ភ្នំពេញ)៖ សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ នៅថ្ងៃទី២៨ ខែធ្នូ ឆ្នាំ២០១៧នេះ ក្នុងឱកាសចូលរួមជាអធិបតីក្នុងពិធីសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់ក្រសួងរៀបចំដែនដី នគរូបនីយកម្ម និងសំណង់បានផ្ដល់ការណែនាំ ៥ចំណុច សំខាន់ៗសម្រាប់អនុវត្តន៍។
សេចក្តីណែនាំ របស់សម្ដេចក្រឡាហោម ស ខេង រួមមាន៖
១៖ត្រូវពន្លឿនការចុះបញ្ជីដីធ្លី។
២៖ បង្កើនល្បឿនផែនការប្រើប្រាស់ដីប្លង់គោល ការងារចុះស្រង់ទិន្នន័យទាំងដីគោក ទាំងដីតំបន់ឆ្នេរសមុទ្រ។
៣៖ ពង្រឹងគ្រប់គ្រងផ្នែកសំណង់ ទប់ស្កាត់រាល់ការសាងសង់សំណង់នានា ដែលគ្មានលិខិតអនុញ្ញាតសាងសង់ ខិតខំបញ្ចប់សេចក្តីព្រាងច្បាប់សំណង់។
៤៖ បន្តខិតខំបញ្ចប់ការងារសម្បទានដីសង្គមកិច្ច ជូនជនក្រីក្រ យោធិន បន្តគ្រប់គ្រងដីរដ្ឋ ថែរក្សាធនធានធម្មជាតិ។
៥៖ ពង្រឹងការអនុវត្តការគ្រប់គ្រង សេវាសាធារណៈឲ្យបានត្រឹមត្រូវ និងច្បាស់លាស់/ខិតខំពង្រីកសមត្ថភាពមន្ត្រី ដើម្បីផ្តល់នូវសេវា Online ជូនប្រជាពលរដ្ឋ។
លោកទេសរដ្ឋមន្ដ្រី ជា សុផារ៉ារដ្ឋមន្ត្រីក្រសួងដែនដីនគរូបនីយ៍កម្មនិងសំណង់នៅក្នុង សន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ ដែលធ្វើនៅរាជធាំនីភ្នំពេញបានរាយការណ៍ថា «នៅក្នុងវិស័យដីធ្លី ក្រសួងបានបន្ដខិតខំចុះបញ្ជីដីធ្លី និងដោះស្រាយវិវាទដីធ្លីគ្រប់រូបភាព ដល់មូលដ្ឋាន ដែលបានធ្វើឲ្យចំនួនវិវាទ និងការតវ៉ានានា ថយចុះគួឲ្យកត់សម្គាល់»។
ដើម្បីសម្រេចបាននូវចក្ខុវិស័យក្នុងវិស័យដីធ្លី ក្រសួងបានបន្ដខិតខំ គ្រប់គ្រងលើកម្មសិទ្ធិដី ប្រើប្រាស់និងបែងចែកដីធ្លី ប្រកបដោយសមធម៌ តម្លាភាព ប្រសិទ្ធភាព និងចីរភាព ក្នុងគោលដៅបង្កើនប្រាក់ចំណូលដល់ថវិកាជាតិ ការកាត់បន្ថយនិងការលប់បំបាត់ភាពក្រីក្រ ការធានាសន្ដិសុខស្បៀង ការគ្រប់គ្រង់ដីរដ្ឋ ការការពារ បរិស្ថាន និងធនធានធម្មជាតិ និងការអភិវឌ្ឍសេដ្ឋកិច្ច សង្គមក្នុងបរិបទ នៃសេដ្ឋកិច្ចទីផ្សារ។
របាយការណ៍បានឲ្យដឹងថា៖ សម្រាប់ការងារចុះបញ្ជីដំបូង នៅឆ្នាំ២០១៧នេះ ក្រសួងបានចេញ ប័ណ្ណកម្មសិទ្ធដីបានចំនួន ២៣៧,១៤៣ប័ណ្ណ ក្នុងនោះចែកប័ណ្ណដល់ដៃប្រជាពលរដ្ឋ បាន ២០៩,៦៧៩ ប័ណ្ណ រួមមាន៖* កម្មវិធីអនុវិស័យរដ្ឋបាលដីធ្លី៖ បានប្រកាសកំណត់តំបន់វិនិច្ឆ័យចំនួន ២៣៨ភូមិ បញ្ចូលទិន្នន័យចំនួន ២៨៧,០៧៧ ក្បាលដី ចេញប័ណ្ណបានចំនួន ២២៩,៥៧៨ ប័ណ្ណ និងចែកប័ណ្ណជូនប្រជាពលរដ្ឋមានចំនួន២០២,១១៤ប័ណ្ណ។
* ការចុះបញ្ជីតាមរយៈបទបញ្ជាលេខ ០១ សម្រេចចែកប័ណ្ណបាន ៤,៤៩៣ ប័ណ្ណ។* ការចុះបញ្ជីដាច់ដោយដុំ សម្រេចបាន ៣,០១២ ប័ណ្ណ ក្នុងនោះការចុះបញ្ជីដីរដ្ឋបាន ៧០០ប័ណ្ណ។* ការចុះបញ្ជីដីសមូហភាពសហគមន៍ ជនជាតិដើមភាគតិច សម្រេចបាន ៦០ប័ណ្ណ សម្រាប់០៥ សហគមន៍ បើ សរុបលទ្ធផលពីពេលចាប់ផ្ដើមអនុវត្ដរហូតដំណាច់ឆ្នាំ២០១៧ ក្រសួងចេញប័ណ្ណកម្មសិទ្ធិដីបានចំនួន ៤,៨៨១,៥៨២ ប័ណ្ណ ក្នុងនោះចែកប័ណ្ណជូនប្រជាពលរដ្ឋបានចំនួន ៤,៦៤៧,៨៨៦ ប័ណ្ណស្មើនឹង ៦៦,៤% នៃក្បាលដីប៉ាន់ស្មានសរុប ៧លានក្បាលដី។ របាយការណ៍ បានបន្ថែមទៀតថា លទ្ធផលនេះ បើគិតធៀបតាមផែនការ ដែលត្រូវសម្រេចឲ្យបានក្នុងឆ្នាំ២០១៧ ឃើញថា លើសពីផែនការ ០,៤%៕
