រាជធានីភ្នំពេញ ៖ ស្ត្រីរកស៊ីផ្លូវភេទម្នាក់បានស្រែកទ្រហោយំនៅលើសួនសូគីមិច បន្ទាប់ពីត្រូវបុរសជាប្តីប្រច័ណ្ឌទះ៥កំផ្លៀង ដណ្តើមយកកូន បង្កឲ្យមានការភ្ញាក់ផ្អើលស្ថិតនៅតាមបណ្តោយផ្លូវជាតិលេខ៥ចំណុចលើសួនសូគីមិក ក្នុងភូមិ ឃ្លាំងសាំង សង្កាត់ឬស្សីកែវ ខណ្ឌឫស្សីកែវ រាជធានីភ្នំពេញ កាលពីម្សិលមិញ។
បុរសជាប្តីមាន ឈ្មោះ សុន សុគន្ធា ហៅមាស អាយុ២៤ឆ្នាំ មុខរបរមិនពិតប្រាកដស្នាក់នៅបន្ទប់ជួលក្នុងភូមិសាមគ្គីសង្កាត់ឫស្សីកែវ ខណ្ឌឫស្សីកែវ។ ចំណែកស្ត្រីជាប្រពន្ធមានឈ្មោះ អ៊ឹម រី អាយុ២៤ឆ្នាំ មុខរបររកស៊ីផ្លូវភេទ ស្នាក់នៅបន្ទប់ជួលជាមួយគ្នា។
ស្ត្រីជាប្រពន្ធបានរៀបរាប់ឲ្យដឹងថា រូបនាង និងប្តីស្រលាញ់ និងរស់នៅជាមួយគ្នាអស់រយៈពេល៥ឆ្នាំមកហើយព្រមទាំងបង្កើតបានកូនប្រុសពីរនាក់ដោយមិនបានរៀបការនោះទេ។
ស្ត្រីរូបនោះបន្តថា តាំងពីរូបនាងបានចាប់ដៃគ្នាជាប្តីប្រពន្ធមក ប្តីរបស់នាងមិនដែលជួយរកស៊ីអ្វីនោះទេ គឺដើរតែលេងជក់ថ្នាំជាមួយមិត្តភក្តិ ចំណែកនាងបានទៅរកប្រាក់ដោយរកស៊ីផ្លូវភេទ នៅពេលយប់នៅសួនម្តុំក្បែរវត្តភ្នំក្នុងខណ្ឌដូនពេញ ខណៈពេលត្រឡប់មកដល់ផ្ទះម្តងៗបុរសជាប្តីតែងតែសួររកលុយពេលមានលុយលោកប្តីក៏យកលុយនោះទៅជក់ថ្នាំជាមួយមិត្តភក្តិ និងតែងតែរករឿងប្រច័ណ្ឌនាង និងវាយនាងជាញឹកញាប់។ ក្រោយពីកើតជម្លោះជាមួយប្តីហើយ ប្តីនាងបានឡើងជិះរថយន្តឈ្នួលចេញទៅបាត់ ស្ត្រីខាងលើក៏វិលត្រឡប់ទៅបន្ទប់ជួលវិញដោយមិនបានដាក់ពាក្យបណ្តឹងនោះទេ៕