិការបណ្តាឱ្យរបួសនគរបាលម្នាក់ ។
បន្ទាប់មកសមត្ថកិច្ចបានឃាត់ខ្លួនជនសង្ស័យទាំង៤នាក់ យកមកធ្វើការសាកសួរនៅអធិការ ដ្ឋាននគរបាលខណ្ឌសែនសុខ រួចបញ្ជូនទៅតុលាការ ហើយសម្រេចឃុំខ្លួនបណ្តោះអាសន្នតែម្តង ៕
