ក្រចេះ ៖ ឯ.ឧ សរ ចំរុង អភិបាលខេត្ត និង ឯ.ឧ ប៉ាន់ ខែមប៉ុនថន ជំនួយការផ្ទាល់ សម្តេចតេជោ បានអញ្ជើញជាគណៈអធិបតី ក្នុងពិធីបិទវគ្គកីឡាបាលទាត់ពានរង្វាន់៧មករា ក្នុងគោលបំណង អបអរសារទរជ័យជម្នះ ៧មករា ១៩៧៩~២០១៨ និង ប្រគល់ជយ័ លាភីដល់ កីឡាករ ដែលរៀបចំឡើងដោយក្រុម យុវជនស្រលាញ់សន្តិភាព សហការជាមួយមន្ទីរអប់រំយុវជន និង កីឡាខេត្ត កាលពីរសៀលថ្ងៃទី០៤ ខែមករា ឆ្នាំ២០១៨ នៅក្នុងបរិវេណពហុកីឡាដ្ឋានខេត្តក្រចេះ ។
ឯ.ឧ ប៉ាន់ ខែមប៉ុនថន បានមានប្រសាសន៍ថាកីឡាគឺជាផ្នែកមួយដ៏សំខាន់ ដែលមនុស្សគ្រប់រូប ត្រូវការវាដោយពុំអាចខ្វះបាន កីឡាមិនត្រឹមតែនាំមក នូវសុខភាពប៉ុណ្ណោះទេ កីឡាក៏បានធ្វើឲ្យប្រព័ន្ឋសសៃប្រសាទ មានការចងចាំបានល្អ ក្នុងការសិក្សា លើសពីនេះកីឡា ក៏នាំមកនូវមិត្តភាព ចំណងសាមគ្គីភាព រវាងមនុស្សម្នាក់ ទៅមនុស្សម្នាក់ ពីសង្គមមួយទៅសង្គមមួយ ជាពិសេសវាបានធ្វើឲ្យយុវជន ជៀសឆ្ងាយពីគ្រឿងញៀនផងដែរ ។
ឯ.ឧ សរ ចំរុង ក៏បានប្រកាសបិទវគ្គកីឡាបាលទាត់ពានរង្វាន់៧មករា និងមានប្រសាសន៍ថា ការប្រកួត កីឡា គឺ តែងតែមានអ្នកឈ្នះ និងមានអ្នកចាញ់ ជាធម្មតា អ្នកហ្វឹកហាត់បានល្អ និង វៃឆ្លាតអ្នកនោះ គឺជាអ្នក ឈ្នះដូចពាក្យស្លោកមួយឃ្លាពោលថា ស៊ូ បង្ហូរញើស លើទីលានហ្វឹកហាត់ ជាជាងបង្ហូរទឹកភ្នែកនៅលើ ទីលានប្រកួត ។ ហើយបើពេលនេះយើងចាញ់ត្រូវតែ យកបទពិសោធន៍នេះទៅហ្វឹកហាត់ដកស្រង់ បច្ចេកទេសសម្រាប់ប្រកួតលើកក្រោយៗទៀត ។
ឆ្លងកាត់ការប្រកួតយ៉ាងស្វិតស្វាញ រយៈពេល៣២ថ្ងៃលទ្ធផលដែលទទួលបានជ័យលាភីចំណាត់ថ្នាក់លេខ១ បានទៅលើក្រុមព្រាបស FC ទទួលបានពាន់រង្វាន់ មេដៃមាស និងថវិការ១,៦០០,០០០រៀល ចំណាត់ថ្នាក់លេខ២ បានទៅលើក្រុមរការកណ្តាលស្រីមុំFC ទទួលបានមេដៃប្រាក់ និងថវិការ១,២០០,០០០រៀល និងចំណាត់ថ្នាក់លេខ៣ បានទៅលើក្រុមយុវជនសេះសវត្តថ្មគ្រែ ទទួលមេដៃសំរិទ្ធ និងថវិការ១,០០០,០០០រៀល ។
នឹងបានប្រគល់ពាន់រង្វាន់លើកទឹកចិត្តដល់អ្នកទាត់បាល់បញ្ចូលទី ច្រើនជាងគេ និងអ្នកសង្គ្រោះបាល់បានច្រើនជាងគេ ទទួលបានពាន់រង្វាន់ និងថវិការមួយចំនួន រួមទាំងមានរង្វាន់លើកទឹកចិត្តដល់ក្រុមដែលលេងបានល្អជាងគេ ។
ដោយ ៖ កិះខន
